Економија
Санаата на Ласкова демантира дека е поврзана со компанијата „Декодикс“, која доби грант од 320.000 евра
Христина Керкез, снаата на советничката за култура на премиерот, Цветанка Ласкова, демантира дека има некаква поврзаност со компанијата „Декодикс“, на која ѝ беше одобрен грант од 320.000 евра од Фондот за иновации. Таа испрати демант по објавата на текстот со наслов „За грантот на снаата на Ласкова одлучувачите се двоумат една недела“.
„Ниту јас, Христина Керкез, ниту членови на моето потесно семејство немаат некаква поврзаност со компанијата ’Декодикс’, така што изнесената информација претстатвува лага. Овие факти сте можеле да ги потврдите со барање информации за сопственичката структура на компанијата во Централниот регистар на Република Македонија, што очигледно не сте го сториле, па поради тоа објавувате лажни информации“, стои во демантот од Керкез.
За поврзаноста на компанијата „Декодикс“ со советничката Ласкова, информира Фондот за иновации кога под притисок на јавноста од сите што добија грант побара изјави за поврзаност со функционерите. Во изјавата компанијата „Декодикс“, според Фондот за иновации, пријавила поврзаност на Христина Керкез како дел од сопственичката структура со советничката Ласкова. Таквата изјава беше причина Фондот во август лани да не потпише договор со „Декодикс“, туку апликацијата уште еднаш да оди на одлучување пред Комитетот за одобрување инвестиции во Фондот за иновации. Веднаш по изјавата за поврзаност со Ласкова, „Декодикс“ го извести Фондот и дека снаата на советничката на премиерот се иззема од сопственоста.
Од сопственоста се иззема и сопругата на актуелниот министер за култура, на која преку компанијата „Т-сенс“ ѝ беше одобрен грант од Фондот за иновации заедно со одобрениот грант на снаата на Ласкова. Но, Фондот за иновации во неколку наврати соопшти дека ќе се разгледуваат апликациите за грантови во форма какви што биле во моментот на аплицирање.
Поврзанота на компанијата „Декодикс“ со советничката Ласкова, заедно со уште три компании што пријава поврзаност со функционери, беше причина Фондот за иновации да изработи протокол за процена на ризик кај компании што ќе се изјаснат дека се поврзани со носители на јавни функции. Применувајќи го протоколот, „Транспаренси интернешнл – Македонија“, како надворешен соработник на Фондот за иновации, кај „Декодикс“ утврди среден ризик од влијанието на Ласкова, кој се доближува до висок ризик. Врз основа на оваа процен на ризик, Комитетот за одобрување инвестиции треба да донесе одлука дали „Декодикс“ ќе ги добие парите од грантот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.