Daily news
(ВИДЕО) „Чуварот“ на државната каса, Тевдовски, оди пеш на работа
Непродуктивните трошоци од типот на репрезентации и непотребно трошење средства внатре во Министерството ќе бидат намалени, рече првиот човек на Министерството за финансии, Драган Тевдовски, на денешната средба со новинарите.Тој за пример се посочи себеси, при што рече дека откако дошол на функцијата оди пеш на работа и најави дека во идината за доаѓање на работа нема да користи службено возило.
„Една од првите работи за кои се залагаме е отворено и транспарентно работење, граѓаните ќе имаат јасна претстава за менаџирањето на јавните финансии, а непродуктивните трошења ќе ги сведеме на минимум“, рече Тевдовски.
Една од првите работи што ги направил како министер, како што информираше, е одблокирањето на повратот на ДДВ кон граѓаните.
„Само во првата недела од мандатот се вратени над две милијарди денари по оваа основа. Ветувам дека веќе нема да има доцнење во повратот на данокот на додадена вредност затоа што сметаме дека на овој начин ќе се раздвижи економијата и ќе се подобри бизнис климата“, рече Тевдовски.
Тој рече дека Министерството за финансии во моментов прави анализи на точната сума на доспеани, а неисплатени обврски по што ќе се знае колкава е сумата на скриен долг.Најави дека тој податок во јавноста ќе го соопшти во првите сто дена од мандатот. Тевдовски, исто така, информираше дека во касата затекнал 400 милиони денари или 6 милиони евра на буџетската сметка и 209 милиони на девизната, односно средства кои се преостанати од еврообврзницата.
„Парите од еврообврзницата ќе бидат наменети за сервисирање за враќање на долговите до крајот на годината.Прва поголема сума за враќање кредит има во јануари од 90 милиони евра, но покритични се 2020 и 2021 година, кога треба да се враќа повеќе од една милијарда евра.Затоа нема да преземаме краткорочни решенија за гасење мали пожари туку ќе направиме поширока дебата со експертската јавност како ќе ги решаваме овие прашања“, рече Тевдовски.
Службите во Министерството веќе работат на ребалансот на буџетот, во кој, како што информираше, ќе има средства за корекција на минималната плата, што е една од најавените реформи.
„Со ребалансот на буџетот сакаме да ги исчистиме неефикасните трошења, да видиме колку простор останува за да воведеме некои од мерките кои се предвидени со програмата на владата, како што е зголемување на минималната плата. Во јули веќе ќе треба да се почне и со проекциите за буџетот во 2018 година, во кои ќе бидат имплементирани најголем дел од економските мерки“- рече Тевдовски.
Тој додаде дека во буџетот има доволно пари за сервисирање на тековните трошоци и исплата на плати и на пензии, при што рече дека нема да има зголемување на висината на ДДВ-то ниту, пак, зголемување на придонесите за фирмите.
Нема да прави ниту кратења на платата на административците, ниту, пак, намалување на нивниот број. Посочи дека во Министерството недостигаат најмалку 15 стручни кадри од повеќе области, пред сè од ИТ секторот.
Непродуктивните трошоци од типот на репрезентации и непотребно трошење средства внатре во Министерството ќе бидат намалени, при што за пример се посочи себеси, кој оди пеш на работа, и најави дека ќе го прави тоа и понатаму, осносно за доаѓање на работа нема да користи службено возило.
Г. Д. Мишевска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.