Економија
Заев најави социјални станови, старски домови и повеќе пари за лицата со попреченост
Лидерот на СДСМ, Зоран Заев, на денешната прес-конференција ја претстави социјалната програма 2020-2024 и рече дека во неа ќе има проекти со кои ќе бидат опфатени сите категории граѓани, најранливите, децата, работниците и повозрасните граѓани. Најави повеќе проекти, како што се изградба на нови социјални станови, старски домови, зголемување на минималната плата, како и остварување на правата на социјални додатоци и бенефеции за одредени социјални категории граѓани.
„Продолжување на грижата за ранливите категории граѓани преку зголемување на опфатот со социјална помош и детски додаток, зголемување на висината на сите права за попреченост, вложување во ран детски развој преку зголемување на опфатот на деца во предучилишно образование, изградба на градинки, поддршка и помош за повозрасните преку изградба нови старски домови и развој на нови услуги за поддршка, изградба на 777 стана за ранливи категории и млади брачни парови“, рече Заев.
Од општество што газеше врз достоинството на ранливите граѓани, рече тој, се трансформиравме во општество што се грижи за сите и обезбедува еднакви можности и услови сите да уживаат еднакви права.
„До крајот на следниот мандат социјалната помош, која сега е поголема 300 отсто, ќе се прошири и ќе ја примаат 34 илјади семејства како гарантирана минимална помош, а 65 илјади деца ќе примаат детски додаток. Вложуваме во најмладите и до 2024 година со предучилишно образование ќе опфатиме 60 отсто деца на возраст од три до шест години. 10.000 деца ќе добијат современи услови за квалитетен раст и развој. Ќе ги ослободиме од плаќање партиципација за детска градинка сите деца од семејства со ниски приходи, рече Заев на денешната прес-конференција.
Во социјалната програма на СДСМ, доколку го добие мандатот, има низа мерки и за подобрување на квалитетот на животот за лицата со попреченост, рече Заев.
„Градиме систем за надминување на пречките со кои се соочуваат лицата со попреченост. Во согласност со новата програма, сите права за попреченост ги зголемуваме 15 отсто во 2021 година. Дополнително, ја намалуваме границата за користење на правото за попреченост од 26 на 18 години, а ќе направиме сè до 2024 година да нема ниту една јавна институција без пристапна рампа“, рече Заев.
Тој најави и помош и поддршка за највозрасните преку изградба на три дома за стари лица во Скопје, Кочани и во Пробиштип, како и 10 нови центри за активно стареење и услуга за помош и нега во домот во вкупно 65 општини, а најви дека недела ќе биде неработен ден за сите работници.
„Недела да биде неработен ден за сите што сакаат да бидат со своите семејства. Минималната плата ја качуваме на 18 илјади денари затоа што секој заслужува да му се цени трудот на работното место. Нема напредок во едно општество ако нема грижа за сите“, рече Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.
Економија
Трипуновски: Ги потпишав првите 16 договори за закуп на земјоделско земјиште во државна сопственост
Дополнителниот замени министер за земјоделство, шумарство и водостопанство Цветан Трипуновски на својата фејсбук страна објави дека ги потпишал првите 16 договори за закуп на земјоделско земјиште во државна сопственост.
Во својата објава Трипуновски вели: „Почитувани земјоделци, штотуку ги потпишав првите 16 договори за закуп на земјоделско земјиште во државна сопственост, нека е аирлија!“
Трипуновски во неколку наврати ја алармираше јавноста дека во Република Македонија постојат договори за закуп на земјоделско земјиште во државна сопственост кои истекуваат оваа година, но на истите не им е овозможено продолжување и дека Николовски го кочи продолжување со образложение дека се потребни законски измени на законот за земјоделско земјиште.
„Сепак на крајот успеавме да го реализираме нашиот предлог за разрешница на овој проблем по многу побрза и поедноставна постапка, наспроти тврдењата на министерот Николовски кој постојано, од непознати причини, тврдеше дека се потребни измени на законот за земјоделско земјиште и дека со анексирање на договорите не се решава овој проблем. Со ова само се докажа дека Николовски повторно ве лаже како што тоа го прави изминативе 7 години“, дополни Трипуновски.
Позитивно е тоа што овој голем проблем доби решение и засегнатите земјоделци конечно ќе можат да ги продолжат своите договори согласно законските регулативи. Со ова Трипуновски покажа дека ќе биде предводник во промените и решавањето на проблемите во македонското земјоделство.
„ВМРО-ДПМНЕ секогаш било и ќе биде на страната на македонските земјоделци, доколку ние не го изнесовме овој проблем во јавноста, СДС и Николовски никогаш немаше да ги продолжат овие договори на вредните македонски земјоделци или пак тоа ќе го правеа селективно и повторно земјоделското земјиште ќе завршеше кај луѓе што не се земјоделци или истото ќе го трансформираа за плантажи со фотоволтаици. ВМРО-ДПМНЕ секогаш ќе може гордо и со крената глава да биде помеѓу светиниколчани и сите земјоделци во Република Македонија“, заврши Трипуновски во својата објава.