Економија
Туризмот има потенцијал, потребна е системска поддршка
Потребна е стратешка акција на сите чинители во општеството за да се подобри сликата за екологијата во земјава, изјави претседателот на Туристичко–угостителската комора (ТУК), Владимир Граматиков.
„Главна тема посебно актуелна период е загадување на воздухот, а актуелна во текот на цела година е отпадот, кој буквално го има насекаде, како во централните градски подрачја, така и во приградски средини, рурални и планински места. Екологијата е огромен непријател, а треба да биде пријател број еден на туризмот. Кога се работи за туризмот, тоа не е дозволиво. Нашето барање е сите ресорни институции да преземат сериозни чекори кон подобрување на оваа ситуација. Бараме иницирање на кампања за подигнување на еколошката свест кај граѓаните, и тоа: за фрлање отпадоци онаму каде што им е местото, собирање на изметот од милениците, чување на урбаната опрема и санкционирање на вандализмот“, изјави Граматиков и додаде дека Министерстовото за животна средина, комуналните претпријатија, локалните власти, треба да организираат долгорочни кампањи кои ќе имаат реален ефект, понатаму да се воведат и инспекции, за да се казни несоодветно постапување.
Претседателот на Националната асоцијација за дојдовен туризам (НАИТМ), Влатко Сулев, ја најави претстојната Македонската туристичка берза, (12-13 декември 2019) модел кој се применува во развиените држави како можност сите чинители да се соберат на едно место, да разменат идеи и да се информираат за новитетите во индустријата.
„Настанот на годината во областа на тузимот, единствен од овој тип во регионот, е четвртата туристичка берза и третата конференција кои се организирани по светски пример, за вмрежување и обединување на дојдовниот туризам. Ќе присуствуваат светски имиња во туризмот, кои верувам дека ќе споделат искуства кои ќе можеме да ги примениме и во земјата. Имплементирање на светските трендови во областа на туризмот значи да се биде во чекор со привлекување на што поголем број туристи. На берзата ќе учествуваат претставници на туристички агенции, хотели, ресторани, винарии, превозници, туристички водичи, музеи и институции“, изјави Сулев.
Александар Кузманоски, член на УО на НАИТМ, истакна дека со развојот на секторот туризам неопходно е сузбивање на нелојалната конкуренција, обединување на сите чинители и имплементирање на барањата кои произлегуваат од секторот.
„Неопходно е системско справување со нелојалната конкуренција која се провлекува години наназад, а претставува сериозен проблем кој треба соодветно да се третира. Веруваме дека новото законско решение кое е во процедура ќе се имплементира соодветно со прифаќање на нашите барања. Стоиме на располагање на институциите за надминување на предизвиците во секторот со цел развој на туризмот и негово поголемо учество во БДП“, изјави Кузманоски.
Минатата година во земјава се регистрирани над еден милион туристи, со три милиони ноќевања, а туризмот учествува со три проценти во БДП.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.
Економија
Трипуновски: Ги потпишав првите 16 договори за закуп на земјоделско земјиште во државна сопственост
Дополнителниот замени министер за земјоделство, шумарство и водостопанство Цветан Трипуновски на својата фејсбук страна објави дека ги потпишал првите 16 договори за закуп на земјоделско земјиште во државна сопственост.
Во својата објава Трипуновски вели: „Почитувани земјоделци, штотуку ги потпишав првите 16 договори за закуп на земјоделско земјиште во државна сопственост, нека е аирлија!“
Трипуновски во неколку наврати ја алармираше јавноста дека во Република Македонија постојат договори за закуп на земјоделско земјиште во државна сопственост кои истекуваат оваа година, но на истите не им е овозможено продолжување и дека Николовски го кочи продолжување со образложение дека се потребни законски измени на законот за земјоделско земјиште.
„Сепак на крајот успеавме да го реализираме нашиот предлог за разрешница на овој проблем по многу побрза и поедноставна постапка, наспроти тврдењата на министерот Николовски кој постојано, од непознати причини, тврдеше дека се потребни измени на законот за земјоделско земјиште и дека со анексирање на договорите не се решава овој проблем. Со ова само се докажа дека Николовски повторно ве лаже како што тоа го прави изминативе 7 години“, дополни Трипуновски.
Позитивно е тоа што овој голем проблем доби решение и засегнатите земјоделци конечно ќе можат да ги продолжат своите договори согласно законските регулативи. Со ова Трипуновски покажа дека ќе биде предводник во промените и решавањето на проблемите во македонското земјоделство.
„ВМРО-ДПМНЕ секогаш било и ќе биде на страната на македонските земјоделци, доколку ние не го изнесовме овој проблем во јавноста, СДС и Николовски никогаш немаше да ги продолжат овие договори на вредните македонски земјоделци или пак тоа ќе го правеа селективно и повторно земјоделското земјиште ќе завршеше кај луѓе што не се земјоделци или истото ќе го трансформираа за плантажи со фотоволтаици. ВМРО-ДПМНЕ секогаш ќе може гордо и со крената глава да биде помеѓу светиниколчани и сите земјоделци во Република Македонија“, заврши Трипуновски во својата објава.