Daily news
Некои момченца од епрувета подоцна може да имаат проблеми со плодноста
Некои момченца зачнати со потпомогнато оплодување може подоцна во животот да создаваат помалку сперматозоиди и да имаат повеќе проблеми со плодноста отколку врсниците зачнати на старомоден традиционален начин, покажува едно ново холандско истражување чии резултати се објавени во списанието Human Reproduction.
Научниците испитувале група од 54 мажи зачнати со методата на инфрацитоплазматска инјекција на сперматозоиди (ICSI), техника развиена во 1990-те години за да се лекуваат случаите кога неплодноста на двојката била поврзана со проблемите со сперматозоидите.
Во споредба со контролната група мажи зачнати по природен пат, групата зачнати со техниката ICSI имала многу помала просечна концентрација на сперматозоиди, помал вкупен број сперматозоиди, како и помал број подвижни и активни сперматозоиди.
„Оваа студија укажува на тоа дека третманот со ICSI на тешкиот машки фертилитет може да води до истата состојба која ја има таткото. Некој за тоа треба да ги извести двојките“, вели коавторот на студијата Андре Ван Стејртегем од Центарот за репродуктивна медицина на универзитетот Врије во Брисел.
Пред да биде достапна техниката ICSI, двојките кои биле неплодни поради проблемите коишто ги имал мажот со сперматозоидите можеле да зачна единствено со помош на ин-витро оплодување со донирани сперматозоиди, потсетува Ван Стејртегем. Со техниката ICSI лекарите сега можат да ги подготват сперматозоидите и да оплодат јајце клетка со само најздравите сперматозоиди и потоа оплодената јајце клетка да ја всадат во матката.
За мажите кои се неплодни тоа значи дека лекарите може да ги издвојат најквалитетните сперматозоидите и да го осигурат оплодувањето наместо да ги препуштат таквите сперматозоиди на неизвесниот пат до јајце клетката без дополнителна помош.
Мажите зачнати со методата ICSI опфатени со истражување биле на возраст на возраст од 18 до 22 година и меѓу првите се родени со оваа техника. Имале речиси преполовена концентрација на сперматозоиди и значително помал број сперматозоиди, како и намален на подвижни сперматозоиди во споредба со врсниците зачнати по природен пат, покажува студијата.
Поради тоа што синовите може да ја наследат неплодноста, резултатите од оваа студија не претставуваат потполно изненадување, истакнуваат авторите на истражувањето.
Иако податоците од ова истражување покажуваат дека квалитетот на спермата на мажите родени благодарејќи на методата ICSI се многу полоши, од резултатите на автоматските не произлегува дека момченцата зачнати со таа метода се помалку плодно како и нивните татковци, вели Алан Пејси, научник од британскиот универзитет Шефилд коментирајќи го истражувањето во коешто не учествувал./крај/мф/сн
Извор: FoxNews
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.