Економија
Заев со Организацијата на работодавачи: Дијалог и партнерство за задоволни работници и работодавачи
Државата е стабилна и финансиски ликвидна, треба да сметате на својата Влада на својата држава, тука сме да помогнеме, истакна премиерот Зоран Заев во воведното обраќање на настанот по повод Собранието на Организацијата на работодавачи на Македонија.
„Испраќам порака на соработка со Организацијата на работодавачи, со сите компании во нашата земја, низ дијалог да ги изнаоѓаме секој пат решенијата“, рече Заев.
Тој имаше учество и на дебатата на тема „Македонската економија пред и по пандемијата“ и ги истакна придобивките од економските мерки кои Владата ги презеде за намалување на ефектите од пандемијата.
„Сакам да потенцирам дека растот и развојот на државата е возможен само преку приватна иницијатива и продолжувањето на инвестиционите активности, соодветно поставени на потребите кои ги носи модерното време. Трета деценија од 21 век е, Ковид-19 и сите новини коишто доаѓаат се предизвик за приватниот сектор, предизвик и за работниците, како и за државата. Во вакви околности сме поттикнати да соработуваме и јас верувам дека ќе бидеме мудри да соработуваме, затоа што колку повеќе бизнис секторот оди напред се случуваат нови инвестиции и се фаќа чекор со модерното ново време, толку повеќе ќе бидат задоволни и работниците. На тој начин се ствара основа и за постабилни плати, но и за повисоки плати. Од тој аспект државата може да биде само задоволна, кога се задоволни работниците и работодавачите. Ние сме ја исполниле нашата мисија да бидеме доволно добар административен апарат којшто ќе им служи на сите важни структури во општествово“, рече Заев во своето обраќање.
Според неговите оценки, економиите како што рече, се менуваат и треба да фаќаме чекор со светот за да бидеме поконкурентни и поприсутни на странските пазари.
„Државата ви е партнер, стабилни плати и раст на работните мести како и намалување на невработеноста во државата е возможно преку приватниот сектор. Државата може да биде поттикнувач, поддржувач преку капиталните инвестиции, преку брзи механизми, преку отфрлање на административните бариери, но секаде како во демократскиот свет така и кај нас, ако растат компаниите, ако се конкурентни и продуктивни, бенефитот одма доаѓа и за работниците, а согласно со тоа и за државата. Втората важна работа е преструктурирањето коешто мора да го направиме. Гледате дека не само пандемијата, туку и самиот почеток на третата деценија од 21 век даде фокус на многу значајни елементи коишто треба да донесат мултиплицирачки позитивни ефекти во општеството. Доминантна е зелената агенда којашто треба да ја следиме сите, затоа што дефинитивно покажува профитабилност во инвестициите, покажува можност да се продаде тоа што се произведува на слободниот пазар, но истовремено и можност за отворање на работни места. Потоа следи енергетската ефикасност, односно заштеда на енергијата, а третиот дел е дигитализацијата“, нагласи Заев.
Министерката Јагода Шахпаска во своето обраќање истакна дека како и до сега за да се постигне стабилност и развој на македонската економија, неопходно е да му се овозможи на бизнис секторот да учествува во подготовката на мерките и решенија за надминување на кризата.
„Социјалните партнери се сржта на економски стабилно, просперитетно општество и затоа за нас како Влада од клучна важност е стабилниот социјален дијалог помеѓу работодавачите и работниците. Заеднички ги креиравме шесте пакети финансиска помош, трудејќи се секој нареден да е подобар од претходниот. И бизнис заедницата и работниците учествуваа постојано со свои сугестии и коментари, и доказ за успешноста на помошта се над 80.000 зачувани работни места и над 4.000 компании кои беа финансиски поддржани“, рече Шахпаска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.
Економија
Трипуновски: Ги потпишав првите 16 договори за закуп на земјоделско земјиште во државна сопственост
Дополнителниот замени министер за земјоделство, шумарство и водостопанство Цветан Трипуновски на својата фејсбук страна објави дека ги потпишал првите 16 договори за закуп на земјоделско земјиште во државна сопственост.
Во својата објава Трипуновски вели: „Почитувани земјоделци, штотуку ги потпишав првите 16 договори за закуп на земјоделско земјиште во државна сопственост, нека е аирлија!“
Трипуновски во неколку наврати ја алармираше јавноста дека во Република Македонија постојат договори за закуп на земјоделско земјиште во државна сопственост кои истекуваат оваа година, но на истите не им е овозможено продолжување и дека Николовски го кочи продолжување со образложение дека се потребни законски измени на законот за земјоделско земјиште.
„Сепак на крајот успеавме да го реализираме нашиот предлог за разрешница на овој проблем по многу побрза и поедноставна постапка, наспроти тврдењата на министерот Николовски кој постојано, од непознати причини, тврдеше дека се потребни измени на законот за земјоделско земјиште и дека со анексирање на договорите не се решава овој проблем. Со ова само се докажа дека Николовски повторно ве лаже како што тоа го прави изминативе 7 години“, дополни Трипуновски.
Позитивно е тоа што овој голем проблем доби решение и засегнатите земјоделци конечно ќе можат да ги продолжат своите договори согласно законските регулативи. Со ова Трипуновски покажа дека ќе биде предводник во промените и решавањето на проблемите во македонското земјоделство.
„ВМРО-ДПМНЕ секогаш било и ќе биде на страната на македонските земјоделци, доколку ние не го изнесовме овој проблем во јавноста, СДС и Николовски никогаш немаше да ги продолжат овие договори на вредните македонски земјоделци или пак тоа ќе го правеа селективно и повторно земјоделското земјиште ќе завршеше кај луѓе што не се земјоделци или истото ќе го трансформираа за плантажи со фотоволтаици. ВМРО-ДПМНЕ секогаш ќе може гордо и со крената глава да биде помеѓу светиниколчани и сите земјоделци во Република Македонија“, заврши Трипуновски во својата објава.