Економија
Компаниите ги поздравуваат економските мерки за поддршка на бизнисот
Министерот за економија, Крешник Бектеши, денеска оствари работна посета на компанијата „Даути комерц“ во општина Сарај, која претставува афирмирано акционерско друштво, како и една од најуспешните и потврдени компании во земјата и пошироко.
Министерот Бектеши на средбата со раководството на компанијата, на која присуствуваше и градоначалникот на општина Сарај, Блерим Беџети, се согласи дека клучот на секој успех е несомнено работењето со посветеност, што резултира со зајакнување на позицијата на компанијата на познати пазари во регионот и пошироко.
„Како што знаете, Даути има големо искуство во деловното работење и го информирав за посветеноста на Министерството за економија во реализацијата на економски проекти и програми во нашата земја, каде што најважен сегмент е имплементацијата на мерките од планот за економски раст. И една од целите за промовирање на инвестициите е да им дадеме можност на домашните компании да инкорпорираат нови технологии во нивните производствени процеси и да градат капацитет за развој на деловни односи со странски компании и продирање на нивните производи на поголемите пазари“, рече Бектеши.
„’Даути комерц’ во своето долгогодишно работење како семеен бизнис ги исполнува сите стандарди на сериозна компанија, која благодарение на досега постигнатите резултати на пазарот во земјата и странство има значително влијание врз бизнис-климата кај нас што верувам и се надевам дека ќе го следат и други компании бидејќи успешните параметри на овие компании значат економски раст и успех за нашата економија“, рече по овој повод Бектеши.
Министерството за економија, изјави Бектеши, ќе продолжи да ги поддржува особено малите и средните претпријатија за кои само оваа година се одвоени средства за 81 компанија во вредност од 20 милиони денари, главно за набавка на опрема, алати или за проширување на производството или дејноста.
Еден од сопствениците на „Даути комерц“, Џемали Даути, се заблагодари на посетата на министерот за економија Бектеши и на неговата морална поддршка која постојано ја има од Министерството за економија со фактот дека оваа компанија доби трипати награда како компанија со најдобра општествена одговорност и дека ваквата поддршка ќе биде мотив за освојување уште поголеми пазари.
Бектеши во оваа пригода уште еднаш апелира до нашите компании активно да ги следат јавните повици за мерки што се дел од владината програма за економски раст и да не се двоумат да аплицираат под пропишаните услови за на овој начин да придонесат за економски раст и подобар стандард за сите граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.