Економија
Маричиќ и Битиќи на состанок со секторската работна група за конкурентност и иновации
Заменик-претседателот на Владата задолжен за европски прашања, Бојан Маричиќ, заедно со заменик-претседателот на Владата задолжен за економски прашања, Фатмир Битиќи, одржа координативен онлајн-состанок со секторската работна група за програмирање на Инструментот на ЕУ за претпристапна помош (ИПА) во областа на конкурентност и иновациите за периодот 2021-2027 година.
Маричиќ на состанокот ја потенцира важноста приоритетите и планирањето на проектите да бидат базирани врз главниот стратешки документ и на овој начин да се насочи донаторската координација во служба на националните приоритети, вклучително и процесот на интеграција во ЕУ во целина, акцентирајќи ја потребата од учеството на граѓанските организации на состаноците на секторските работни групи.
„Мора да имаме координација во планирањето и одредувањето приоритети на стратешко ниво со цел да обезбедиме комплементарност и синергија на помошта од донаторите и што е најважно – да избегнеме удвојување на помошта. За ова мора да ги имаме предвид реформите поврзани со интеграцијата во ЕУ, планирани во Националната програма за усвојување на правото на ЕУ, како сеопфатен национален стратешки и програмски документ за водење на процесот на европска интеграција, како и Националниот план за развој, кој е во тек, и Програмата за економски реформи“, посочи Маричиќ.
Битиќи, рече дека имаат специфична задача – да дефинираат што е најважно за секторот за следните години и што ќе се финансира на среден период со најдобри ефекти за што ги повика сите фактори од јавниот и од приватниот сектор, заедницата на граѓански организации, донаторската заедница и, секако, Европската комисија, да земат учество во градењето општествен консензус и да ги здружат напорите и ресурсите за заеднички да го постигнат најдоброто за нашата земја.
„Стратешкиот одговор на Северна Македонија за периодот 2021 – 2027 година за прозорецот 4, кој опфаќа конкурентност и инклузивен раст, и поконкретно тематскиот приоритет 2, кој се однесува на развојот на приватниот сектор, трговија, истражување и иновации, утврдува три цели преку кои земјата треба да се подготви за европскиот внатрешен пазар, да се подобри регулаторната и институционалната рамка за деловно работење и инвестиции, да се зголеми конкурентноста на претпријатијата, да се зајакнат извозот и диверзификацијата, интернационализацијата на економијата, а истовремено да се одговори на предизвиците на циркуларната економија/зелената економија, а се тоа преку зајакнато истражување, технолошки развој и иновации“, истакна Битиќи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.