Економија
Николовски: Отворање откупни центри и сигурен пласман за земјоделските производи
Mинистерот за земјоделство, шумарство и водостопанство, Љупчо Николовски, заедно со директорот на Агенцијата за финансиска поддршка во земјоделството и руралниот развој, Николче Бабовски, и со директорот на Државниот инспекторат за земјоделство, Јане Станкоски, во Струмица присуствуваа на трибина за моментната состојба со градинарското производство и откупот на земјоделските производи. На трибината присуствуваa земјоделци и откупувачи на земјоделски производи од Струмичкиот Регион.
На трибината беа презентирани политиките на Владата на Република Македонија за развој на земјдоелството, како и мерките за поддршка на градинарското производство.
Министерот Николовски посочи дека во следниот период интензивно ќе се работи на отворање нов откупно-дистрибутивен центар во Струмица и наоѓање нови пазари за пласман на земјоделските и градинарските производи. На трибината земјоделците се интересираа до каде е процесот за ревизија на даденото земјоделско земјиште под концесија бидејќи, според нив, дадените површини во изминатите години не се обработуваат целосно, а дополнително истото земјиште се издава под закуп.
Прозводителите на јапонска јаболка побараа намалување на цената на сертификатот за извоз „Глобал габ“, а голем интерес беше искажан и за плаќањето на персоналниот данок, односно за ослободувањето на земјоделските производители што остваруваат до еден милион денари. Некои од претставниците на земјоделските здруженија побараа да учествуваат во донесувањето на земјоделските политики, да има заштитени откупни цени, а во креирањето на даночната политика да учествуваат и земјоделците. Тие побараа, покрај таканаречената зелена нафта, да добиваат субвениции и за бензинот бидејќи голем дел од површините во Струмичко се наводнуваат со пумпи што работат на бензин.
„Знаеме за неискористеноста на државното земјоделско земјиште дадено под закуп, а ревизијата го заврши извештајот кој е доставен до мене и според него ќе преземеме конкретни мерки. Отворивме и кол-центар во Министерството со цел ваквите конкретни состојби што ги знаете да ги пријавите. Во овој период имаме раскинати договори и еден таков е за површина од 700 хектари, а има и многу други“, изјави министерот Николовски.
Притоа, министерот Николовски посочи дека интензивно се работи на отворањето нови пазари и дека се создадени нови контакти и можности за пласман и извоз на македонските земјоделски производи.
„Има резултат посетата на премиерот на владата на Република Турција, каде што се разговараше конкретно за извозот на нашето јагне. Со египетскиот министер за земјоделство, и покрај високите царини, се договоривме на наше писмено барање да понудиме што ќе извеземе и царините да бидат сведени на минимум. Очекуваме една голема делегација од Катар, особено во делот на земјоделството, со која ќе разговараме за извоз и пласман на нашите производите“, посочи Николовски.
Тој рече дека моделот на заеднички средби со сите фактори во земјоделскиот сектор и надлежните институции од секторот е важен за навреме да се решаваат сите отворени проблеми, но и за креирањето на идните политики на Министерството за земјоделство, шумарство и водостопанство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Рекорден трговски дефицит во 2023 година во износ од 436 милиони евра
Дополнителниот заменик-министер за земјоделство, шумарство и водостопанство, Цветан Трипуновски, преку фејсбук-објава извести за рекорден трговски дефицит во 2023 година за земјоделско-прехранбени производи во висина од 436 милиони евра.
„Рекорден трговски дефицит во 2023 година во износ од 436 милиони евра. Еве како СДС го уништува македонското земјоделство, Македонија со СДС стана земја увозно зависна од храна. Негрижата за македонските земјоделци и тотално погрешните земјоделски политики на СДС ги принудија земјоделците да го напуштат полето, а со тоа македонските граѓани да јадат увозни земјоделски производи, Македонија од земја извозник стана земја увозник на храна под власта на СДС. Земјоделците ќе имаат вистински партнер во новата влада на ВМРО-ДПМНЕ и заедно ќе го вратиме македонското земјоделство во онаа препознатлива состојба, а Македонија повторно ќе биде земја извозник на храна“, рече Трипуновски.
Економија
Надворешен долг, побарувања и меѓународна инвестициска позиција во четвртото тримесечје од 2023 година
Објавено е редовното статистичко соопштение за позначајните промени кај надворешниот долг, надворешните побарувања и меѓународната инвестициска позиција.
На крајот на четвртиот квартал од 2023 година:
На 31.12.2023 година, нето надворешниот долг изнесува 4.458 милиони евра (или 32,6% од проценетиот БДП). Нето надворешниот долг на земјата, во четвртиот квартал од 2023 година, е зголемен за 305 милиони евра, или за 7,3%. Од аспект на структурата, приватниот нето-долг и натаму има поголемо учество во вкупниот нето-долг со 67%.
Во текот на четвртиот квартал од 2023 година, негативната нето меѓународна инвестициска позиција (МИП) е зголемена за 160 милиони евра и изнесува 8.500 милиони евра, односно 62,2% од проценетиот БДП за 2023 година.
Најновото соопштение за позначајните промени кај надворешниот долг, надворешните побарувања и меѓународната инвестициска позиција е достапно на следниот линк.
Економија
Во вториот квартал од 2025 година стапката на противцикличниот заштитен слој на капиталот ќе остане 1,5 отсто, одржана седница на Советот на Народната банка
Советот на Народната банка, на својата редовна седница, одржана на 28 март 2024 година, врз основа на редовната квартална оцена на системските ризици, донесе одлука за задржување на стапката на противцикличниот заштитен слој на капиталот за изложеностите на банките во Република Северна Македонија во висина од 1,5%, којашто ќе се применува и во вториот квартал од 2025 година. Одлуката се заснова врз оцените за постепено стабилизирање на нагорните циклични системски ризици и постојана стабилност на банкарскиот систем. Исто така, ги зема предвид условите од окружувањето коешто и натаму е неизвесно и придружено со ризици, што е причина за претпазливо спроведување на макропрудентните мерки заради натамошно јакнење на отпорноста на банкарскиот сектор. Со одржувањето на стапката на противцикличниот заштитен слој на капиталот се придонесува за спречување и за намалување на можните ризици.
Народната банка ќе продолжи со внимателно следење на системските ризици и ќе ја преоценува висината на стапката на противцикличниот заштитен слој на капиталот на редовна квартална основа. Притоа, имајќи ја предвид природата на противцикличниот заштитен слој на капиталот и насоките на релевантните европски институции, Народната банка може да ја оцени потребата за зголемување на стапката, при раст на ризиците и неизвесностите од окружувањето, во услови на поволни остварувања на банките. Во случај, пак, на значително остварување на ризиците во билансите на банките, може да се оцени и потребата од делумно или целосно ослободување на овој заштитен слој на капиталот, како поддршка во работењето на банките при евентуални неповолни сценарија.
Советот на Народната банка на седницата разгледа и други материјали поврзани со работата на централната банка.