Економија
„ Јунајтед груп“ постигна договор да го купи грчкиот телекомуникациски оператор „Винд Хелас“
„Јунајтед груп“, водечкиот снабдувач на телекомуникациски услуги и медиуми во Југоисточна Европа, објави денеска дека постигнал договор со „Кристал Амонд холдингс лимитид“ за купување на грчкиот телекомуникациски оператор „Винд Хелас“ (Wind Hellas), еден од трите главни мобилни провајдери во земјата.
Винд има вкупно 4,2 милиони корисници, вклучувајќи и 1,1 милиони корисници на мобилен интернет, а нуди и фиксни, интернет и телевизиски услуги. „Винд Хелас“ генерира приходи од над 500 милиони евра годишно.
Трансакцијата ќе и овозможи на „Јунајтед груп“ да го комбинира „Винд’ со постојниот грчки оператор за платена телевизија „Нова“ за да создаде силен конвергиран оператор кој ќе биде играч број два во фиксниот широкопојасен интернет и кај телевизиските услуги.
Делувајќи на атрактивен пазар, со значителен потенцијал за раст, комбинацијата Винд-Нова ќе може подобро да се натпреварува со сегашните лидери на пазарот преку споени понуди, нови технологии и супериорна услуга, зголемувајќи ја вредноста за грчките потрошувачи.
Никос Статопулос, партнер во BC Partners и претседател на „Јунајтед груп“, изјави: „Стекнувањето и интегрирањето на силни локални телекомуникациски и медиумски бизниси во нашата платформа е основен дел од европската стратегија за раст на ‘Јунајтед груп’. Грција е клучен пазар за нас и со стекнувањето на ‘Винд’, ние сме во состојба да создадеме водечки конвергиран оператор и да придонесеме за развојот на грчкиот телекомуникациски сектор преку инвестиции во мрежната инфраструктура, содржината, технологијата и иновативните производи и услуги и да бидеме водечка сила во дигитализацијата на земјата “.
Извршниот директор на „Јунајтед груп“, Викторија Боклаг, рече: „Овој договор ја потврдува долгорочната посветеност на Јунајтед групацијата на грчкиот пазар. Винд, со својот силен бизнис со мобилни телефони, има неверојатна усогласеност со медиумите и експертизата за фиксна телефонија на ‘Нова’ и ‘Јунајтед груп’. Со ‘Винд’, купуваме успешен бизнис што ќе ни овозможи да го зајакнеме нашето присуство и понуда на клиентите низ Грција “.
Трансакцијата е предмет на вообичаени регулаторни одобрувања и се очекува да биде завршена во 2022 година.
За „Јунајтед груп’
„Јунајтед груп“, со седиште во Холандија, е водечки телекомуникациски и медиумски оператор во Југоисточна Европа. Активна во осум земји, компанијата има приближно 11 милиони корисници и речиси 14.500 вработени и генерира приближно 2,0 милијарди евра годишен приход. Јунајтед групацијата има најширока мрежна покриеност во регионот и им нуди на корисниците најатрактивен избор на ТВ-содржини од целиот свет. Значајните инвестиции во дигитална инфраструктура, содржина и технологија обезбедуваат извонредност на производите и услугите што ги обезбедува на клиентите. „Јунајтед груп“ е во мнозинска сопственост од BC Partners, една од најголемите глобални инвестициски компании, од март 2019 година. Инаку, во рамките на „Јунајтед груп“, водечкиот телекомуникациски и медиумски оператор во Југоисточна Европа, во С. Македонија работи компанијата Тотал ТВ.
(ПР-текст)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.
Економија
Трипуновски: Ги потпишав првите 16 договори за закуп на земјоделско земјиште во државна сопственост
Дополнителниот замени министер за земјоделство, шумарство и водостопанство Цветан Трипуновски на својата фејсбук страна објави дека ги потпишал првите 16 договори за закуп на земјоделско земјиште во државна сопственост.
Во својата објава Трипуновски вели: „Почитувани земјоделци, штотуку ги потпишав првите 16 договори за закуп на земјоделско земјиште во државна сопственост, нека е аирлија!“
Трипуновски во неколку наврати ја алармираше јавноста дека во Република Македонија постојат договори за закуп на земјоделско земјиште во државна сопственост кои истекуваат оваа година, но на истите не им е овозможено продолжување и дека Николовски го кочи продолжување со образложение дека се потребни законски измени на законот за земјоделско земјиште.
„Сепак на крајот успеавме да го реализираме нашиот предлог за разрешница на овој проблем по многу побрза и поедноставна постапка, наспроти тврдењата на министерот Николовски кој постојано, од непознати причини, тврдеше дека се потребни измени на законот за земјоделско земјиште и дека со анексирање на договорите не се решава овој проблем. Со ова само се докажа дека Николовски повторно ве лаже како што тоа го прави изминативе 7 години“, дополни Трипуновски.
Позитивно е тоа што овој голем проблем доби решение и засегнатите земјоделци конечно ќе можат да ги продолжат своите договори согласно законските регулативи. Со ова Трипуновски покажа дека ќе биде предводник во промените и решавањето на проблемите во македонското земјоделство.
„ВМРО-ДПМНЕ секогаш било и ќе биде на страната на македонските земјоделци, доколку ние не го изнесовме овој проблем во јавноста, СДС и Николовски никогаш немаше да ги продолжат овие договори на вредните македонски земјоделци или пак тоа ќе го правеа селективно и повторно земјоделското земјиште ќе завршеше кај луѓе што не се земјоделци или истото ќе го трансформираа за плантажи со фотоволтаици. ВМРО-ДПМНЕ секогаш ќе може гордо и со крената глава да биде помеѓу светиниколчани и сите земјоделци во Република Македонија“, заврши Трипуновски во својата објава.