Народната банка ја објави анализата „Меѓународната инвестициска позиција на земјите од регионот, со посебен фокус на македонската економија“ на Дијана Јаневска-Стефанова. Во анализата акцентот е ставен на големината и структурните карактeристики на меѓународната инвестициска позиција (МИП), којашто претставува разлика помеѓу финансиските побарувања коишто земјата ги има од странство (остатокот од светот) и финансиските обврски кон странство. Притоа, се укажува на сѐ поголемото значење на овој показател, во периодот по глобалната финансиска криза, поради што тој е вклучен и во анализите на одржливоста и ранливоста на надворешниот сектор на меѓународните финансиски институции и на останатите носители на политиките.

Во анализата е даден кус осврт на МИП на земјите од регионот, во периодот пред и по глобалната економска криза од 2008/9 година. Кај сите земји во регионот МИП има негативна вредност, што значи дека сите економии имаат поголеми обврски кон странство отколку побарувања, што е и за очекување имајќи ја предвид фазата на економски развој и потребата од надворешно финансирање на економиите во форма на странски директни инвестиции, заеми и слично.

Динамичката анализа покажува проширување на негативната позиција во периодот пред глобалната криза, додека во посткризниот период главно се забележува подобрување. Структурно гледано, пред кризата се забележува дека најголема улога за промената на МИП имаат директните инвестиции, а ефект имаат и тековите коишто создаваат долг. Во посткризниот период, директните инвестиции и натаму растат, но побавно, додека тековите коишто создаваат долг се помали, поради процесот на раздолжување, карактеристичен за овој период.

Од аспект на одржливоста на екстерната позиција, според еден од ретките нумерички показатели за МИП од Процедурата за нерамнотежи на Европската комисија (МИП одредница – 35% од БДП), повеќето анализирани земји се наоѓаат над оваа препорачана граница. Имајќи ги предвид недостатоците при формирањето единствен нумерички показател за земји со различно ниво на развој, Меѓународниот монетарен фонд во своите редовни извештаи квалитативно ја проценува екстерната позиција на секоја земја.

„Имено, за целосна слика, покрај висината, треба да се земе предвид и структурната поставеност на МИП по инструменти, којашто во нашиот случај е поволна поради високото учество на директните инвестиции од околу 90%. Во согласност со наведеното, оцените на ММФ за македонската економија не упатуваат на поголеми ранливости во надворешниот сектор.“ – се заклучува во анализата.

Пензионерите со јануарската пензија ќе добиваат поголема пензија по основ на усогласување на пензијата со порастот на трошоците за живот, кои во второто полугодие од 2020 година во однос на првото полугодие истата годинa изнесуваат 1,2 %, соопшти Министерството за труд и социјална политика.

Од таму наведуваат дека зголемувањето на пензијата во номинална вредност изнесува 185 денари на ниво на просечна пензија и 134 денари на ниво на најниска пензија.

Редовното законско усогласување на пензијата се врши два пати во годината од 1 јануари и 1 јули секоја година според процентот на порастот на индексот на трошоците на живот, што обезбедува одржување на економската вредност и куповната моќ на пензијата.

Почнувајќи од 2019 година, покрај редовното усогласување, се предвидува и дополнително усогласување во случај доколку домашниот бруто-производ во претходната година има реален пораст повеќе од 4 %.

Покрај овие два начина на усогласување, од 2020 година, врз основа на одлука од страна на Владата, може да се изврши уште едно дополнително усогласување во случај кога има пораст на минималната плата во тековната година повеќе од 15 % и пораст на просечната плата во претходната година повеќе од 5 %.

Формалниот почеток на новата чешка инвестиција во ИТ-секторот во земјава ќе биде објавен денеска.

Станува збор за инвестицијата во компанијата „Сеавус“, која е купена од нaјголемиот ИКТ-холдинг во Чешка, Групацијата Арикома.

По тој повод, во 14 часот, ќе се одржи прес-конференција, на која ќе се обратат премиерот Зоран Заев и чешкиот амбасадор Мирослав Томан, како и директорот за ИТ-инвестиции во Групацијата Арикома, Михал Томанек, и Игор Лештар, управен директор на Групацијата Сеавус.

Лештар неодамна во интервју изрази увереност дека заедно со силен стратешки партнер како „Арикома“, „Сеавус“ ќе ги забрза иновациите и уште повеќе ќе ги зајакне позициите.