Daily news
Трикови за позитивни мисли
Ништо во светот не е добро или лошо само по себе. Со нашето размислување сами го правиме такво, е позната мисла на Вилијам Шекспир.
Психолозите истакнуваат дека среќата е исклучиво работа на одлука и избор, а не нешто што е условено со надворешните околности. Значи, секоја ситуација е токму таква каква што ја набљудуваме – сама по себе не е ниту добра ниту лоша. Со други зборови, негативното однесување може да се чини како логично решение и реакција, но тоа не значи дека мора да го усвоиме.
Не е лесно да се биде оптимист и постојано да се гледа на позитивната страна на животот, но, со малку пракса и ментален тренинг, тоа е можно.
И покрај распространетото мислење, оптимистите не се наивни луѓе кои го набљудуват светот низ розови очила. Треба да се биде реалистично оптимистичен, велат експертите.
„Многу луѓе мислам дека луѓето кои размислуваат позитивно ги гледаат само добрите страни и игнорираат се останато. Сепак, доколку одите во таа насока и тоа не е добро. Реалистичните оптимисти, всушност, се свесни и за негативните страни, но одлучиле својата енергија да ја фокусираат на оној дел од животот кој ќе им донесе позитивни чувства и резултати“, појаснува Џофри Суприна, психолог од американскиот Универзитет Аргоси.
Разликата меѓу песимистите и оптимистите лежи во тоа на кој начин ја доживуваат околината. Суприна појаснува како оптимистите автоматски ги одбиваат негативните мисли.
„За повеќето негативни мисли кои се појавуваат воопшто не сме ни свесни. Луѓето кои размислуваат позитивно се свесни за овие мисли и тие ги диригираат – не дозволуваат да ги повлечат во „зајачката дупка на негативност“, туку ги трансфмориаат“, појаснува тој.
За да постигнеме состојба на умот во која можеме да бидеме оптимисти, мора да се ослободиме од потребата да судиме некому.
„Нашето општество има тенденција пребргу да им дава етикети на одредени појави, личности или настани. Потребно е да се разбере дека тие негативни мисли се само мисли и дека тие не се репрезент за реалната состојба на работите“, вели Суприна.
Тој советува:
„Хранете ја вашата позитивност. Медитирајте, пишувајте, водете дневник, поминувајте време со пријателите и семејсвото. Позитивните чувства даваат позитивни мисли“.
Негативните ситуации и негативните луѓе најмногу влијаат на нашата состојба на умот, а стресот е всушност заразен – колку повеќе е околу вас, тоа повеќе и вие ќе бидете изложени и подложни на негативни мисли.
Од друга страна, бројни студии покажаа дека и среќата е заразна. Потрудете се околу вас секогаш да има луѓе кои внесуваат ведрина, топлина и позитивни чувства во вашиот живот, советува Суприна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.