Daily news
Трамп му се заканува на Коми
Претседателот Доналд Трамп му упати напишана закана на отпуштениот директор на ФБИ, Џејмс Коми, во услови на бура од протекувања што и противречат на Белата куќа.
“Џејмс Коми подобро надевај се дека нема “ленти ” од наши разговори пред да почнеш да ги пушташ во печатот,” напиша Трамп на Твитер.
Синоќа се појавија голем број извештаи кои откриваат дека актуелни и поранешни функционери на ФБИ ја спорат средбата на Трамп со Коми на почетокот на годинава.
Трамп во интервју за Ен-Би-Си во четвртокот изјави дека Коми побарал вечера со него, за време на која го прашал дали сака да остане на функцијата шеф на ФБИ.Претседателот, исто така, рече дека Коми му повторил трипати- два пати во текот на телефон и еднаш на нивната вечерна средба – дека тој не е предмет на било какви истраги на ФБИ.
Но, тоа тврдење беше дочекано со кревање на веѓите во Вашингтон. Претставници на Бирото, во изјавата за новинарите, ги спореа тврдењата на Трамп по неколку точки.Тие тврдеа дека Белата куќа, а не Коми побарала вечера. Поранешен висок официјален претставник на ФБИ изјави дека Коми никогаш не би рекол дека претседателот не е под истрага.
“Две лица кои слушнале што се случило на вечерата, изјавиле за „Њујорк тајмс“ дека Трамп побарал од Коми да му изрази лојалност на вечерата, но бил одбиен од страна на Коми, кој ветил чесност, но не и лојалност.
Различни тврдења има и околу тоа како Белата куќа го објаснила менувањето на Коми. Иако официјални лица првично тврдеа дека разрешувањето е предизвикано од лошото раководење со истрагата за мејловите на Хилари Клинтон, Трамп самиот ја поврза одлуката со истрагата на Бирото околу руското влијание на изборите.
“Кога решив да го направам тоа само си реков „тоа нешто со Трамп и Русија е креирана приказна”, изјави тој за NBC News во интервју што се емитуваше во четвртокот. Дел од истрагата вклучува испитување дали некои претставници од кампањата на Трамп биле координирани со Русија да им помогне да влијаат на изборите.
Коми во јавното сведочење одби да коментира дали претседателот е предмет на истрага. Коми беше широко почитуван и популарен прв човек на ФБИ така што неговото разрешување дојде како удар во стомакот за многумина. Комитетот за разузнавање на Сенатот го покани Коми да сведочи зад затворена врата, но тој одбил. крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.