Економија
(Видео) До Фондот за иновации поднесени 238 проекти вредни до 51 милиони евра
Заменик претседателот на Владата задолжен за економски прашања Кочо Анѓушев и директорот на Фондот за иновации и технолошки развој Јован Деспотовски на прес-конференција ги презентираа прелиминарните податоци за апликациите од малите и средни компании доставени на првиот јавен повик за мерките од третиот столб на Планот за економски раст.
Вицепремиерот Анѓушев потенцираше дека интересот за аплицирање на првиот јавен повик е исклучително висок и дека со тоа се докажа дека микро, малите и средни компании ги препознаа мерките како исклучително атрактивни и се врати ентузијазмот кај младите луѓе за инвестирање.
„Примени се вкупно 236 апликации, од кои дури 88%, односно 208 апликации се за иновативни проекти, со што се покажува дека Македонија има иновативни и креативни луѓе, а ние како Влада сме задоволни што можеме да ги поддржиме овие млади лица да ги реализираат своите бизнис идеи. Најголемиот дел од апликациите кои се пристигнати, или околу 84% се пристигнати од микро и мали компании, за кои всушност мерките се и дизајнирани. Проекти има од сите градови во Република Македонија, додека ако анализираме преку гранки, најбројни се апликациите од ИТ индустријата, што значи дека се следат светските трендови, односно најмногу апликации има во дејноста од која може да се добие и највисока додадена вредност. Вкупната вредност на поднесените проекти изнесува околу 51 милиони евра, од кои околу 15 милиони евра се учество на компаниите во проектите“, нагласи вицепремиерот Анѓушев.
Директорот на ФИТР, Деспотовски потстети дека јавниот повик беше отворен на 27 април, компаниите можеа да аплицираат се до 11 јуни, а покажа исклучително задоволство од бројот на пристигнатите апликации.
„Бројот на доставени проекти ги надмина сите наши најоптимистички очекувања. Износот кој компаниите го побаруваат само во првиот јавен повик е за 11 пати повисок од буџетот предвиден за првиот јавен повик, односно 3,5 пати повисок од вкупно планираниот буџет за оваа активност за 2018 година. Со ова се покажува апетитот на компаниите за ваков тип на финансиска поддршка, но и дека со правилни мерки компаниите се подготвени да инвестираат и сопствени средства. Најголемиот дел од апликациите се во делот за развој за иновации, а токму преку иновациите очекуваме забрзување на економскиот раст“, посочи Деспотовски.
Анализата на доставените проекти покажува дека за реализација на овие проекти се потребни вкупно 1323 работни места, од кои 342 се нови работи места во компаниите, а износот на просечна плата по вработен е 43.370 денари. Веќе од понеделник почнува евалуација на пристигнатите проекти која ќе се одвива во две фази, а по завршување на евалуациите ќе се донесе одлука колку компании ќе бидат поддржани преку мерките од Планот за економски раст.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.