Во срцето на Скопје наскоро се отвара новиот модерен хотел „Limak Skopje Luxury Hotel“. Хотелот припаѓа на групацијата Лимак од Турција, која во Скопје го отвара првиот свој хотел од вкупно девет сопствени хотели. Седум хотели и ресорти се наоѓаат во Турција, еден де лукс хотел на Кипар и еден бизнис хотел во Скопје кој ќе работи под мотото Warm Hospitality & Excellence Service.

Хотелот е целосно изграден и опремен, категоризиран со 5 супериор ѕвезди, располага со 142 комфорни и елегантно уредени соби, вклучувајќи и еден луксузен претседателски апартман. Претседателскиот апартман е уникатно декориран, што создава отмен и посебен впечаток кога ќе влезете во него. Спојот на комфорот, луксузот и природата е јасно видлив во овој уникатен објект.

Природните мотиви се особено присутни на влезот на Спа центарот на хотелот, место кое дава посебен белег. Се работи за спа центар од брендот „Шива“, специјално создаден и присутен во сите хотели на групацијата Лимак. Пространата турска бања со автентичен изглед е уникатна карактеристика на овој спа центар, а во неа се вградени бел мермер Кемал паша, карактеристичен за турските бањи и екватор мермер, увезен специјално од Мармарис.
Елегантниот стил на „Limak Skopje Luxury Hotel“ е видлив уште при самиот влез. Широкото лоби е изградено со мермер од Италија и Турција, специјално донесен за потребите на хотелот. Посебно внимание е посветено сите материјали вградени во хотелот да се природни, да задоволуваат највисоки еколошки и безбедносни стандарди и да овозможуваат висока енергетска ефикасност.

Големата банкет сала е со капацитет од 750 лица, како и Скај барот, нудат преубава панорама на Скопје од неколку страни. Конференциските капацитети, како и Ресторанот со отворена кујна  освен преубавиот амбиент, поседуваат и тераси со поглед кон планината Водно.

Лимак групацијата во своето портфолио вклучува изградба и управување на повеќе хотели и е сопственик на еден од најголемите синџири на хотели во Турција. Нуди беспрекорна хотелска услуга, а ваквото искуство и високи стандарди ќе се применат и во управувањето со „Limak Skopje Luxury Hotel“.

„Limak Skopje Luxury Hotel“ е дел од проектот „Diamond of Skopje”, кој го гради турската Лимак групација во вкупна инвестиција од 250 милиони евра. Покрај хотелот, проектот вклучува и четири резиденцијални кули, деловни простории и трговски центар. Проектот, чија прва фаза целосно треба да биде готова во 2022 година, зад себе ја има и поддршката на реномирани локални и интернационални банки, што е дополнителна потврда за неговата големина и значење.

Лимак е интернационална компанија, во која работат 60.000 вработени во градежништво, енергетика, туризам, инфраструктура и други  дејности. Има реализирано над 100 проекти, чија вредност надминува 10 милијарди долари, а меѓу нив се и светски познати мега пр оекти, како новиот аеродром во Истанбул, мостот Чанак кале 1915 и новиот терминал на меѓународниот аеродром во Кувајт чија вредност е 4,3 милијарди долари и претставува најголемиот договор што е доделен на странска градежна компанија. Лимак има активни проекти во повеќе земји во светот, како Русија, Украина, Косово, Албанија, Пакистан, Саудиска Арабија, Кувајт, Мозамбик и Брегот на  слонова коска.

(ПР текст)

Имаме раст на просечната нето-плата во ноември, a наша цел се достоинствени плати и подобар животен стандард за граѓаните. Владата е посветена на покачување на платите до 34.000 денари во следните четири години, објави премиерот Зоран Заев на социјалните мрежи.

„Имаме раст на просечната нето плата од 7% во ноември 2020, во однос на истиот месец 2019 година. Според податоците на Државниот завод за статистика, просечната месечна исплатена нето-плата по вработен во ноември 2020 година изнесувала 27.588 денари. Ваквото зголемување се должи на зголемувањата на платите во наведениот период во секторите: Дејности на здравствена и социјална заштита (11,2 %), Образование (9,5 %), Информации и комуникации (9,4%), Земјоделство, шумарство и рибарство (8,5%), Преработувачката индустрија (7,3%), како и во други бројни дејности. Нашата цел е граѓаните да имаат достоинствени плати и подобар животен стандард. Владата е посветена на покачување на платите до 34.000 денари во следните четири години“, напиша премиерот на својот фејсбук-профил.

Еколошката машина GM500ze на македонската компанија „Грин машинс“ (Green Machines), која е во сопственост на велешки „Брако“, го чистеше дворот на Белата куќа во Вашингтон во пресрет на вчерашната инаугурација на новиот американски претседател Џо Бајден.

Станува збор за иновативна машина за одржување хигиена во урбани средини, која работи без воопшто да испушта јаглероден диоксид. GM 500ze е првата целосно електрична машина од овој тип и веќе добро е позната меѓу градовите и институциите што се стремат кон паметни и зелени решенија во процесот на одржувањето на хигиената во урбани средини.

Деновиве во американските медиуми сè беше насочено кон преземањето на функцијата на новиот претседател. Беа објавени голем број стории, кои се фокусираа и на најситните детали од подготовките за инаугурацијата. Во една таква сторија на престижниот „Политико“ се појави и зелената машина на „Брако“. Еј-би-си, пак, објави прилог во кој вели дека и вообичаено сè е блескаво чисто во Белата куќа, но овој пат, имајќи ја предвид и пандемијата на Ковид-19, било спроведено длабинско чистење какво што не се памети.

Од „Брако“ велат дека GM500ze не се нашла случајно во Белата куќа бидејќи нивните производи веќе подолго време се извезуваат на американскиот пазар. Благодарение на сертифицираниот квалитет, нечујноста и иновативната технологија што не загадува, зелените машини ги чистеле пешачките зони и на други познати локации, како Бакингемската палата во Лондон, плоштадот Свети Петар во Ватикан, улиците на Сингапур, „Дизниворлд“, Тајмс сквер во Њујорк итн.

Поради својот футуристички дизајн, овие возила го привлекуваат вниманието и на филмските режисери и се појавуваат во сцени од Man In Black 3 и Star Wars: Episode I – The Phantom Menace.
GM 500ze е претходникот на најновата иновација што ја произведе „Брако“, која пред неколку месеци беше презентирана во Европа и светот. Тоа е неверојатната машина GM 500H2 што работи на водород и испушта вода наместо издувни гасови. И ова возило ја продолжува визијата на велешката компанија, чија цел е да придонесе за минимизирање на човечкото влијание врз природата и максимално да ја зголеми ефикасната употреба на ресурсите.