Daily news
Хан: Договорот за мигрантите со Турција функционира добро
Договорот меѓу Европската Унија и Турција за спречување на приливот на мигранти во западноевропските земји функционира добро, а секојдневните билатерални односи се многу подобри отколку што тоа може да се заклучи од актуелната реторика, нагласи еврокомесарот за проширување Јоханес Хан во изјава за австрискиот јавен радиодифузен сервис ОРФ.
Ваквата изјава на Хан доаѓа само неколку дена откако Германија најави можност за суспензија на исплатата на средствата од ЕУ, што ѝ беа ветени на Турција во рамките на мигрантскиот договор.
Со овој договор Турција го спречи приливот на мигранти од нејзина територија кон Европа во замена за ветената помош од три милијарди евра и укинување на визниот режим за патување на турските државјани во земјите од ЕУ.
– Немам никакви грижи за спроведувањето на договорот за бегалците. Морам да кажам дека секојдневната соработка на голем број полиња функционира многу подобро од она што може да се заклучи според актуелната ректорика и некои турски постапки – нагласи Хан.
Мигрантскиот договор наиде на големо одобрување од страна на Германија бидјеќи најголем број од мигрантите ја избираа оваа земја за своја крајна дестинација. Меѓутоа, односите меѓу Берлин и Анкара во последните месеци спаднаа на најниско ниво, а двете земји меѓусебно се обвинуваат за неприфатливо однесување.
Германија беше особено критички настроена кон Турција во врска со преземените мерки по ланскиот неуспешен обид за воен удар, при што беа уапсени околу 50.000 луѓе, меѓу кои и еден германски државјани кој работи за организација за заштита на човековите права, а речиси 150.000 лица беа суспендирани или отпуштени од работа под обвинение за поврзаност со организаторите на пучот. Во справувањето со пучистите Турција прогласи вонредна состојба, која минатата недела беше продолжена за уште три месеци.
Во врска со турските шанси за членство во ЕУ, Хан во изјавата за ОРФ нагласува дека не гледа потреба од понатамошно продолжување на вонредната состојба додавајќи оти смета дека нејзиното укинување ќе придонесе за подобрување на владеењето на правото во земјата.
Во услови на најавите за укинување на помошта за Турција и одложеното укинување на визниот режим, турскиот министер за надворешни работи, Мевљут Чаушоглу изјави дека Анкара би можела да го преразгледа или суспендира мигрантскиот договор, доколку ЕУ не ги исполни обврските што ги презеде со него.
Реализацијата на мигрантскиот договор се очекува да биде една од главните теми на денешната средба на Чавушоглу и турскиот министер за европски прашања Омер Челик со Хан и високата претставничка на ЕУ за надворешна политика и безбедност Федерика Могерини.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.