Доларот во четвртокот почна да зајакнува во однос на другите валути оддалечувајќи се од двонеделниот минимум забележан на претходното тргување бидејќи инвеститорите се повлекоа од пазарот пред монетарните одлуки на трите централни банки.

Главните валути се движеа во тесен опсег, при што само јапонскиот јен беше меѓу губитниците во однос на доларот.

Доларот зајакна 0,2 отсто, а индексот на доларот забележа ниво од 94,93 поени отскокнувајќи од минимумот од 94,73 поени забележани во претходното тргување.

Еврото и фунтата останаа стабилни во очекување на монетарните одлуки на Европската централна банка.

Австралискиот долар падна на најниско ниво во повеќе од две и пол години поради доминацијата на стравувањата во врска со ескалацијата на трговскиот судир меѓу САД и Кина, а валутите, кои се сметаат за сигурни, како што се франкот и јенот, остварија добивка.

Меѓу валутите на развиените земји, австралискиот долар падна повеќе од половина процент паѓајќи на најниско ниво од февруари 2016 година, на 0,7138 во однос на американскиот долар, поради стравување дека ескалацијата на трговскиот спор ќе ги погоди извозно-ориентираните економии, како што е Австралија, на која Кина ѝ е најголем трговски партнер.

Јуанот беше релативно стабилен во тргувањето во Хонгконг бидејќи растот на трошоците на кредитите ги одврати трговците со кратки позиции од продажба на кинеската валута.

Британската фунта се зголеми во петокот кога главниот преговарач на Европската Унија, Мишел Барние, рече дека ЕУ е отворена за да разговараат за други проблеми кои се јавуваат во однос на брегзитот.

Акциите на американската автомобилска компанија „Тесла“, денес, паднаа во Германија пет отсто кога извршниот директор Илон Маск се откажа од планираната приватизација.

Акциите на „Тесла“, со кои се тргуваше на берзата, паднаа на 263,50 долари кога Маск објави во петокот дека мнозинството акционери се противат на предложената приватизација пред три недели, објави „Ројтерс“.

Акциите на компанијата во моментот се 10 отсто пониски од нивото на 7 август кога закрепнуваа од веста за можна приватизација, според која Маск објави дека ќе ги купи акциите на „Тесла“ по цена од 420 долари, како и дека тој веќе обезбедил средства за таа цел.