Daily news
Тодоров: Да ги вратиме „Фемили Аеродром“ на трибините
Александар Тодоров вчера се врати на функцијата шеф на стручниот штаб на МЗТ Скопје Аеродром, а денеска ја одржа првата прес-конференција на која ги изложи плановите за наредната натпреварувачка сезона. Тодоров презентираше четири клучни точки кои треба да бидат реализирани, а една од нив е враќањето на навивачката група „Фемили“ на натпреварите на клубот.
„Задоволство е што сум повторно тука, во овој клуб, кој го чувствувам како мој. Ова е мое враќање дома и е единственото место каде што сум работел и каде навистина се чувствувам како дома. Нè чека еден предизвик бидејќи кога последен пат седнав пред вас, таму некаде пред шест години, ви кажав дека единствена цел таа сезона ќе биде шампионската титула, но овој пат ќе поставиме малку поразлични цели, не резултатски, тие секогаш се највисоки, но поставуваме четири цели.
1. Да составиме тим чија основа ќе бидат македонските играчи
2. Да го вратиме можеби најсилниот играч на МЗТ, а тоа е навивачката група „Фемили“, на трибините
3. Да составиме една екипа околу мене која ќе биде составена од поранешни кошаркари и функционери на МЗТ
4. Да направиме реорганизација на младинската школа на МЗТ за во некој период од две до три години првиот тим да почне да црпи играчи од сопствената школа“, рече на почетокот на своето обраќање тренерот Тодоров.
Навивачката група „Фемили“ долго време ги бојкотира натпреварите на клубот, нивното присуство е од непроценливо значење, што беше очигледно минатата сезона, особено на мечевите во АБА лигата.
„Јасно ни е дека едно е да се игра пред ‘Фемили’ и да играш без нив. Јас го имав тоа задоволство, во таа сезона, во помала сала, но имавме полна сала на еден час пред почеток на натпреварот. Тоа е една од целите, но нормално е дека ќе треба да се седне и да се разговара“.
Веројатно една од потешките задачи ќе му биде и да го формира ростерот бидејќи во овој момент МЗТ има само четворица играчи под договор: Симоновски, Мекиќ и Тејмс, односно Дамјан Стојановски, кој синоќа потпиша нов договор откако мината сезона ја пропушти во целост поради повреда.
Тодоров ќе инсистира на домашни играчи, а како што вели, оптимален број странски играчи е четири.
„Оваа година ќе се воведе правилото за двајца домашни играчи на терен. Имам искуство со такво правило во Романија, и со двајца домашни играчи на терен оптимален број на странци е четири до пет“.
Новиот тренер на МЗТ проговори и за евентуалниот ангажман на Војдан Стојановски, кој неколку сезони игра во шпанската лига.
„Тоа би било нешто што сите го посакуваме, но треба да сме реални. Војдан настапува во најдобрата лига во Европа, и тоа што во моментот работам индивидуално со него и со Дамјан не значи ништо. Ние би сакале, но гарантирам дека приоритет му е да остане во Шпанија. Евентуално може да се преговара доколку не најде ангажман, но со начинот на кој играше мислам дека него и догодина ќе го гледаме така“, рече тренерот на МЗТ. н.ц.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.