Економија
Во Скопје се одржа промоција на новите СУВ-модели на „Опел“
На свечена промоција во „Сити хол“ во Скопје беа претставени новите СУВ-одели на „Опел“: Crossland X, Mokka X и Grandland X.
Модерните кросовери беа претставени од автомобилските новинари: Крумислав Барзов, Владимир Ристовиќ, Агрон Сулејман, Блашко Велјановски, Горан Антевски и Љупчо Михајловски, заедно со Драган Ненадовиќ, директорот на „Опел“ за Србија, Црна Гора, Македонија, Албанија и за Бугарија.
Директорот Драган Ненадовиќ изрази големо задоволство поради премиерната промоција на СУВ-моделите во Македонија, како и поради интересот што го предизвикал настанот.
„Многу се гордеам што ‘Опел’ сега може да понуди дури три возила од СУВ-сегментот. Mokka X е одличен наследник на веќе прославената Mokka, а Crossland X и Grandland X се прв заеднички модел развиен во рамките на новата групација ПСА. Со овие модели првпат влегуваме сериозно во најбрзорастечкиот сегмент во светот, сегментот на СУВ-возила. Очекуваме дека набргу ќе станат наши нови најдобро продавани возила и дека ќе го обезбедат заслуженото место на ‘Опел’ кај љубителите на СУВ-возила и ќе ја заокружат нашата атрактивна понуда. Се радувам дека по саемот во Белград, новите модели премиерно ги претставуваме и во Скопје“, изјави Ненадовиќ.
Во Германија во првите два месеца од годинава, според статистиката на КБА, федералниот сообраќаен орган, овие три возила го зазеле првото место во сегментот СУВ/кросовер-возила.
Crossland X е разбирлив, остар, свеж и неверојатно практичен. Првиот играч во СУВ-селекцијата им одговара на сите што се сестрани и подготвени за предизвици. Совршен пандан на урбан начин на живеење благодарение на рафинираниот СУВ-дизајн и компактните димензии: софистициран и динамичен, новиот Crossland X се издвојува со практичноста и спортската елеганција. Опцијата за покрив во две бои, голем багажник, како и доволно внатрешен простор, се главните атрибути на Crossland X-моделот. Идеален е за кратки шопинг-патувања, но и за заминување на подалечни дестинации. Само една година од отворањето на книгата за нарачки веќе стана бестселер – 100.000 купувачи во Европа го одбраа Opel Crossland X.
Mokka X се одликува со атрактивен дизајн и погон на сите 4 тркала. Вториот член на СУВ-екипата е вистински успех за „Опел“, со повеќе од 750.000 продадени возила. Возачите на Mokka X уживаат во главната предност која се рефлектира во повисоките седишта,давајќи акцент на подобрената видливост. Овој компактен авантурист привлече внимание со спортскиот дизајн, а покрај тоа, и двапати е добитник на наградата „Автомобил на годината со погон на сите 4 тркала“. Самоуверените мускулести линии го привлекуваат вниманието, а повисоката поставеност од земјата и големите тркала од лесна легура се доказ дека станува збор за вистински теренец.
Opel Grandland X ги претставува сите карактеристики што ги поседува еден СУВ-автомобил. Големата пространост и разновидност, комбинирана со стилско-динамичен ентериер, го прават Grandland X премиум-возило со врвни квалитети. Овој несекојдневен СУВ го привлекува вниманието со своите остри линии, мускулестата силуета и спортскиот изглед. Многуте иновативни технологии го прават возењето полесно, попрактично и побезбедно од кога било досега. Сите овие особини го прикажуваат Grandland X вистински предизвикувач во својата класа.
На крајот од вечерта директорот Ненадовиќ го извлече и среќниот добитник на наградната игра кој освои викенд за двајца во „Аурора ресорт & спа“ во Берово, на кој ќе отпатува со Grandland X и ќе се увери во сите негови погодности.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Ангеловска-Бежоска: Родовата еднаквост не само квантитативно, туку и квалитативно ќе го поттикне економскиот раст
Последователните економски шокови изминатите години дополнително го отежнуваат намалувањето на родовата нееднаквост, поради нивното понеповолно влијание врз женската популација. Така, кај повеќето земји од регионот на Западен Балкан стапката на активност е повеќе намалена кај жените отколку кај мажите, што е слично и со глобалните трендови. Според анализата на Светската банка, земјите во регионот од Западен Балкан секоја година губат околу 18% од БДП поради родовиот јаз на пазарот на труд, при што две третини од загубата се објаснува со ниската стапка на активност на жените, а преостанатиот дел на разликите во изборот на занимањата помеѓу мажите и жените. Оттаму, водењето соодветни политики за поголема вклученост на жените на пазарот на трудот може значително да придонесе за повисок економски раст, порача гувернерката на Народната банка, Анита Ангеловска-Бежоска на работилницата „Улогата на жената во економската трансформација на општеството“ во организација на Економскиот факултет при Универзитетот „Св. Кирил и Методиј“ во Скопје.
Глобално и во регионот, неодамнешните кризи посилно ги погодија секторите со поголемо учество на жените и неповолно се одразија врз активноста и јазот. „Според Светскиот економски форум (СЕФ), ако напредокот продолжи со досегашната динамика, на глобално ниво ќе бидат потребни 131 година за да се постигне целосна рамноправност. За споредба, пред пандемијата беше проценето дека се потребни 100 години за да се постигне родова еднаквост, што укажува на последиците од неодамнешните шокови врз женската популација и родовиот јаз“, посочи Ангеловска-Бежоска.
