Daily news
Mинистерството за одбрана транспарентно ќе објавува информации од јавен интерес
Определбата на Владата за транспарентност нема да го заобиколи Министерството за одбрана, туку напротив, целта е да се покаже дека ова министерство во некои чекори може да биде дури и понапред од другите, истакна министерката за одбрана, Радмила Шекеринска, за време на денешната прес-конференција.
„Во МО и понатаму ќе има доверливи и класифицирани информации, но исклучиво оние поврзани со безбедносните интереси на државата. Такви не можат да бидат трошењата на министерот или раководната структура, услугите, јавните набавки итн. Граѓаните мора да можат да ја добијат информацијата за тоа како се трошат и за што се трошат нивните пари. Транспарентноста во работењето ја гледаме како една од главните алатки за борба против корупцијата, а одговорното работење не го гледаме како право, туку обврска за сите нас. Затоа во Министерството за одбрана започнавме со спроведување на принципите на т.н. активна транспарентност. Принципи кои се содржани во Програмата за работа на владата, а според кои институциите треба да ги споделуваат информациите дури и пред истите да бидат побарани од страна на граѓаните, невладините организации, медиумите, во поглед на лесен пристап до програмите, стратегиите, буџетот, организацијата и трошоците во работењето“, посочи Шекеринска.
Таа додаде дека Министерството за одбрана не само во Македонија, но особено во земјава, се сметало за едно од традиционално најзатворените министерства поради природата на работа, но и поради таквата политичка волја.
„Зад параванот на класифицирани информации важни за безбедноста на државата во минатото се криеја потези кои значеа криминал, злоупотреба на средства, лагодно однесување од страна на раководителите во Министерството, па дури и манипулации. Во име на законската потреба од класифицираност околу споделувањето информации за суптилни безбедносни прашања се правеле манипулации кои оделе директно на штета и на безбедноста на државата, но и на буџетот на Република Македонија. На таа практика ѝ дојде крајот“, рече Шекеринска и додаде дека од овие причини, за првпат во МО е донесен Правилникот за транспарентност во работата со кој Министерството се обврзува да биде максимално транспарентно кон јавноста.
„Министерството за одбрана за првпат јавно објавува серија документи – почнувајќи од документите поврзани со своето материјално финансиско работење, практичните информации за граѓаните до кои тие досега тешко можеа да дојдат и мораа да минуваат низ доста комплицирана бирократска процедура. Информациите за сите заинтересирани ќе бидат достапни без да се доставуваат барања по Законот за слободен пристап до информации, а дека ќе бидат постојано ажурирани гарантира Правилникот за транспарентност во работењето на МО, којшто ги обврзува секторите веднаш штом се сличи промена во стратешките документи, во подзаконските општи акти или кој било од другите документи да бидат веднаш достапни на веб-страницата на Министерството“, рече Шекеринска.
Таа дополни дека на веб-страницата на Министерството е отворена опцијата „Јавноста има право да знае“ каде што се ставени голем број информации кои за првпат се достапни до јавноста и со кои Министерството се отвора кон граѓаните, а тука спаѓаат законите и општите подзаконски акти, стратешките документи, буџетот на Министерството, но и анкетните листови на министерот и заменикот-министер, како и платите на целокупната раководната структура на Министерството, Армијата и воената академија, коишто работат во состав на Министерството за одбрана.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.