Економија
Најмладиот милионер во Македонија има 8 години, а најстариот 96

Најмладиот милионер во Македонија има осум години, а најстариот деведесет и шест. Директорката на Управата за јавни приходи, Сања Лукаревска, на денешната прес-конференција ги презентира податоците од годишната даночна пријава за 2020 година. Искажаниот годишен бруто-доход во пријавите изнесува 331.146.120.469,00 денари, а пресметаниот данок на личен доход е во износ од 19.607.095.073,00 денари.
Во категоријата најмлад и највозрасен милионер, лице што се родило во 2013 година остварило доход 1.016.947,00 денари, а лице на возраст од 96 години остварило доход во износ од 4.570.535,00 денари, основот по кој овие граѓани се најдоа во оваа категоријата е поради доход остварен главно од закупнина.
Лукаревска рече дека граѓаните преку своите кориснички профили на платформата е-ПДД имаа можност пополнетата годишна даночна пријава да ја потврдат или да ја коригираат до 31 мај. По истекот на законскиот рок, годишните даночни пријави, кои од страна на граѓаните не беа ниту потврдени ниту коригирани, беа автоматски потврдени. Од тука 593.375 ГДП службено беа потврдени, граѓаните потврдија 37.294 ГДП, а коригирани се 1.832 ГДП.
Во согласност со податоците за највисоки прагови во 2020 година, 11 граѓани во 2020 оствариле над 100 милиони денари, а 557 граѓани оствариле приходи што се движат од 10 до 100 милиони денари. Кај 40.021 граѓанин утврден е бруто-доход над 1 милион денари, а 616.024 лица оствариле бруто-доход што се движи од 100 илјади до 1 милион денари.
Највисок годишен бруто-доход за 2020 година изнесува 453,1 милиони денари, а е пријавен од скопјанка. Највисоката годишна бруто-плата е остварена во индустријата со метали и изнесува 105,2 милиони денари, а исплатена му е на граѓанин од Струга. На листата на највисоко рангирани бруто-плати се најдоа и платите исплатени во секторот здравство, аптеки, одгледување добиток, трговија со тутун и игри на среќа. Највисокото лично примање по основ на извршена работа изнесува 63,2 милиони денари на годишно ниво за повремено или привремено извршени услуги главно кон компанија за производство на алкохолни и безалкохолни пијалаци.
Највисоката капитална добивка во износ од 151,6 милион денари е остварена од граѓанин на Скопје од продажба на сопственички удел, а највисоката исплатена дивиденда во износ од 306,3 милиони денари му е исплатена на граѓанин на Скопје, кој е сопственик на бизнис што припаѓа на дејностите на трговија со автомобили и моторни возила.
Скопјани повторно доминираат во исплата на највисок доход од самостојното вршење дејност, највисокиот изнесува 73,5 милиони денари. Во 10-те топ-рангирани на листата се наоѓаат адвокати, нотари, извршители, угостители, електроинсталатори и производители на амбалажи од хартија.
Ресенец остварил највисок доход од продажба на земјоделски производи во износ од 32,2 милиона денари.
Највисок бруто-доход од закуп и подзакуп на имот (издавање земјиште, станови и деловни простории, превозни средства и друг вид имот) остварил граѓанин од Скопје во износ од речиси 50 милиони денари.
Скопјанец е прворангиран според остварен вкупно бруто-доход од авторски права и други стварни права во износ од 15,4 милиони денари, а по основ на права од индустриска сопственост граѓанин на Скопје остварил бруто-доход во износ од 9,2 милиони денари.
Највисоката добивка од лото, обложување, казино и учество во наградни игри остварил граѓанин на Тетово, чија добивка изнесува 40 милиони денари од обложување, а второрангираниот е граѓанин од Битола, кој остварил 31 милион денари исплатени од Државната лотарија на Република Северна Македонија.
Прворангираниот пензионер е од Скопје, кој пријавува странска пензија, која изнесува 5,8 милиони денари на годишно ниво.
Лице од Тетово е со највисок годишен бруто-доход по основ на уплатени премии и исплатена осигурена сума во износ од 6,2 милиони денари.
Категоријата друг доход вклучува доход од разни извори, како што е доходот кој не е конкретно опишан во Законот за данокот на личниот доход и не е изземен од даночење, доходот остварен од продажба на корисен цврст отпад, доходот остварен со електронска трговија преку интернет, доходот од маркетиншки интернет-услуги, износот на неискористената финансиска помош, износот на неискористените донирани финансиски средства, како и кусоци што не се предизвикани од вонредни настани (кражба, пожар или други природни непогоди) и не се на трошок на платата на одговорното лице. Во оваа категорија скопјанка со пријавен годишен бруто-доход од 449,6 милиони денари е прворангирана, а граѓанин од Тетово е второрангиран со пријавен бруто-доход во износ од 247,7 милиони денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
ЕСМ склучи договор со „Балкан јутилитис“ за набавка на гас за февруари

