Daily news
„Јадран филм“ реагира: Ќе тужиме, парите ни се незаконски одземени
Во врска со информацијата дека првите 300 илјади евра државни пари се одземени од хрватската продукција „Јадран филм“ како последица на неисполнувањето на договорот за производство на играната серија „Македонија“, реагира продукцијата „Јадран филм“ односно Винко Грубишиќ.
Тој тврди дека не станува збор за постапка согласно Закон како што тврди в.д. директорот на Агенцијата за филм, Горјан Тозија.
„Блокирањето на средствата на наменската сметка на „Јадран филм“за проектот „Македонија“ не е резултат, ниту пак е врз основа на некои истражни дејствија или барања од страна на Финансиската полиција или Јавното обвинителство. Напротив, станува збор за незаконско активирање на Извршната клаузула која стои во Договорот потпишан меѓу Агенцијата за филм и продуцентот. Станува збор за донесување на незаконска и самоиницијативна одлука од страна на в.д. директорот на Агенцијата за филм, Горјан Тозија, кој без Одлука на Управниот одбор на Агенцијата донел еднострана Одлука за раскинување на Договорот, која што Одлука по закон а и по Договор треба да ја потврди Управниот Одбор на Агенцијата“, пишува Грубишиќ во соопштението до јавноста.
„Јадран филм“, како што пишува Грубишиќ поднел тужби пред судовите во Република Македонија.
„Имаме валиден финансиски и ревизорски Извештај со кој се потврдува законското и наменското трошење на средствата поткрепен со соодветна документација. Финансискиот извештај и Ревизорскиот извештај во прилог со целокупната пропратна документација како и другите докази од страна на релевантни и стручни лица ќе бидат проследени до сите надлежни и релевантни институции во државава“, стои во соопштението.
Грубишиќ повторува дека понудил гранција на 25 септември за секој денар што го добил од државата. Според законот банковната гаранција, продукцијата требала да ја достави кога бил потпишан договорот, а епизодите од серијата да бидат доставени до 4 септември.
„ Доколку не е доволна нашата понуда за двострука финансиска гаранција за секој денар, која ја доставивме на 25.09.2017г. (во име на фирмата и лично, во прилог) воедно го користам ова соопштение да ја известам јавноста дека како матична фирма Јадран Филм Загреб овие средства во висина од 300.000,00 евра кои Тозија привремено а нелегално ги одзема, ќе ги инвестира од сопствени средства и ќе продолжи со снимањето на историскиот дел. Дали е уште нешто дополнително потребно да се докажат нашите намери, како и намерите на Горјан Тозија? Од каде е правото на Горјан Тозија да од Владата на РМ и од македонската јавност полни два месеца ја крие понудата за двострука финансиска гаранција? Треба да се запрашаме, доколку тоа што го говори Тозија е вистина, дали Јадран Филм дооел би ги чувал тие средства на својата сметка, и дали Тозија може противзаконски да ги одземе?“.
Грубишиќ, како доказ до македонските надлежни институции ја доставил пораката со извесен Борис Грегориќ која претходно беше објавена во македонските медиуми.
“Од неа сосема јасно се гледа дека средствата ги чувавме на сметката за снимање на историскиот дел и како такви според планираната динамика на буџетот и планот на снимање имавме намера тие да останат таму се до почетокот на снимањето на историскиот дел за што веќе се договорија Грегориќ и Тозија. Доколку Јадран Филм имаше било какви лоши намери, можеше тоа да го направи во било кој момент претходно. Тозија после неуспешниот рекет се реши за измама и сега се фали како успеал да ги ”врати” парите. И тоа баш парите наменети за снимање на историскиот дел на серијата. Сепак ние не сме Тозија за да за приватни потреби да злоупотребуваме државни пари. Од документот кој Ви го испраќаме сосема јасно се гледа дека Тозија и сега а во врска со ова ја манипулира целата јавност со провидни и евтини лаги. Покренавме судски постапки за поврат, но и за надокнада на штетата што ја предизвика Тозија“, пишува тој.
Нарекувајќи го повеќе пати директорот на Агенцијата за филм рекетар, Грубишиќ вели дека серијата ќе ја сними а правдата ќе ја бара во интитуциите и на крајот ќе достави финансиски извештај за секој потрошен денар.
„Макфакс“ продлжува да ја истражува приказната. До нашата редакција добивме е-пошта од филмски работник, кој тврди дека неговиот потпис бил фалсификуван за наводен договор за соработка со серијата „Македонија“. Повеќето од ангажираните на серијата, тврдат дека биле исплатувани во кеш.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.