Daily news
(ВИДЕО) Ѓорѓиевски вети изградба на рекреативен парк „Студена вода“ во Куманово
ВМРО-ДПМНЕ како одговорна политичка партија интересите на граѓаните секогаш ги става во прв план. Секогаш работа, секогаш Куманово, секогаш Македонија е она по кое ВМРО-ДПМНЕ е препознатливо, изјави денеска кандидатот за градоначалник на ВМРО-ДПМНЕ и коалицијата за општина Куманово, Зоран Ѓорѓиевски.
Тој вети изградба на комунална инфраструктура на целата територија на Куманово во период од 4 години, асфалтирање на улици и тротоари, водовод и канализација и улично осветлување.
„Да го претвориме Куманово од највалкан и најнеурбанизиран град, во модерна и урбана средина за пристојно живеење на граѓаните на Куманово“, вели Ѓорѓиевски, кој смета дека приоритет треба да биде решавање на постојните проблеми со водоснабдувањето во општина Куманово.
Тој вети и отворање на ТИРЗ зона во непосредна близина на коридор 10 во Куманово, со што главниот проблем на Куманово, а тоа е акутната невработеност со бројка од 19.600 невработени, ќе биде едно од главните решенијата за успешен напредок во градот и значително намалување на невработеноста. Исто така, вети и изградба на рекреативен парк„ Студена вода“, во вредност од 500.000 евра, во кој ќе бидат опфатени објекти со културни, спортски и угостителски содржини на површина од 10 хектари, со трим-патеки за трчање и рекреација, со патеки за пешачење во локалната шума, која се простира на површина од 25 хектари. Паркот ќе опфаќа и патеки за велосипедизам, мултифункционално игралиште и реконструкција и изградба на локалниот пар до локалитетот, со клучка од патот Куманово-Св.Николе во должина од 800 метри.
Тој смета дека е потребно да се изработи нов развоен ГУП, со сообраќајно решение кое ќе биде во тек со идниот развој на Куманово и неговата околина, потоа изградба на нови сообраќајни решенија, нови кружни текови и други компатибилни решенија во градот, вети изградба на градинки и на 3 нови училишни спортски сали, на 50 мини детски паркови во општина Куманово и на нов средно училишен центар со дислокација на постојниот сместен во просториите на дирекција ЗИК – Куманово, со тоа на децата од средношколска возраст од албанска националност да им овозможи побезбедно учење.
Во план е и нова меѓуградска автобуска станица, изградба на повеќенаменски спортски игралишта во с. Пчиња, с. Режановце, с. Биљановце, нас. Карпош и Агино село, изградба на нов зелен пазар во населба Гоце Делчев, формирање канцеларија за помош на инвеститори и реконструкција на фасади на објекти во централното градско подрачје.
„Граѓаните знаат дека ВМРО-ДПМНЕ сè што ветува и остварува. Граѓаните знаат кој работи за нивната доверба, кој работи за нивно добро и кој работи за подобро утре за Куманово. Работата е наша одлика. Секогаш работа, секогаш Куманово, секогаш Македонија! Нашето мото е ‘Бидете дел од новата ера’, заокружите број 13 за подобро утре, за подобро Куманово“, изјави Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.