„ЕСМ продажба“ потпиша договор за набавка на природен гас за февруари 2023 за свои потреби, како и за потребите на други стопански субјекти во државата со фирмата „Балкан јутилитис“.
Како што информираат од ЕСМ, на јавниот повик, кој беше достапен за сите домашни и странски компании, пристигнале две понуди – фирмата „Актаел“ со понуда од 99,83 eвра/MWh, а фирмата „Балкан јутилитис“ со понуда од 98,71 евра/MWh.
„Понудените цени на гасот од страна на двете фирми ги опфаќаат сите трошоци за набавка на енергентот, како што се закуп на преносни капацитети, разни такси и маржа. Овој факт го потенцираме со цел да се избегнат евентуални шпекулации што би произлегле од цената на гасот на берзите во моментот, но во берзанската цена не се пресметани сите споменати дополнителни трошоци што произлегуваат од набавката, како што се закуп на преносни капацитети, разни такси и маржа.
Со понудувачот, кој имаше понудено пониска цена во моментот на носење на одлуката за избор, во случајот „Балкан јутилитис“, склучен е валиден деловен договор, кој ги содржи сите параметри од јавниот повик, односно количина, цена, динамика и гаранција за испорака“, соопштија од компанијата.
Со оваа набавка, како што појаснуваат, во целост ќе се задоволат потребите од природен гас за производство на топлинска енергија за топланите „Исток“, „Запад“, „Енергетика“ и „Скопје Север“, како и за други потрошувачи на природен гас во Македонија. Граѓаните да бидат сигурни и спокојни дека и во февруари ќе продолжи континуираното снабдување со топлинска енергија, додаваат од ЕСМ.
Јавен повик за набавка на природен гас за март 2023 година ќе биде спроведен во текот на февруари.
Економија
Нов салон на „Прима“ во Ѓорче Петров – нов центар за модерен и квалитетен мебел

Со новиот салон на „Прима“, населбата Ѓорче Петров станува нова дестинација за модерен и квалитетен мебел во Скопје и пошироко.
Познавајќи ја досегашната работа на „Прима“ како најголем производител на мебел на овие простори, новиот салон ќе биде место во кое се прикажуваат сите новитети во делот на нивниот оригинално дизајниран мебел, како и сите вредности кон кои се стремат во „Прима“: извонреден квалитет, модуларност, модерен дизајн, како и ред други услуги, со што се блиску до сите оние што сакаат модерен, едноставен и практичен начин на уредување на домот.
„Прима“ во своето портфолио нуди мебел за секоја просторија во домот: претсобје, дневен престој, трпезарии, кујни, детски и спални соби, како и целосна програма за спиење, со што, според зборовите на менаџерскиот тим, ја покажува својата цел да им излезе во пресрет на потребите и желбите на своите купувачи, особено на оние од помладата популација.
Дополнителна вредност на ребрендираната „Прима“ е најновата услуга што ја нуди, а тоа е дизајнирање на ентериерот, што секој заинтересиран купувач може да ја добие во најблискиот салон добивајќи решенија што одговараат на просторот и индивидуалните идеи на клиентите.
ПР
Економија
Во Швајцарија нагло забави извозот на накит, зголемен извозот на часовници

Трговскиот биланс на Швајцарија за 2022 година покажа четвртина помал суфицит од претходната година бидејќи увозот пораснал многу повеќе од извозот, покажаа денеска податоците на Федералната царинска управа.
Трговскиот суфицит од размената на Швајцарија со светот минатата година изнесувала 43,5 милијарди швајцарски франци (47,3 милијарди долари) и бил 25,6 отсто помал од 2021 година.
Извозот реално пораснал само 0,1 отсто по скокот од 9,5 отсто во 2021 година.
Номинално, извозот е зголемен 7,2 отсто, поддржан од постојано зголемување на цените, а увозот дури 16,8 отсто, покажуваат податоците на Царинската управа. Послабиот раст на извозот во 2022 година во голема мера го одразува падот на извозот на возила од 6,9 проценти. Намалени се и испораките на хемикалии и лекови, и тоа 4,4 отсто.
Растот на извозот на накит нагло забави, на 21,3 отсто, од 38 отсто во претходната година, што значително се одрази на вкупните извозни резултати во 2022 година.
Во последните три месеци од минатата година вкупниот трговски суфицит е намален 11,3 отсто во однос на претходните три месеци и се лизна на 7,1 милијарди франци. Истовремено, извозот е намален реално 1,8 отсто, а увозот 0,4 отсто.
На самиот крај на годината закрепна извозот и бележи пораст од 5,7 отсто во однос на ноември кога бележи пад од 2,7 отсто. Увозот, пак, е зголемен за првпат по три месеци и е за 0,3 отсто поголем во однос на ноември.
Извозот на часовници скокна 5,8 отсто на годишно ниво во декември и ја скрши границата од две милијарди франци, што никогаш претходно не се случило на крајот на годината, покажаа податоците од Швајцарската асоцијација за индустрија на часовници.
Во 2022 година Швајцарија извезла часовници во вредност од 24,8 милијарди франци, што е 11,4 отсто повеќе од претходната година, објави здружението.