Пандемијата ќе фрли во стечај дури 6.000 австриски фирми

Пандемијата на коронавирусот силно ја погоди австриската економија, па в година се очекува да доведе до банкрот на шест илјади компании, како и продолжување на трендот на висока невработеност. Поради короната, австрискиот јавен долг годинава ќе се зголеми од 70,5 проценти на 84 проценти од домашниот бруто-производ (БДП), в година ќе се зголеми на 84,8 проценти, а во 2022 година на 85 проценти.

За да се надмине корона-кризата, австриската влада стави на располагање 50 милијарди евра, а добар дел од тие пари е обврски и одложувања на данокот.

Во услови на економска криза предизвикана од пандемијата на коронавирусот директорите за финансии на австриските компании се насочија кон намалување на трошоците и забрзување на дигитализацијата, што ќе резултира во многу компании дополнително да се намалат бројот на вработени во следните месеци, според истражувањето на „Делоит“.

Дури 92 процента од финансиските директори во следните 12 месеци им даваат приоритет на мерките за намалување на трошоците и проширување на дигитализацијата, а аквизициите или зголемените инвестиции играат мала улога во нивните планови. Бројот на невработени во Австрија во моментот изнесува 413,24 илјади, што е 71 илјада повеќе отколку во истиот период минатата година. Најголем број невработени е регистриран во средината на април како резултат на почетокот на пандемијата. Во тоа време имаше 588,2 илјади невработени регистрирани во Службата за вработување.