Ангеловска-Бежоска посочува дека позитивен ефект од намалувањето на родовиот јаз врз растот би имало не само од зголемениот број на работната сила, туку и од различните вештини и карактеристики на жените, коишто можат да дадат поинаква квалитативна димензија на пазарот на трудот и пооптимално одлучување.
Гувернерката додаде дека за да се постигне тоа се потребни реформи во повеќе сегменти, како откривање на сите извори на родовите разлики присутни во институционалните, регулаторните, образовните и традиционалните норми, развивање политики коишто ќе ги поттикнат жените да се вратат на пазарот на труд, разбивање на стереотипите и создавање еднакви можности за кариерен развој на жените (учество во лидерските и високите позиции), соодветна поддршка на жените од државата и работодавачите во однос на обврските кон семејството/децата, осмислување нови иновативни технолошки решенија коишто ќе овозможат поголема финансиска инклузија и пристап до финансирање на жените со ниски примања.
На работилницата во организација на Катедрата по економија, на која и гувернерката одржа предавање, учествуваа и ректорката на Универзитетот „Св. Кирил и Методиј“ во Скопје, Билјана Ангелова и претседателката на Организацијата на работодавачи на Македонија (ОРМ), Владанка Трајкоска. Работилницата ја отвори деканот на Економскиот факултет, Предраг Трпески, а воведни обраќања имаа и професорките Даниела Бојаџиева и Билјана Ташевска.
Економија
Комерцијална банка склучи договор за продажба на „Еуроникел“
Комерцијална банка информира дека склучи договор за продажба на имотот на комбинатот „Еуроникел индустри“ од Кавадарци со друштва основани од холандската холдинг-компанија Polynickel Holding BV, која е дел од групацијта Yildirim Group. За финална реализација на купопродажниот договор останува уште да се исполнат сите правни и регулаторни предуслови, се наведува во соопштението.
Во исто време, банката со групацијата Yildirim склучи договор за продажба и на имотот на фабриката „Нова рефрактори“ во Пехчево.
„Убедени сме дека продажбата е долгорочно решение за комбинатот ‘Еуроникел’ имајќи ги предвид кредибилитетот и капацитетот на групацијата Yildirim. Веруваме дека со ова е надминат неизвесниот период за сите доверители и, пред сè, за вработените во комбинатот, кои покажаа максимална посветеност и професионалност и покрај тешката состојба во која се најдоа не по нивна вина.
Групацијата Yildirim е глобален индустриски конгломерат со седиште во Амстердам и во Истанбул. Основана е 1963 година и моментно работи во 56 земји на 5 континенти, вработува 25.000 лица во девет индустрии: метали и рударство, управување со пристаништа, вештачки ѓубрива и хемикалии, енергија и енергетски производи, транспорт и логистика, финансиски услуги, градежништво и недвижности и меѓународната трговија.
Во целиот изминат период од декември 2023 година, кога Комерцијална банка го презеде имотот на комбинатот во своја сопственост, бевме посветени на наоѓањето сериозен инвеститор, кој ќе ја продолжи дејноста на еден од најзначајните индустриски капацитети во земјата. Со цел да се одржи комбинатот во добра состојба за безбедно и ефикасно рестартирање на производниот процес, банката во изминатите четири месеци обезбеди речиси 100 милиони денари за одржување на технолошкиот минимум на комбинатот и за давање шанса за продолжување на работењето“.
Банката, како што се дополнува во информацијата, останува посветена и понатаму да придонесе со сите свои капацитети за фер наплата на доверителите и вработените во рамките на стечајната постапка. Прв услов за тоа е сите должници на ‘Еуроникел’ веднаш да ги платат своите обврски“.
Економија
Од полноќ поскапуваат горивата
Регулаторната комисија за енергетика донесе одлука со која се врши зголемување на малопродажните цени на нафтените деривати во просек за 1,33 % во однос на одлуката од 22.3.2024 година.
Од 26.3.2024 година од 00.01 часот максималните цени на нафтените деривати ќе изнесуваат:
моторен бензин ЕВРОСУПЕР БС-95 – 85,00 (денари/литар)
моторен бензин ЕВРОСУПЕР БС-98 – 87,00 (денари/литар)
дизел-гориво ЕВРОДИЗЕЛ БС (Д-Е V) – 77,00 (денари/литар)
масло за горење екстра-лесно 1 (ЕЛ-1) – 76,00 (денари/литар)
„мазут М-1 НС“ – 44,776 (денари/килограм)
Малопродажната цена на бензинот ЕВРОСУПЕР БС-95 не се менува.
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство (ЕЛ-1) се зголемуваат 1,00 денар/л, а малопродажната цена на бензинот ЕВРОСУПЕРОТ БС-98 се зголемува 1,50 денар/л.
Малопродажната цена на „мазутот М-1 НС“ се зголемува 0,979 денари/кг и сега ќе изнесува 44,776 денари/кг.
Курсот на денарот во однос на доларот во изминатиот период по кој беа формирани цените со претходната пресметка е повисок 0,028 %.