Економија
Како максимално да ги искористите светлата на вашиот автомобил во зима
Часовниците се поместија за еден час наназад, а многу луѓе ќе патуваат од работа до дома во темница. И покрај тоа што има помал патен сообраќај во текот на ноќта, ова е период кога се случуваат 30% од сите несреќи во Европа. Во ситуации на слаба видливост, важно е да знаете како да ги користите светлата на вашето возило. Маите Париз, кој е задолжен за развој на светлата и фаровите во SEAT, објаснува како светлата на вашето возило да ги користите ефективно.
„Нема причина да не се вклучуваат долгите светла, тие се дозволени само на меѓуградски патишта со мала видливост, но многу возачи не ги користат поради страв од преголема светлина во сообраќајот. Меѓуградските патишта се местата каде што помошта од долги светла се од корист“, објаснува Маите.
Системот за светла на SEAT автоматски детектира присуството на возила во двете насоки и автоматски ги префрла светлата од долги, кон соборени, обезбедувајќи дополнителна удобност и безбедност, се наведува во соопштението.
Луѓето во градот Рјукан, Норвешка, живеат 6 месеци во темнина бидејќи не добиваат сончева светлина од септември до март и на места како Рујкан, соборени светла се задолжителни 24 часа на ден, велат од компанијата. Од друга страна, во земји како што е Шпанија, соборени светла се користат само во текот на ноќта или во текот на денот кога има слаба видливост, на пример во тунел или под силен дожд.
„Кај нас, во Македонија, задолжителни соборени светла се користат во периодот од месец ноември до март, кога времето и видливоста се намалени. Во овие ситуации, опцијата аuto го прави возењето поудобно бидејќи автоматски ги активираат соборените светла“, уверува овој инженер.
„Со додавањето на LED-светлата, не само што штедиме на потрошувачката туку и ја подобруваме безбедноста“, вели Маите. Овој вид осветлување е повеќе сличен на дневна светлина од халогенска светилка. LED-светилките, исто така, реагираат 150 милисекунди побрзо од светилката со халоген, што значи дека LED-диодата на сопирачката се активира 5 метри порано, при возење со брзина од 120 км/ч. Освен тоа, тие се дизајнирани да траат низ целиот животен век на возилото и да не се менуваат.
Една честа грешка што ја прави возачот е да ги вклучи задните светла за магла преку ден кога врне малку. Овој експерт посочува дека светлата за магла треба да бидат вклучени само во ситуации кога има мала видливост, како што е обилниот дожд или густата магла, што е и обврзувачко со нашите закони. Неправилна употреба може да ги заслепи и да им пречи на останатите возачи во сообраќајот. Ако вашиот автомобил е опремен со предни светла за магла, најсоодветно е да ги користите во случаи на слаба видливост, како што е тежок или многу пороен дожд, магла, снег или прав и чад облаци, како и на тесни ликвидни патишта.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.