Економија
НЛБ банка Скопје во соработка со „Триглав осигурување живот“ лансира нов производ Unit Linked – осигурување живот со инвестиции
НЛБ Банка Скопје, во соработка со Триглав Осигурување Живот, ја збогатува својата понуда на небанкарски финансиски производи и воведува нов производ – Unit Linked, продажба на осигурителни полиси за инвестициско осигурување на живот.
Unit Linked е производ преку кој средствата на клиентот се вложуваат во инвестициски фондови, со истовремено издавање на полиса за животно осигурување. Притоа клиентот, согласно своите можности и потреби, го избира износот на осигурената сума. Исто така, клиентот согласно своите преференци може да избере помеѓу два осигурителни продукти: осигурување на живот со или без штедна компонента. За целото времетраење на договорот, клиентот има животно осигурување на договорената сума, а по истекот на договорот, износот кој му се исплаќа ја содржи осигурената сума, како и остварениот принос по основ на инвестиции.
Партнерството помеѓу двете компании беше официјализирано со формално потпишување на договор за соработка од страна на Претседателот на Управниот одбор на НЛБ Банка Скопје, Антонио Аргир и Генералната директорка на Триглав Осигурување Живот, Вилма Учета Дузлевска на кое присуствуваа и членови на управата на НЛБ Банка Скопје и управата на Заваровалница Триглав – матичната компанија во Групацијата Триглав.
„НЛБ Банка Скопје, во партнерство со Триглав Осигурување Живот, уште еднаш ја потврдува заложбата за воведување на нови, современи производи и е првата Банка на пазарот која во своето портфолио на финансиски производи воведува инвестициско осигурување на живот. Воведувањето на новиот производ е во согласност со стратегијата на Банката за унапредување на понудата и овозможување на сеопфатни финансиски услуги за клиентите. При тоа, Банката, во улога на финансиски супермаркет, ќе може да понуди сеопфатно финансиско советување и оптимално управување со средствата на клиентите, со што обезбедува производи за моментални финансиски потреби и идна финансиска стабилност. Во услови кога каматните стапки на традиционалните депозитни производи го имаат достигнато историски најниското ниво до сега, воведувањето на иновативни финансиски производи е уште позначајно, бидејќи на овој начин на клиентите им овозможуваме различни можности за инвестирање на сопствените средства. Unit Linked производот нуди двојна придобивка, осигурување на живот и можност за остварување на дополнителен принос на вложените средства преку нивно инвестирање во инвестициски фондови. Силно веруваме дека преку соработката со Триглав Осигурување Живот, во кој препознавме сигурен деловен партнер, ќе овозможиме и други иновативни производи во интерес на нашите клиенти“, истакна Антонио Аргир, Претседател на Управниот одбор на НЛБ Банка Скопје, на потпишувањето на договорот.
Давид Бенедек, член на Управата на Заваровалница Триглав, Матична куќа на Групацијата Триглав, ја поздрави иницијативата за партнерство, го честита потпишувањето на договорот за соработка и истакна:
„Ја цениме соработката со НЛБ Банка како значаен деловен партнер и со неа ги потврдуваме нашите намери за присуство и зајакнување на Триглав како осигурителен партнер на пазарот за осигурување и преку банко-каналот. Во некои земји низ регионот со НЛБ Банка успешно соработуваме. Силно верувам дека ова е само почеток на успешна меѓусебна деловна соработка во еден нов сегмент од осигурувањето, и дека истата ќе расте и ќе се развива како на овој така и на другите пазари каде што сме присутни. Активно сме насочени кон зајакнување на позицијата на целните пазари, а она што може да гарантираме со нашата традиција е квалитет и стандарди во работата што ги негуваме како Групација“.
За директорката на Триглав Осигурување Живот, новиот производ, кој произлегува од соработката со НЛБ Банка Скопје, претставува значајна новина која ќе придонесе за збогатување на понудата на домашниот пазар на финансиски услуги.
„Нѐ радува соработка со НЛБ Банка Скопје бидејќи во неа гледаме начин за подигнување на стандардите во понудата на производите за осигурување на живот поврзани со удели во инвестициски фондови. Банките традиционално се предводници во финансискиот сектор на овој пазар, компаниите за животно осигурување стануваат значаен сегмент во финансиската структура на земјата, а инвестициските фондови се сѐ поприфатлив избор при алоцирање на инвестициите. Поврзувањето на сите три сегменти на овој пазар на граѓаните ќе им донесе нова и квалитетна понуда, со транспарентен пристап во достапноста на информациите и високо ниво на корисничко искуство. Како Компанија сме посветени на јакнење на банко осигурувањето и препознатливи по иновативниот пристап на пазарот. Овој производ е целосно ориентиран кон клиентите, сами ќе одлучуваат за висината на осигурувањето и висината на инвестицијата, а ние ќе бидеме клучна поддршка во целиот процес. Со НЛБ Банка Скопје градиме цврсти деловни релации и уверени сме дека ова партнерство ќе овозможи уникатен пристап и понуда од која придобивки ќе имаат сите наши сегашни и идни клиенти“, истакна Вилма Учета Дузлевска, Генерален директор на Триглав Осигурување Живот на потпишувањето на договорот.
Производите кои во следниот период ќе бидат предмет на оваа соработка меѓу НЛБ Банка Скопје и Триглав Осигурување Живот се: Ризико осигурување на живот врзано со инвестициски фондови и Мешано осигурување на живот (со штедна компонента) врзано со инвестициски фондови, при што клиентите може да ја одберат опцијата за еднократна или повеќекратна уплата на премијата за времетраење на договорот.
(ПР текст)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.