На глобалниот пазар на паметни телефони минатата година е забележан тренд што го навестуваа многу актери на пазарот – кинеските мобилни телефони го преземаат приматот во Европа.

Последните податоци од агенцијата за истражување на пазарот „Каналис“ покажуваат дека 32 отсто или околу една третина од продажбата на паметни телефони во Европа во 2018 година се однесува на кинески производители – „Хуавеј“, „Шаоми“ и „Уанплас“, пренесува порталот „Верџ“.

Притоа лавовски удел во вкупните испораки, од над 23 проценти, има „Хуавеј“ со 42,5 милиона испорачани уреди за европските трговци. Само во последниот квартал од минатата година овој кинески технолошки гигант во Европа доставил 13,3 милиони паметни телефони, со тоа зголемувајќи ја вкупната бројка на испораки на Стариот континент за 55,7 отсто во споредба со 2017 година.

Од друга страна, најголем пад на извозот на паметни телефони во Европа во 2018 година забележа лидерот на пазарот, „Самсунг“, чии испораки се за 10 отсто помали во однос на претходната година и изнесуваат 61,6 милиони единици.

Ниту „Епл“ не мина брилијантно иако се задржа на второто место со 42,8 милиони испорачани „ајфони“ во Европа во текот на минатата година. Тоа е, сепак, 6 проценти помалку од претходната година.

Аналитичарите предвидуваат дека „Хуавеј“ во Европа до крајот на годинава ќе го собори „Епл“ од второто место, како што набргу се очекува да го направи тоа и во остатокот од светот. Во опасност од ваквиот налет е и досега недопирливиот „Самсунг“, наведува „Верџ“.

Неочекуван продор на европскиот пазар за паметни телефони направи и кинескиот „Шаоми“, кој го зазема четвртото место.

Германското министерство за финансии размислува да воведе посебен данок на приходи од огласување на интернет, кој странските компании, како „Гугл“ и „Фајсбук“, го собираат од германските фирми, информираат германските медиуми.

Министерството би вовело данок од 15 отсто на приходите од огласување на интернет, а како модел би послужило даночењето на надоместот за лиценца, пишува деловниот неделник Wirtschaftswoche.

Тоа би значело дека германските компании што одлучиле да огласуваат на интернет ќе плаќаат данок по неговото одбивање. Потоа би барале поврат на тие пари од интернет-компаниите што уплаќаат приходи за објава на огласи, се наведува во извештајот.

Заобиколениот пат преку германските фирми би бил нужен бидејќи германскиот даночен систем нема пристап до платформата на операторите во странство. Планот е во тек, додава весникот.

Министерството за финансии потврди дека ја разгледуваат можноста за воведување посебен данок, но велат дека не е постигната согласност меѓу сојузните власти и одделни земји.

На дури една третина од набавките имало само по една понуда. Просечниот најголем удел на еден понудувач во вкупните тендери на една институција изнесува 25 отсто, исто како и претходната година. Само кај две институции овој удел е повисок од 40 отсто, што се смета како праг за концентрација. Речиси една третина од тендерските документации на анализираните институции содржат дискриминаторски елементи што може да ја ограничат конкуренцијата.

Секој четврти тендер на анализираните институции бил поништен, а процентот на целосно или делумно поништени тендери кај одделни институции се движи од 0 до 77 отсто. Повеќе од половина од институциите ја користеле постапката со преговарање, без објавување оглас. Ваквите договори учествуваат со 7 отсто од вкупната вредност на договорите на институциите. Две третини од институциите немаат воспоставено интерен систем за следење на реализацијата на склучените договори за јавни набавки. Ова го покажува најновото годишно рангирање на министерствата, секретаријатите и Собранието според транспарентностa, отчетностa и интегритетoт во јавните набавки на Центарот за граѓански комуникации.

Главните наоди на анализата вклучуваат:
»Просечното ниво на исполнување на критериумите за транспарентност, отчетност и интегритет во целиот циклус на јавните набавки кај министерствата, владините секретаријати и Собранието на РМ е 53,6 отсто (од максимално можни 100 отсто) и во однос на лани (51,7 отсто) има само мало подобрување.

»Најдобро рангирани се оние институции што трошат најмалку пари. Шесте највисоко рангиран институции, всушност трошат најмал дел од парите за јавни набавки, односно 15 отсто од вкупните средства што ги потрошиле опфатените институции.

»Спротивно на ова, двете институции со најниска процентуална исполнетост трошат дури 39 отсто од вкупните средства за јавни набавки. Од нив, најниско рангираната институција – Министерството за образование и наука – има и најголем обем на набавки.

Според истражувањето, ниту една институција нема методологија, упатство или сличен документ врз чија основа се пресметува проценетата вредност на набавките. Реализацијата на плановите за јавни набавки е влошена. Просечниот процент на реализација на плановите за 2017 година е 62 отсто наспроти 65 отсто за претходната година. На ниво на институции најниската реализација на планот изнесува 21 отсто, а највисоката 87 отсто.

Само две институции ги објавуваат на своите веб-страници огласите за јавните набавки, известувањата за склучените договори, како и самите договори и нивните анекси, а ниту една не објавила известување за реализиран договор за јавни набавки.

„Расте бројот на тендери со поразумни рокови за прибирање понуди од законски минималните. И годинава просечниот број понуди кај анализираните институции од 3,09 е понизок од националниот просек (3,33). Просечниот удел на доставени жалби од фирмите во вкупниот број огласи на анализираните институции е 4,6 отсто, што е повисоко од националниот просек (3 отсто). Во однос на претходната година (6 отсто) уделот на жалби е намален. Две третини од институциите одговориле на барањата за слободен пристап до информациите во максималниот законски рок од 30 дена“, се вели во анализата.