Daily news
СЈО отвори истраги за странските служби, патните трошоци, набавката на рендген-апарати…
Специјалното јавно обвинителство отвори седум истраги за странските служби, патните трошоци, набавката на рендген-апарати, софтверот во ЕЛЕМ, за дивоградби… со кои се опфатени 17 лица.
Како што информира денеска на прес-конференција обвинителката на СЈО, Фатиме Фетаи, првата истрага со кодно име „Странски служби“ се отвора за две лица, од кои едното се сомничи за директен извршител, а другото е нарачател.
„Во октомври 2014 година, по барање на лице од УБК, во странски центри бил побаран извештај кој ќе докаже дека во Македонија има двојни базни станици. Целта е да се докаже дека прислушувале странци. Секако, ова е направено“, вели Фатиме Фетаи. Второосомничениот е началник на оперативна техника во УБК, кој побарал да се набави опрема во согласност со Законот за јавната набавка, при што била фаворизирана странска фирма. За пет дена била средена целата работа, а поканите и понудите се рачно напишани од исто лице. Истиот ден кога била донесена одлука за најповолна понуда, таа била и прифатена. Во мај 2015 година веќе е инсталирана опремата“, образложи Фетаи.
Втората истрага „Друмарина“ се однесува на патни трошоци за пратеничката на ВМРО-ДПМНЕ, Силвана Бонева, која се сомничи оти поднесувала лажни патни налози дека патува за да присуствува во Собранието. Обвинителката Фатиме Фетаи соопшти дека осомничената од 25 јуни 2011 година до 16 декември 2015 до собраниските служби поднесувала лажни фискални сметки за патарини. Истрагата на СЈО покажала дека Бонева имала сместување во Скопје, а за тој период доставила сметки за патарини за 843 патувања со сопствено возило.
„Извршената анализа покажува дека ако патувањата би биле реално направени, осомничената би направила 235.928 км, но, според доказите, таа поминала 133.520 километри“, рече Фетаи. Според истрагата, Бонева, која е рекордер во наплатен надомест за службени патувања, на овој начин го оштетила буџетот 5.973.802 денари или 100.000 евра.
Третата истрага што ја отвори СЈО е со име „Рендген“. „При постапката за јавна набавка за рендген и други апарати постои основано сомневање дека осомничениот фаворизирал фирма, а овозможил таа фирма да добие детаљни податоци за јавната набавка. Фирмата извршила скинирање на сè што недостига во здравството, а за тоа било изготвено извештај. Потоа, тој извештај е пратен кај осомничениот. Јавната набавка е направена на фирма на мајка на позната новинарка“, велат од СЈО.
Со кодно име „Продуцент“ е отворена четвртата истрага на СЈО. „Од 2009 до 2012 министерот за земјоделство, спротивно на Законот за јавните набавки, направил злоупотреба на својата положба. Тој склучил договор со фирмата „Консталтинг смарт центар“ ДООЕЛ Скопје. Тие направиле договор за емисија што се емитувала на „Сител“, без спроведување јавна набавка. Договорот е во вредност од 50 илјади евра. Парите се исплатени на „Смарт центар“ ДООЕЛ, без да се приложи дека е реализирана емисијата.
Петтата истрага е наречена „Лидери“, а се однесува на договор меѓу двајца лидери на политички партии, кои се договарале за рушење објект. Осомничен е инвеститорот. Станува збор за објект – нелегална градба спроти американската амбасада во Скопје.
Шестта истрага е наречена „Тарифа 2“ за набавка на софтвер во ЕЛЕМ. Истрагата се отвора за лице што е веќе обвинето. Штетата е причинета по два основа – 146.000 евра поради одобрување на неоснована исплата за миграција од стариот во новиот систем, а таа миграција на податоци досега не е направена. Втората исплата е од 72.480 илјади евра, што е противзаконско. Осомничениот, кој е координатор за имплементација на ЕРБ-системот, направил штета од 218.880 евра.
Последната седма истрага што ја отвора СЈО е наречена „Транспортер 2“. Се спроверува против десет лица. Во неа се вклучени истите лица од претходниот предмет плус тројца директори на училишта. За нив постои сомнеж дека поранешниот градоначалник заедно со директорите прибавиле имотна корист за пет превозници. Тие се сомничат за злоупотреба на службената должност, а превозниците се осомничени како помагачи.
К. Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.