Економија
Ковачевски: Планот за справување со енергетската криза не предвидува рестрикции на струја
Премиерот Димитар Ковачевски, за договорот со Бугарија за справување со последиците од енергетската криза изјави дека со нашиот сосед е разговарано за обезбедување на базна електрична енергија, од 200 мегавати капацитет на час и дека веќе од утре ќе работи заедничка работна група од ресорните министерства и компании со цел таа идеја да се реализира, по што се очекува да обезбеди доволно електрична енергија за стопанството.
„Треба да се направи дополнителна категоризација на самите компании коишто се на либерализираниот пазар, бидејќи тука има производствени компании коишто произведуваат храна и неопходни производи за граѓаните и други компании коишто исто така произведуваат значајни производи и се во различни производствени или услужни сектори, како што се на пример градежните компании, компаниите во ТИРЗ. Има и компании коишто во други услуги, како што се на пример синџир на маркети, аптеки, бензински пумпи, приватни болници, рудници, банки, осигурителни компании и соодветно на тоа ние како држава мора да обезбедиме електрична енергија којашто ќе овозможи непречено снабдување за истите“, посочи Ковачевски.
На прашањето дали поради енергетската криза во иднина се размислува за рестрикции и дали некој ќе понесе одговорност за апсолутно застарената опрема на капацитетите кои произведуваат електрична енергија, Ковачевски оцени дека овој план кој е направен е конципиран со цел да нема рестрикции.
„Во моментов за целиот регулиран пазар ЕСМ испорачува енергија од сопствено производство, за сите домаќинства и сите мали потрошувачи и не правиме ниту еден ват увоз за таа намена. Во однос на капацитетите, во нашата земја не е инвестирано во големи енергетски капацитети од денот на нејзината независност. Единствено се направени ветерници кои не произведуваат базна енергија и хидроцентрали кои се користат за обезбедување баланс на енергија, затоа што акумулациите се на 50% заради климатските промени и сушата.
Овој план исто така има и финансиска димензија, што значи дека државата ќе треба да обезбеди ликвидни средства за електро-енергетскиот сектор со цел да бидат обезбедени авансните плаќања, бидејќи во моментов на електро-енергетските пазари сè се плаќа авансно, поради недостиг на ресурсите. Сето ова е со цел договарање и стартирање на 24-часовно производство на електрична и топлинска енергија во ТЕ-ТО, како и за обезбедување суровини за производство на електрична енергија во РЕК Битола, Осломеј и ТЕЦ Неготино“, истакна Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.