Економија
(Видео) Шахпаска ги претстави буџетот и приоритетите на Министерството за труд во 2021
Министерката за труд и социјална политика, Јагода Шахпаска, денеска, на прес-конференција на Владата, го презентира предлог-буџетот за 2021 година на Министерството за труд и социјална политика.
Вкупниот буџет на Министерството за труд и социјална политика за 2021 година е проектиран на 53.183.958 илјади денари.
„Како и целиот свет, и ние сме соочени со здравствената и економската криза што ја предизвика пандемијата на Ковид-19 и затоа буџетот за наредната година е проектиран во насока на надминување на негативните последици.
Зачувување на секое работно место, поддршка и олеснет пристап до гарантирана минимална помош за најранливите категории граѓани, изградба на објекти за деца во предучилишна возраст и ран детски развој, објекти за социјална заштита, поддршка на активни мерки за вработување, редовна и навремена исплата на пензии, продолжување со процесот на деинституционализација и започнување со децентрализација на социјалните услуги се областите во кои ќе се трошат средствата од буџетот на Министерството за труд и социјална политика“, рече Шахпаска.
Таа информира дека за капитални инвестиции за в година предвидени се 100 милиони денари, од кои за градежни објекти 93.900 илјади денари, а за опрема обезбедени се 6.100 илјади денари.
„За изградба на нови и за завршување на веќе почнатите градинки предвидени се 67.650 илјади денари. Преостанатите средства се за објекти за социјална заштита: домови за стари лица и дневни центри за лица со попреченост. В година ќе заврши изградбата на 14 градинки, а во постапка е изготвување на програмата за почнување изградба на нови објекти за згрижување деца. Целта е да се овозможи пристап на деца од предучилишна возраст и во руралните средини, во средини каде што досега немало градинки затоа што за нас секое дете е важно“, посочи министерката.
Нагласи и дека за непречено функционирање на детските градинки, како и за згрижување на старите лица во домови за стари лица, предвидени се блок-дотации во износ од 2.075.000.000 денари.
Износот на овие средства ќе се зголемува како што ќе се отвораат новите објекти.
„За продолжување на процесот на деинституционализација, преку сместување во мали групни домови, живеење со поддршка и згрижувачки семејства, односно создавање услови најблиску до оние во семејството, како и за лична асистенција и други видови социјални услуги обезбедуваме 725 милиони денари“, истакна Шахпаска.
Министерката посочи дека во делот за социјални надоместоци во буџетот за наредната година предвидени се 10.500 000.000 денари. Со овие средства ќе бидат опфатени околу 300 илјади корисници. Тоа значи дека се обезбедени средства за дополнителни 5.000 домаќинства приматели на ГМП, со што вкупната бројка на домаќинства опфатени со оваа мерка ќе биде 36.500.
Притоа, зголемен е и опфатот на деца приматели на детски додаток (19.720) и образовен додаток (24.579).
„Соочени со пандемијата предизвикана од Ковид-19, како одговорна Влада, направивме измени на Законот за социјалната заштита и на Законот за заштита на децата, кои обезбедуваат олеснет пристап до овие социјални права. Продолжуваат да течат и другите социјални права – додаток за попреченост, паричен надомест за помош и нега од друго лице, но и исплата на социјална пензија за 7.593 граѓани“, потенцира Шахпаска.
Министерката укажа на тоа дека, заради намалување на стапката на невработеност, и оваа година се обезбедуваат средства за оперативниот план за активни програми и мерки за вработување во износ од 538 милиони денари.
„Со новиот оперативен план се зголемува опфатот на невработените лица, за оние што ги изгубија своите работни места поради пандемијата на Ковид-19. Овој износ е речиси четири пати поголем во однос на 2020 година, со што преку Агенцијата за вработување ќе се реализираат програми и мерки за субвенционирање придонеси во случаи на невработеност“, рече Шахпаска.
Таа посочи дека дополнително за субвенционирање придонеси за зголемување на платите се издвојуваат 2.401.000.000 денари, средства што ќе бидат распределени до Фондот за ПИОМ, Агенцијата за вработување и Фондот за здравствено осигурување по основ на средства за социјални придонеси. Со овие средства 120 илјади работници од приватниот сектор ќе добиваат повисока плата.
На овој начин, потенцира министерката, се влијае на подобрување на животниот стандард на граѓаните, економскиот раст и развој и намалување на невработеноста.
Притоа продолжува обезбедувањето сигурни и одржливи пензии на сегашните и на идните пензионери и одржување стабилност на пензискиот систем. За таа цел во Фондот за пензиско и инвалидско осигурување ќе бидат трансферирани 31.672.000.000 денари.
„Со буџетот за 2021 година не само што ги санираме последиците од пандемијата на Ковид-19 туку продолжуваме да ја и намалуваме невработеноста, да се грижиме за најмладите, обезбедуваме редовна исплата на социјалните права, но ја продолжуваме и социјалната реформа“, потенцира на крајот од обраќањето министерката Шахпаска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.
Економија
Трипуновски: Ги потпишав првите 16 договори за закуп на земјоделско земјиште во државна сопственост
Дополнителниот замени министер за земјоделство, шумарство и водостопанство Цветан Трипуновски на својата фејсбук страна објави дека ги потпишал првите 16 договори за закуп на земјоделско земјиште во државна сопственост.
Во својата објава Трипуновски вели: „Почитувани земјоделци, штотуку ги потпишав првите 16 договори за закуп на земјоделско земјиште во државна сопственост, нека е аирлија!“
Трипуновски во неколку наврати ја алармираше јавноста дека во Република Македонија постојат договори за закуп на земјоделско земјиште во државна сопственост кои истекуваат оваа година, но на истите не им е овозможено продолжување и дека Николовски го кочи продолжување со образложение дека се потребни законски измени на законот за земјоделско земјиште.
„Сепак на крајот успеавме да го реализираме нашиот предлог за разрешница на овој проблем по многу побрза и поедноставна постапка, наспроти тврдењата на министерот Николовски кој постојано, од непознати причини, тврдеше дека се потребни измени на законот за земјоделско земјиште и дека со анексирање на договорите не се решава овој проблем. Со ова само се докажа дека Николовски повторно ве лаже како што тоа го прави изминативе 7 години“, дополни Трипуновски.
Позитивно е тоа што овој голем проблем доби решение и засегнатите земјоделци конечно ќе можат да ги продолжат своите договори согласно законските регулативи. Со ова Трипуновски покажа дека ќе биде предводник во промените и решавањето на проблемите во македонското земјоделство.
„ВМРО-ДПМНЕ секогаш било и ќе биде на страната на македонските земјоделци, доколку ние не го изнесовме овој проблем во јавноста, СДС и Николовски никогаш немаше да ги продолжат овие договори на вредните македонски земјоделци или пак тоа ќе го правеа селективно и повторно земјоделското земјиште ќе завршеше кај луѓе што не се земјоделци или истото ќе го трансформираа за плантажи со фотоволтаици. ВМРО-ДПМНЕ секогаш ќе може гордо и со крената глава да биде помеѓу светиниколчани и сите земјоделци во Република Македонија“, заврши Трипуновски во својата објава.