Daily news
Шведскиот писател Хокан Несер ќе го промовира романот „Во окото на свеста“ во Скопје
Организацискиот тим на Фестивалот на европската книжевност „Букстар“ го најавува гостувањето на шведскиот писател Хокан Несер.
Утре, 31 октомври, со почеток во 20 часот во клуб-ресторанот МКЦ ќе биде промовиран неговиот роман „Во окото на свеста“, издание на „Антолог“, кој на македонски јазик го приопшти Сузана Стојановска.
Романот е првата книга од серијалот крими-трилери со ликот на Ван Ветерен, еден од најоригиналните ликови на детективи во скандинавската литература. Ќе го промовира актуелниот добитник на наградата Роман на годината на „Утрински весник“, македонскиот писател Давор Стојановски.
За фановите на скандинавските трилери Хокан Несер би требало да биде во првите пет од листата. Ван Ветерен се соочува со досега невиден случај на убиство. Едно утро Јанек Митер се буди со ужасен мамурлак и открива дека неговата прекрасна сопруга лежи во кадата со главата надолу, мртва. Со недоволно силна одбрана, тој е прогласен за виновен за дело извршено под дејство на алкохол и страст и е затворен во институција за ментално болни.
Сомнежите на инспекторот во врска со идентитетот на убиецот се променуваат кога Митер е пронајден мртов во својот кревет. Ван Ветерен под полна пареа ја започнува истрагата околу двете убиства. Наоѓа мистериозно писмо што Митер го напишал пред смртта. Писмото треба да му помогне да го открие убиецот и да ги пронајде шокантните корени на ова злодело. Минатото никогаш не престанува да ја прогонува сегашноста. Мрачна и загадочна книга, како што може да биде само квалитетен скандинавски трилер!
Брз, циничен, несентиментален, депресивен и душевен, Ван Ветерен е најпривлечниот ужасен херој и затоа ќе го обожавате.
„Од овој прекрасен роман на еден од најистакнатите шведски крими-писатели може да се напише сценарио за филм на Алфред Хичкок“, се вели во рецензијата на „Сандеј тајмс“ за книгата.
Хокан Несер (1950) е еден од најценетите шведски автори на трилер-романи. Студирал хуманистички науки. Дебитирал во 1988 година. Работел како учител до 1998 година, кога решава да продолжи исклучиво со писателската кариера. Живеел во Њујорк и во Лондон. Трипати ја има освоено наградата за најдобра шведска крими-книга. Неговите книги се преведени на повеќе од триесет јазици и се продадени во над петнаесет милиони примероци. Во август годинава на локации во Србија, Словенија, Хрватска и Белгија заврши снимањето на крими-трилогијата филмови на англиски јазик со Бен Кингсли, Бено Фурман и Тува Новотни во главните улоги, снимени по негови книги што ќе бидат објавени следната година.
Читателите ќе имаат поголема можност да го запознаат авторот одблиску и дента на 31 октомври во книжарницата „Антолог“ на улица Димитрие Чуповски бр. 31 во 11 часот, каде што тој ќе потпишува книги и со кафе и разговори одблиску ќе ја запознае својата публика во Македонија.
На 2 ноември во 11 часот во книжарницата „Антолог“ќе се одржи и средба, „упанишад“, со Јуси Адлер-Олсен, на која ќе гостуваат неколку влијателни македонски блогери. Истата вечер од 20 часот во клуб-ресторанот МКЦ ќе се одржи и промоцијата на книгата „Жената во кафез“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.