Економија
Французите се насладуваат на македонските кроасани 4U, дегустатор беше и амбасадорот Тимоние
Францускиот амбасадор, Кристијан Тимоние, минатата недела ја посети фабриката „Жито пром“ во Гевгелија, која неодамна почна да ги извезува своите кроасани 4U во Франција. Гостинот прошета низ погоните и се запозна со процесот на подготовка на кроасаните, кои на крајот и ги дегустираше. Оценувајќи ги како исклучително вкусни, Тимоние, кој доаѓа од земјата во која се измислени кроасаните, беше воодушевен од вкусот на 4U. Амбасадорот беше во „Жито пром“ во рамки на неговата официјална посета на општина Гевгелија.
Освен во Македонија, кроасаните 4U во моментов може да се најдат и на пазарите во Холандија, Германија, Полска, Италија, Грција, Катар, Косово, Албанија, Црна Гора, БиХ, Хрватска, Бугарија и Романија. Од неодамна се достапни и во Франција, во синџирот Action, кој има околу 500 продажни места.
„Го прифативме предизвикот да го ставиме нашиот производ на тест пред францускиот истенчен вкус за кроасани. Нашите кроасани гордо ги декларираме како италијански бидејќи рецептурата е правена според нивни стандарди и насоки, но кога и Французин ќе каже дека му се допаѓа производот тогаш знаеш дека си направил добра работа“, истакнува Татјана Танева-Новаковска од „Жито пром“, додавајќи дека со амбасадорот Тимоние се разговарало за проширување на соработката со Франција на други полиња.
Зборувајќи за производството на 4U, таа посочува дека се користи природен квасец и кроасаните може да се најдат со вкусови на какао, јагода, ванила, кајсија, лешник, како и оние со мешаните вкусови на какао и ванила и вишна и ванила. Додека, најновиот производ се празните кроасани по примерот од Франција.
„Француските кроасани генерално се продаваат празни и се крцкави поради големото количество путер што се користи при нивното производство. Нашите кроасани се меки и лиснати поради различниот состав и начин на производство. Во секој случај, потврдивме и со дегустацијата на амбасадорот дека 4U се превкусни“, додава Танева-Новаковска.
„Жито пром“ годинава го доби интернационалниот сертификат IFS (International Featured Standard) со кој се гарантира врвен квалитет и безбедност на храната. Станува збор за сертификат кој е воведен во 2002 година од германската, француската и италијанската трговска асоцијација и е еден од главните инструменти кои им овозможуваат на прозводителите да извезуваат во земјите членки на ЕУ. Во „Жито пром“ веќе се комплетираше и Kosher стандардот, кој е особено значаен за зголемување на извозот.
Фабриката брои 50 вработени. Пред неколку месеци беше отворен и новиот погон за кроасаните 4U со што се зголеми производството. Идните планови се фокусирани на проширување на производната палета, како и на имплементација на стандарди за квалитет кои се бараат на други пазари надвор од Европа.
(Платена ПР објава)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.
Економија
Трипуновски: Ги потпишав првите 16 договори за закуп на земјоделско земјиште во државна сопственост
Дополнителниот замени министер за земјоделство, шумарство и водостопанство Цветан Трипуновски на својата фејсбук страна објави дека ги потпишал првите 16 договори за закуп на земјоделско земјиште во државна сопственост.
Во својата објава Трипуновски вели: „Почитувани земјоделци, штотуку ги потпишав првите 16 договори за закуп на земјоделско земјиште во државна сопственост, нека е аирлија!“
Трипуновски во неколку наврати ја алармираше јавноста дека во Република Македонија постојат договори за закуп на земјоделско земјиште во државна сопственост кои истекуваат оваа година, но на истите не им е овозможено продолжување и дека Николовски го кочи продолжување со образложение дека се потребни законски измени на законот за земјоделско земјиште.
„Сепак на крајот успеавме да го реализираме нашиот предлог за разрешница на овој проблем по многу побрза и поедноставна постапка, наспроти тврдењата на министерот Николовски кој постојано, од непознати причини, тврдеше дека се потребни измени на законот за земјоделско земјиште и дека со анексирање на договорите не се решава овој проблем. Со ова само се докажа дека Николовски повторно ве лаже како што тоа го прави изминативе 7 години“, дополни Трипуновски.
Позитивно е тоа што овој голем проблем доби решение и засегнатите земјоделци конечно ќе можат да ги продолжат своите договори согласно законските регулативи. Со ова Трипуновски покажа дека ќе биде предводник во промените и решавањето на проблемите во македонското земјоделство.
„ВМРО-ДПМНЕ секогаш било и ќе биде на страната на македонските земјоделци, доколку ние не го изнесовме овој проблем во јавноста, СДС и Николовски никогаш немаше да ги продолжат овие договори на вредните македонски земјоделци или пак тоа ќе го правеа селективно и повторно земјоделското земјиште ќе завршеше кај луѓе што не се земјоделци или истото ќе го трансформираа за плантажи со фотоволтаици. ВМРО-ДПМНЕ секогаш ќе може гордо и со крената глава да биде помеѓу светиниколчани и сите земјоделци во Република Македонија“, заврши Трипуновски во својата објава.