Министерот за земјоделство, шумарство и водостопанство, Љупчо Николовски, одржа работен состанок со претставници на винарските визби и со лозарите. Темата на состанокот беше моментната состојба во лозарството и винарството, со посебен акцент на претстојната берба и откуп на грозјето.

Притоа министерот Николовски потенцира дека субвенциите за лозарството од Програмата за финансиска поддршка за 2017 година, со која 10 отсто беше зголемена основната субвенција, се во целост исплатени навреме пред почетокот на новата производствена сезона. За одржување лозови насади исплатени се над 745 милиони денари и за дополнителните субвенции од 2 денара за предадено грозје, односно над 134 милиони денари.

Откупеното грозје од реколтата 2017 од страна на винарските визби е целосно исплатено. Просечната откупна цена на винското грозје во 2017 година е 13,67 денари за килограм, што претставува зголемување од 11,5 отсто во споредба со 2016 година кога била 12,27 денари за килограм. „Ова е највисоката просечна откупна цена во последните шест години. Оваа година се очекуваат повисоки откупни цени на грозјето, пред сè поради зголемената побарувачка на глобалниот пазар. Винарските визби немаат резерви и најавуваат откуп од речиси 143 милиони килограми“, велат од Министерството.

Според процените на МЗШВ и на винарските визби, оваа година се очекува да биде поволна од аспект на извозот и вредност на извозот ако се има предвид дека заклучно со април годинава вкупниот извоз на вино од Македонија бележи пораст од 8 отсто од количина и 11 отсто од вредност, а просечната цена од единица мерка бележи пораст од 3 отсто во споредба со истиот временски преиод во 2016 година.

Вицепремиерот задолжен за економски прашања, Кочо Анѓушев, се сретна со претставниците на синдикатот на компанијата, фабриката за цевки „11 Октомври“ од Куманово, кои денес протестираа барајќи остварување на работничките права загарантирани со позитивните законски прописи.

Вицепремиерот посочил дека компанијата е во приватна сопственост и Владата може да креира политики и да предлага закони, а за непримена на законите одлучуваат судските инстанци.

„Владата ги поддржува вработените во фабриката за цевки ’11 Октомври’ од Куманово во остварувањето на нивните работнички права во согласност со позитивните законски прописи што важат во Република Македонија. За време на средбата посочивме кои се законските надлежности на Владата бидејќи сите проблеми не може да бидат решени само со протест пред Владата. Побаравме трпение од работниците и ќе ги охрабриме надлежните институции да го завршат својот дел од работата. Инспекторатот за труд веќе постапи во согласност со своите надлежности, а и сите други институции ќе ја завршат својата обврска во согласност со законските прописи“, посочи Анѓушев.

Тој додаде дека Владата ќе се заложи за забрзување на постапката за формирање државната комисија за одлучување во втор степен во областа на инспекцискиот надзор и прекршочната постапка од страна на Собранието.

Вицепремиерот Анѓушев ги повика сопствениците на фабриката да покажат разбирање кон потребите на работниците и да ги почитуваат законите во делот на работничките права.

Министерството за земјоделство, шумарство и водостопанство реагира по одлуката на Косово за зголемување на царината на 30 отсто за одредени земјоделски производи. Од Министерството велат дека со тоа Косово ги прекршува ЦЕФТА-договорот и нивната спогодба за стабилизација и асоцијација со Европската Унија.

Оттаму најавија дека во текот на денот ќе испратат дописи до ЦЕФТА, ЕУ и до ;инистерството за трговија и индустрија на Косово со кои ќе информираат за прекршувањата и ќе побараат итно повлекување на одлуката.

„Очекувам дека одлуката ќе биде повлечена. Ако тоа не се направи во најкраток временски период, ние ќе го заштитиме нашето домашно производство – ова е нашиот приоритет. Ние од страна на Косово не сме консултирани во овој процес, јас се надевам на дијалог и на разумност од страна на Косово, оти веќе Владата има усвоено меморандум со нивното министерство за земјоделство“ – изјави министерот Николовски.

Производи што  најмногу би биле  погодени од оваа одлука во овој период се доматите, пиперките и сливите. Во моментот се анализираат точните податоци, вкупниот извоз во Косово за 2017 е околу 6 милиони евра, а во првите шест месеци од годинава 2,5 милиони евра. Увоз на земјоделски производи од Косово нема. Во одлуката го нема грозјето и други стратешки производи. МЗШВ е во контакт и со другите министри од регионот и ќе преземе заеднички мерки и политики.