Daily news
Google во тајност „ја ослободи“ вештачката интелигенција AlphaGo
Програмерите на компанијата Google признаваат дека таинствениот „мајстор“ во древната кинеска играта Го, кој последните неколку седмици ги победи стотиците најдобри играчи во онлајн игрите, всушност е вештачката интелигенција AlphaGo, пишува во понеделникот агенцискиот оддел на списанието Nature.
„Јас лично мислам дека тоа е одлично, дека луѓето одиграа цела серија игри со AlphaGo, која сега може внимателно да се проучи и да се ревидира. Тие имаат мноштво крајно неочекувани и свежи потези, кои се многу интересни за нас“, вели Нејл Кардин, професионален играч на Го, кого го цитира Nature.
Кон крајот на декември 2016 година во двата најголеми и најпопуларни система за онлајн игри Tygem и FoxGo, се појави нов играч на Го, кој себеси се нарече „Master(P)“. Тој победи неколку десетици многу силни мајстори на играта и стана предмет на широка дискусија на форумите, посветени на оваа древна кинеска игра.
Откако овој „дрзок дојденец“ го победи познатиот мајстор на играта Гу Ли, идентитетот на Master(P) стана уште популарен, откако поразениот Кинез вети дека ќе му плати 100.000 јуани, околу 15.000 американски долари, на оној кој ќе го победи неговиот противник.
Master(P) потоа одигра уште 50 игри, и само една од нива заврши без победник поради технички причини. Анализирајќи ги игрите, поразениот кинески мајстор почнал да се сомнева дека нивниот противник, веројатно, не е човек, туку систем од напредна вештачка интелигенција.
Ваквите сомневања се потврдија на почетокот од јануари, кога Демис Хасабис, еден од креаторите на системот AlphaGo, призна на својот микроблог дека играчот Master(P) всушност е нивниот систем на вештачка интелигенција.
Ваквото тајно тестирање на вештачката интелигенција „во живо“, како што појасни Хасабис кој беше прогласен за човек на годината според научните списанија Science и Nature, претставува подготовка за лансирање на новата верзија на AlphaGo, којашто повторно ќе се соочи со најсилните играчи на Го уште оваа година.
Системот на вештачката интелигенција AlphaGo беше развиен од Дејвид Силвер и неговите колеги од одделот DeepMind на компанијата Google, чие седиште е во Лондон кон крајот на 2014 година и неговото функционирање беше тестирано од шампионот на Европа, Фан Хуи, кој ги загуби сите пет мечеви со машината. Во март минатата 2016 година, AlphaGo го победи светскиот шампион во Го, Ли Седол, во серијата од пет мечеви од кои само еден заврши со победа на човекот.
Успехот на Силвер и неговите колеги се темели на тоа што тие наместо една успеале да вградат две невронски мрежи во својата вештачка интелигенција, специјални алгоритми кои ја имитираат активноста на веригите од неврони во човечкиот мозок. Едната од нив е одговорна за процената на моменталната позиција на таблата, а втората ги користи резултатите од анализата подготвена од првата мрежа, за да го избере следниот потег.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.