Daily news
Откриен генот одговорен за раст на белите влакна
Меѓународната група научници успеала точно да го одреди генот одговорен за растот на побелената коса, наречен IRF4, а откритието би можело да резултира со откривање нови начини коишто ќе го одложат или спречат овој природен знак на стареењето, според студијата објавена во списанието Nature communications.
Групата меѓународни научници открила и дека процесот на настанување на побелените влакна не е последица од стрес, консумирање премногу алкохол, уживање во никотин, изложување на сонце или недостиг од витамини, како што досега се веруваше, туку е одреден со генетското наследство, па во иднина би можеле наместо заминување на фризер да се одлучиме за генетска манипулација.
Научниците од 6.000 лица од различни раси земале примероци од ДНК. Утврдиле дека генот IRF4 го одредува пигментот за природната боја на косата, кожата и очите и се наоѓа во хромозомот шест. Малку е веројатно дека IRF4 е единствениот ген кој влијае врз процесот на растење на побелена коса, но на научниците им ја дава можноста за нови истражувања.
„Откривме алела (варијанта на ген која често го одредува настанувањето на различните наследни карактеристики), која е предиспозиција за појава на побелената коса“, појаснува за AFP др. Костуб Адикари, кој го спровел истражувањето со колегите од Јуниверзити колеџ од Лондон.
„Од претходно знаевме на кој начин некои гени влијаат врз процесот на губењето на косата и на бојата на косата, но првпат идентификуваме ген кој е одговорен за настанувањето на побелените влакна. Алелата одговорна за побелената коса е забележана првенствено кај Европејците. Просечната средна животна возраст за појавата на побелените влакна кај белците е околу 35-та година од животот, кај Азијатите околу 40-та, а кај потомците од црната раса околу 45-та“, вели др Адикари.
Генот IRF4, претходно им беше познат на научниците бидејќи учествува во производството и таложењето на меланинот, пигментот кој настанува со ензимска оксидација на тирозинот. Меланинот се создава во меланоцитите во кожата, очите и косата, поради што влијае врз нивната боја. Неговиот недостиг во кожата резултира со појава на албинизам.
Бојата на косата настанува во меланоцитите сместени во фоликулата или во коренот на косата. Со годините, меланоцитите престануваат да произведуваат пигмент и косата ја губи природната боја и побелува.
„Сознанието за тоа на кој начин IRF4 влијае врз појавата на белата коса би можело да го измени овој природен процес, бидејќи ќе ја разгледаме можноста за манипулација со тој ген за да го забавиме процесот“, појаснува Адикари../крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.