Daily news
Хелсиншки: Нелегална депортација на бегалци и мигранти од Македонија во Грција
Полицијата да биде внимателна при превезување бегалци и мигранти, припадниците на МВР да бидат одговорни за безбедноста на сите присутни во транзитните кампови и истите да се опремат со интернет-конекција затоа што тоа е единствен начин со којшто мигрантите имаат пристап до информации и комуницираат со семејствата. Хелсиншкиот комитет за човековите права на Македонија ги истакна овие препораки во своите извештаи во рамки на проектот Help on the Route за периодот од ноември до јануари.
„Македонската полиција мора да постапува според законот и да ги извршува своите овластувања секогаш кога е потребно. Ова се однесува на одговорноста што припадниците на МВР ја имаат кон сите присутни во транзитните кампови. Исто така, полицијата треба да запре со практиката на превезување поголеми групи мигранти во мали возила затоа што таа може да резултира со нечовечки и деградирачки третман. Дополнително, транзитните кампови треба да бидат опремени со интернет-конекција. За мигрантите тоа е единствена можност да се информираат, но можеби и позначајно, да бидат во контакт со своите семејства“, истакнуваат од организацијата.
Хелсиншкиот комитет, исто така, за периодот од ноември до јануари, наведува дека има зголемена појава на нелегална депортација на бегалци и мигранти од Македонија во Грција. Организацијата нагласува дека ова мора да запре и во случаи кога се враќаат назад од земјава, тоа да се прави со почитување на законската процедура и преку соработка помеѓу полициските службеници од двете држави.
И покрај споменатите ситуации, општата состојба со бегалците и мигрантите во Македонија заклучно со јануари е стабилна, без поголеми инциденти. „ Во ноември и декември бројот на бегалци и мигранти во двата транзитни кампови не беше повеќе од 40. Во ноември имаше 125 бегалци од Пакистан, Алжир, Либија, Тунис и Сирија, а во декември 103. И двете групи беа депортирани во Грција. Во јануари 70 лица беа донесени во кампот во Гевгелија во краток временски период, по што беа пренесени во Грција. Околу 20 бегалци беа присутни во транзитниот камп во Винојуг, Гевгелија, но овој број полека се намалуваше. Во транзитниот камп во Табановце, Куманово, бројот на бегалците и мигрантите кои се сместени таму не е поголем од 30“, информираат од Хелсиншкиот комитет.
Организацијата истакнува дека во ноември и декември, полицијата регистрира пет кривични дела поврзани со бегалци, мигранти и криумчари, а во јануари МВР во дневните билтени забележа два случаи поврзани со бегалци и трговија со луѓе. Хелсиншкиот комитет за човекови права нагласува дека бегалците-жртви на криумчари не смеат да бидат задржани во Прифатниот центар за странци како сведоци во постапката против криумчарот. Ова претставува кршење на нивните права и нелегитимно ограничување на нивната слобода на движење.
Наведените препораки се дел од извештаите што Хелсиншкиот комитет го подготвува во рамки на проектот Help on the Route, што има за цел да го крене интересот на јавноста за позицијата и да ја подобри заштитата на човековите права на мигрантите, вклучително и барателите на азил, кои минуваат низ Македонија и Србија. Проектот го имплементира „Фондацијата Ана и Владе Дивац“. Хелсиншкиот комитет за човекови права на Република Македонија е партнер во овој проект заедно со Новосадски хуманитарен центар и Здружение на самарјанските работници. Дел од акцијата се и пет македонски и 15 српски невладини организации кои работат на полето на миграцијата и барателите на азил.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.