Daily news
СФФ- „Студент“ на Серебреников и „Еволуција“ на Хаџихалиловиќ
Во рамките на Скопскиот филмски фестивал, утревечер (четврток), во киното „Фросина“ во 18.00 часот ќе биде прикажан рускиот филм „Студент“ во режија на Кирил Серебреников.
Филмот зборувба за борбата на волја меѓу фанатично ортодоксниот тинејџер Вења и неговата наставничка по биологија, атеистката Елена, режисерот Серебреников создаде длабоко вознемирувачко, моќно и визуелно ремек-дело.
Вења ја открива религијата, што предизвикува бранувања во неговото училиште во современа Русија.
Она што почнува како шега станува малку позлокобно кога Вења ќе ги прифати екстремистичките ставови за улогата на жените, инфериорноста на Евреите и злото на хомосексуалноста и се заканува да премине во насилство. Филмот нуди универзално релевантно истражување на религиозниот фанатизам, а во исто време и осудувачки, сатиричен поглед на модерна Русија, земја чии најголеми институции сè повеќе се под доминација на реакционери и фанатици со средновековни размислувања.
Два часа подоцна (20.00) е француско-белгиско-шпанскиот филм „Еволуција“ на Луис Хаџихалиловиќ.
Помина повеќе од една деценија од впечатливото деби на Лусил Хаџихалиловиќ „Невиност“ (2004), која во меѓувреме беше косценаристка на филмот на Гаспар Ное „Влез во празното“. Нејзиниот долгоочекуван нов игран филм „Еволуција“, кој се случува на еден мистериозен остров, и самиот е како загадочна карпа, далеку од истражените филмски мапи. На островот живеат само млади момчиња и нивните постари негувателки. Со заедницата доминира мрачна бетонска медицинска установа на блискиот ‘рт, каде што ги праќаат сите деца „да се излечат“, а таму подлежат на вознемирувачки медицински процес. Кога едно од децата, Макс, ќе го открие телото на друго дете во морето, ќе почне да се сомнева во тоа што им го кажуваат. Ова е приказната за свеста што еволуира и води кон раѓање на скептицизам – и поконкретно, недоверба кон властите што буди желба за потрага по подобар свет.
Страшен, привлечен и прекрасно снимен и дизајниран, „Еволуција“ создава филмски свет што е крајно морничав и вистински ве обзема, а се одвива како чудесен сон кој е постојано на работ на кошмар.
Последната проекција за утревечер во „Фросина“ во 22 часот е резервирана за „Камено срце“ на исландскиот режисер Гудмундур Арнар Гудмундсон.
Ова филмско остварување, ги следи приказните на Тор и Кристијан, двајца најдобри другари во претпубертетски/преттинејџерскигодини, кои живеат во мало село во рурален Исланд. И на двајцата животот дома им е тежок – родителите на Тор се отсутни, а таткото на Кристијан е пијаница и насилник – но тие наоѓаат прибежиште еден во друг и во времето што го минуваат лутајќи низ селото, бегајќи од тепачите и врткајќи се околу локалната кафеана. Ќе имаат турбулентно лето кога едниот ќе се обиде да го освои срцето на една девојка, додека другиот открива нови чувства кон најдобриот другар.
„Камено срце“ го истражува созревањето на двајца млади другари и го анализира прифаќањето на хомосексуалните чувства и страсти. Тој е портрет на внатрешниот конфликт што ќе ги раздели, а потоа повторно ќе ги спои главните ликови. Од светот на игри и себеспознавање, транзицијата ќе биде тешка, шокантна и болна во обидот да се справат со деликатниот и суров премин во зрелост. Ова е трогателно, добро одиграно и визуелно прекрасно деби што ветува и фрла нежен поглед на превирањата во чудните години. крај/мф/ав
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.