Просечната месечна исплатена нето-плата по вработен, во март 2022 година, изнесува 31.080 денари, согласно податоците на Државниот завод за статистика. Ова значи и реализација на клучно ветување за просечна месечна нето-плата од 30.000, што веќе евидентирано ја надминува поставената цел. Во однос на март 2021 година, истата е зголемена за 10,1 отсто или за 2.863 денари.

Согласно статистика, ваквото зголемување се должи, пред сè на зголемувањето на просечната месечна исплатена нето-плата по вработен во секторите: Финансиски дејности и дејности на осигурување (21.4 %), Уметност, забава и рекреација (20.2 %) и Објекти за сместување и сервисни дејности со храна (19.5 %).

Податоците на Државниот завод за статистика го потврдија трендот на раст на платите кој е резултат на економските мерки и политики што ги спроведува Владата. Доколку последниот податок го споредиме со март 2017 година кога просечната плата била 22.445 денари, разликата е 8.635 денари.

Владата и во услови на најголема светска криза, продолжува со засилена динамика, да носи мерки во интерес на граѓаните. Минималната плата е зголемена на 18.000 денари, пензиите доживеаја историски највисок раст, а невработеноста е исто така на историски најниско ниво. Владата со сите засегнати страни низ дијалог, креира методологии со кои платите и пензиите, ќе продолжат континуирано да растат.

Министерството за труд и социјална политика известува дека во тек е исплатата на образовниот додаток за трет мерен период за учебна година 2021/2022 година во која се опфатени вкупно 32.403 корисници на ниво на држава.

Исплатата на додатокот за образование се врши во четири мерни периоди, и тоа: за првиот мерен период во текот на месец декември во тековната календарска година, за вториот мерен период во текот на месец февруари во наредната календарска година, за третиот мерен период во текот на месец мај во тековната календарска година и за четвртиот мерен период исплатата се врши во текот на месец јули во тековната календарска година.

Висината на додатокот за образование за ученици во основно училиште изнесува 737,00 денари месечно, односно 2.211,00 денари по мерен период. Висината на додатокот за образование за ученици во средно училиште изнесува 1.053,00 денари месечно, односно 3.158,00 денари по мерен период.

Заменик-претседателот на Владата за економски прашања, координација на економските ресори и инвестиции, Фатмир Битиќи, денеска беше дел од тркалезна маса со поголем број  претставници од данските индустрии и директорот на „Дански индустрии“, Јенс Холст Нилсен.

Целта за организирањето на тркалезната маса е презентација на поволностите и бизнис-климата за инвестирање во Северна Македонија, зајакнување на бизнис-врските помеѓу двете земји, како и можностите за nearshoring за данските компании. Во фокус беа темите за енергетика и преработувачката индустрија.

Вицепремиерот Битиќи упати порака кон присутните дека Северна Македонија е доверлив партнер на инвеститорите и дека тие можат да сметаат на отворена врата и помош при нивните одлуки за инвестирање во нашата земја.

Во текот на денешниот ден, втор од бизнис-посетата на вицепремиерот Битиќи, се сретна и со Филипе Волот, директор на Данске банк, која е најголема банка во Данска која работи во нордиските земји, но и пошироко. Се разговараше за можностите за финансирање на инфраструктурни проекти, енергетика и образование, како и размена на искуства за онлајн банкарство.