Daily news
Ја запознал како наставничка, , а сега е на праг да ја направи прва дама на Франција
По вчерашниот прв круг од претседателските избори во Франција, се поголеми се шансите следните жители на Елисејската палата да бидат најмладиот претседател на Франција во модерната историја и неговата 25 години постара сопруга.
Сопругата на Емануел Макрон, кој што победи во првиот круг од претседателските избори е Брижит Троње, која е поранешна наставничка по драма и има 64 години.
Брижит Троње е 25 години постара од својот сопруг, а се запознале кога тој имал само 15 години во приватното средно училиште каде што Макрон учел.
Младиот Емануел се заљубил во Брижит, која што тогаш била мажена и имала три деца. Тој сакал книжевност и глумел во школските претстави во драмската секција која што ја водела Брижит.
– Не беше како останатите, не беше тинејџер. Со возрасните имаше однос на исто ниво како нив, изјави Брижит Троње во документарен филм снимен минатата година.
Во тоа интервју, таа објаснува како еден ден Макрон дошол кај неа со план за заедно да напишат претстава за матурантите.
– Не ни помислував дека работите ќе одат до таму. Мислев дека ќе му стане досадно. Пишувавме и малку по малку ме освојуваше интелегенцијата на тоа дете, вели Брижит Троње.
На 16 години, Макрон заминува од неговиот град и се сели во Париз да го продолжи неговото образование, а тогаш ѝ ветил на неговата наставничка дека ќе ја ожени.
– Што и да направиш, јас ќе се оженам со тебе, рекол тинејџерот, а потоа тоа и го остварил.
Кога започнале гласините дека помеѓу нив двајца постои нешто, родителите го испратиле на престижен културен клуб во Париз, меѓутоа нивната љубов го преживеала и тоа, па неколку години подоцна, кога Емануел имал 30 години, застанале пред олтарот.
– Си се јавуваме еден на друг постојано и поминувавме часови на телефон. Малку по малку, го победи целиот мој отпор на неверојатен начин, со стрпение, наведува професорката.
Брижит го напуштила својот сопруг и влегла во врска со својот поранешен ученик, а нивната свадба била во 2007. година.
– Макрон сака да покаже дека ако можел да заведе жена која што е 25 години постара од него и мајка на три деца, може да ја освои на Франција на истиот начин, вели Фулда, биографон на Емануел Макрон.
Откако синоќа беа објавени резултатите од првиот круг од претседателските избори во Франција, Макрон заедно со неговата сопруга се појави на бината и го оддржа победничкиот говор. Тие двајца често може да се забележат заедно во јавноста и може да се каже дека доколку Макрон победи, првата дама ќе има важна улога.
– Таа отсекогаш била дел од мојот живот и ќе биде тука. Ѝ должам многу бидејќи таа допринесе да станам тоа што сум денес, изјави Макрон во едно интервју.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.