Daily news
Aнализа за почетокот на летната туристичка сезона
Туристичко-угостителската комора на Македонија (ТУК) излезе со анализа пред почетокот на летната сезона, во која вели дека дел од аранжманите се продадени. Тоа е резултат на создадената навика кај граѓаните за неколкумесечна предвремена резервација на летните одмори и поради вклучениот попуст што го даваат агенциите.
„На прагот на летната сезона дел од македонските туристи веќе имаат одлучено и резервирано аранжмани за ова лето. Тоа го направиле уште на крајот на минатата година, поради актуелните попусти кои се нудат со раната резервација. Сепак, како резултат на случувањата и неизвесноста поголем дел од граѓаните сè уште не се одлучиле каде ќе летуваат годинава и термините за одмор ги добиваат подоцна во текот на сезоната. Тогаш, застапена е побарувачката ‘Last Minute’, која е поволна, но изборот е сведен на минимум и дефинитивно кога станува збор за заштеда на семејниот буџет, многу попристапни се раните резервации. Туристичката понуда за оваа летна сезона е различна, од вообичаените аранжмани за Грција, Турција, па сè до понуди за Азурниот Брег, Шпанија, Малдиви, Сејшели, Маурициус, Бали, Куба и други поегзотични и нетрадиционални дестинации. Најбарани се аранжманите за Грција и Турција со анталискиот регион. Добрата организираност, високиот квалитет на услугата во хотелите, морето и поволната клима се секогаш причини поради кои Турција се бара и посетува. Годинава цените за Турција се многу поволни и се движат од 299 евра по лице вклучувајќи и авионски превоз, хотел со пет ѕвезди“, вели Аркан Керим, претседател на Туристичко-угостителската комора при ССК.
Од ТУК очекуваат поради близината и актрактивноста Грција и годинава да биде најпосетена дестинација за македонските туристи.
„Согласно сегашниот тек за претстојната летна сезона, Грција останува најбарана дестинација. Македонските туристи знаат што да очекуваат со уплатата на аранжманот, цената си го носи и квалитетот зависно дали хотелско или апартманско сместување, а секако и дестинацијата. Застапеноста е поголема за поблиските места, а често граѓаните одат и на проверени дестинации, онаму каде летувале, и тоа го прават години наназад. За пред и по сезона има голема заинтересираност поради тоа што се работи за поевтини понуди и се случува граѓаните да одат и по двапати на одмор. Во екот на сезоната интересот е голем за островите во Грција, особено од помладата популација. Како агенција работиме на зголемување на понудата, последните години хит дестинации се островите Скијатос, Лефкада, Амулијани. Што се однесува до цените, има мали поместувања нагоре, но долгогодишното партнерство влијае да не се зголемат цените кон нас, квалитетот и услугата да останат исти, а ние понатаму остануваме коректни и можеме да понудиме прикладни цени и кон домашните туристи “, изјави Александар Чоневски, првиот човек на „Игуана травел“.
Во последните неколку години туристите кои сакаат да излезат од класичниот одмор пројавуваат интерес и за далечните дестинации, како Дубаи и другите Емирати, Рас Ал Кајам, Ајман и, секако, за Куба, Малдиви, Занзибар и други егзотични дестинации, како и за крстарења.
„Овие дестинации стануваат сè поатрактивни за нашите патници, како замена за класичен одмор од седум до десет дена само на едно место. Посебно оваа година, поради цената, атрактивни се понудите за одмор во Египет и Тунис и за дестинации како Крит и Родос. Покрај веќе познатите дестинации, кои ги нарекуваме еден вид традиционалните одмори, она што ние ексклузивно го нудиме е летување во Обединети Арапски Емирати, кое почнува од јули поради достапните летови од Скопје до прекрасни плажи и хотели со вистински 5 ѕвезди. Нашата понуда е за Рас Ал Каимах, Шаржа, Ажман, а веќе е достапна за секого, притоа имајќи ги предвид фамилијарните одмори во хотел, две деца може да летуваат гратис. Летување на некоја од егзотичните дестинации без визи и со прифатливи цени како Занзибар, Бали, Шри Ланка, Куба се само дел од нашата богата понуда“, изјави Мимоза Конеска-Каимовски, генерален менаџер на „Војажер“.
Според ТУК, годинешната летна туристичка сезона, согласно првичните проценки кои се направени, има мали осцилации поради влијанието на политичката криза. Но, се очекува стабилизација на пазарот
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.