Daily news
Финска планира да го искорени пушењето
Владата на Финска има амбициозна цел, таа земја да ја направи земја без чад од цигари, и тоа до 2040 година. Надлежните планираат до таа година производите на база на тутун (цигари, лулиња, па дури и е-цигарите) да ги користат помалку од 2 отсто од возрасното население.
Бројот на пушачите во Финска константно се намалува во изминатите години. На пример, во 2013 година пушеле 16 отсто луѓе на возраст од 15 до 64 години, но сега стапија на сила нови мерки.
„Финскиот пристап е револуционерен” – смета Кари Пасо, човек кој се наоѓа на чело на единицата за борба против пушењето во тамошното Министерство за здравје.
„Сите сакаме да се ослободиме од тутунските производи”.
Експертите се согласуваат дека Финска употребила интересен иновативен и креативен пристап за решавање на овој проблем. На пример, наместо да се бори на само еден фронт, пушењето го гледаат од повеќе агли.
Финска не почна да ги промовира е-цигарите или никотинските фластери како средство за одвикнување од пушењето.
„Не сакаме да паднеме во стапица на производи кои се претставуваат како помало зло во однос на цигарите” – вели Пасо и додава дека тие производи само создаваат нови зависници.
Зголемување на цените на цигарите
Експертите се согласуваат дека еден од најдобрите начини за намалување на бројот на пушачите е токму воведување дополнителни даноци. Лицата кои не можат да купат цигари нема да пушат, а тие кои пушат ќе донесуваат пари кои ќе се користат за кампањи и систем за поддршка на луѓето кои сакаат да се откажат од цигарите.
Тоа воедно е и еден од најефикасните начини да се намали побарувачката за цигарите. Доказ е Њујорк, чиј градоначалник во 2010 година воведе посебен градски данок на цигарите. Благодарение на тоа, само 14 отсто њујорчани останаа да пушат во 2016 година.
Исто така, Финска воведе уште една финансиска бариера: ги зголеми трошоците на малопродажните продавници кои продаваат цигари.
„Тие кои сакаат да добијат лиценца и да продаваат цигари мора да платат висока цена” – вели Пасо. Прво мора да се пријави за лиценца и да ја плати, а потоа годишно да ги плаќа и трошоците за излегување на инспекторите на терен, чија задача е да ја проверува примената на правилата. Годишно само тој трошок може да чини до 500 евра.
Општините се задолжени за формирање на цените, но повеќето се одлучија за најскапата варијанта. Така еден синџир од десет продавници мора да плати околу 5.000 евра годишно за контрола, па уште и пари за лиценца.
Без пушење на балкон и во автомобил
Во Финска оваа година луѓето повеќе не можат да пушат на балкон, ниту во автомобил (во случај ако внатре се наоѓа лице помладо од 15 години), што значи дека забраната од јавните површини се сели во приватниот простор.
Сепак, клучот е во превенцијата и Финска планира да ги спречи тинејџерите воопшто да почнат да пушат. Затоа во Финска нема да има ни производи кои имитираат тутун и цигари, па дури ни чоколатцата во форма на лулиња или цигари ќе бидат достапни само под посебни услови.
Жестоките рестрикции се однесуваат и на индустријата на електронските цигари, кои повеќе не можат да се продаваат на малолетници, ниту течноста за нив смее да има кој било друг вкус освен вкусот на тутунот.
Финска не е сама во своите настојувања. Во Австралија, во која една кутија цигари е многу скапа, бројот на пушачите од 2011 до 2014 година се намалил од 16 на 14,7 отсто.
На другиот крај на спектарот е Кина, во која во последните години бројот на пушачите се зголемува, како и болестите кои се поврзуваат со пушењето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.