Економија
Груевски: Следната година бавно и постепено, но сигурно заздравување на економијата
Премиерот Никола Груевски изјави дека 2010-та ќе биде година на бавно и постепено, но сигурно заздравување на економијата.
Според него, првите сигнали за надминување на кризата доаѓаат, а за тоа сведочи и објавата на Државниот завод за статистика за раст на индустриското производство во ноември за 4,3 проценти во однос на истиот месец минатата година.
– Растот на индустриското производство е добра вест, добар индикатор дека работите во некоја смисла почнуваат можеби бавно, но сепак да се подобруваат. Тоа е во чекор со она што се случува во светот. Кризата се уште држи во светот, но доаѓаат првите сигнали за нејзино олабавување и можеби следната година постепено закрепнување. Оваа година е година на светска економска криза, се надевам дека следната година ќе биде година на бавно, постепено, но сигурно заздравување, рече Груевски, по денешната промоција на новата серија преведени стручни книги.
Во врска со изјавата на лидерот на ДУИ Али Ахмети дека „нема да се случи трета светска војна, ако спорот за името не се реши за шест месеци“, премиерот одговори дека Ахмети е во тек со сите активности на Владата во однос на напорите да се дојде до решение во спорот за името.
– Тој што е во тек толку блиску и толку прецизно многу добро знае дека правиме максиум за да дојдеме до решение. Претпоставувам, знаејќи ги нашите напори, нашата волја и желба да го решиме тој проблем, знаејќи, исто така, какво е однесувањето во овој период на другата страна, тој во изјавата вели ако правиме се што можеме и не се реши проблемот заради некоја друга причина, тогаш нема да биде голема катастрофа, во смисла ќе ја преживееме и таа година и ќе одиме понатаму, со надеж дека во некоја од наредните години ќе го решиме тоа. Така го разбирам, рече Груевски, коментирајќи ја изјавата на коалицискиот партнер.
Во врска со снимката поставена на Јутјуб за рекет од висок функционер на државната инспекција, Груевски рече дека побарал случајот да се испита.
– Доколку се утврди вина, ќе се побара одговорност и тоа многу сериозна, додаде претседателот на Владата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Рекорден трговски дефицит во 2023 година во износ од 436 милиони евра
Дополнителниот заменик-министер за земјоделство, шумарство и водостопанство, Цветан Трипуновски, преку фејсбук-објава извести за рекорден трговски дефицит во 2023 година за земјоделско-прехранбени производи во висина од 436 милиони евра.
„Рекорден трговски дефицит во 2023 година во износ од 436 милиони евра. Еве како СДС го уништува македонското земјоделство, Македонија со СДС стана земја увозно зависна од храна. Негрижата за македонските земјоделци и тотално погрешните земјоделски политики на СДС ги принудија земјоделците да го напуштат полето, а со тоа македонските граѓани да јадат увозни земјоделски производи, Македонија од земја извозник стана земја увозник на храна под власта на СДС. Земјоделците ќе имаат вистински партнер во новата влада на ВМРО-ДПМНЕ и заедно ќе го вратиме македонското земјоделство во онаа препознатлива состојба, а Македонија повторно ќе биде земја извозник на храна“, рече Трипуновски.
Економија
Надворешен долг, побарувања и меѓународна инвестициска позиција во четвртото тримесечје од 2023 година
Објавено е редовното статистичко соопштение за позначајните промени кај надворешниот долг, надворешните побарувања и меѓународната инвестициска позиција.
На крајот на четвртиот квартал од 2023 година:
На 31.12.2023 година, нето надворешниот долг изнесува 4.458 милиони евра (или 32,6% од проценетиот БДП). Нето надворешниот долг на земјата, во четвртиот квартал од 2023 година, е зголемен за 305 милиони евра, или за 7,3%. Од аспект на структурата, приватниот нето-долг и натаму има поголемо учество во вкупниот нето-долг со 67%.
Во текот на четвртиот квартал од 2023 година, негативната нето меѓународна инвестициска позиција (МИП) е зголемена за 160 милиони евра и изнесува 8.500 милиони евра, односно 62,2% од проценетиот БДП за 2023 година.
Најновото соопштение за позначајните промени кај надворешниот долг, надворешните побарувања и меѓународната инвестициска позиција е достапно на следниот линк.
Економија
Во вториот квартал од 2025 година стапката на противцикличниот заштитен слој на капиталот ќе остане 1,5 отсто, одржана седница на Советот на Народната банка
Советот на Народната банка, на својата редовна седница, одржана на 28 март 2024 година, врз основа на редовната квартална оцена на системските ризици, донесе одлука за задржување на стапката на противцикличниот заштитен слој на капиталот за изложеностите на банките во Република Северна Македонија во висина од 1,5%, којашто ќе се применува и во вториот квартал од 2025 година. Одлуката се заснова врз оцените за постепено стабилизирање на нагорните циклични системски ризици и постојана стабилност на банкарскиот систем. Исто така, ги зема предвид условите од окружувањето коешто и натаму е неизвесно и придружено со ризици, што е причина за претпазливо спроведување на макропрудентните мерки заради натамошно јакнење на отпорноста на банкарскиот сектор. Со одржувањето на стапката на противцикличниот заштитен слој на капиталот се придонесува за спречување и за намалување на можните ризици.
Народната банка ќе продолжи со внимателно следење на системските ризици и ќе ја преоценува висината на стапката на противцикличниот заштитен слој на капиталот на редовна квартална основа. Притоа, имајќи ја предвид природата на противцикличниот заштитен слој на капиталот и насоките на релевантните европски институции, Народната банка може да ја оцени потребата за зголемување на стапката, при раст на ризиците и неизвесностите од окружувањето, во услови на поволни остварувања на банките. Во случај, пак, на значително остварување на ризиците во билансите на банките, може да се оцени и потребата од делумно или целосно ослободување на овој заштитен слој на капиталот, како поддршка во работењето на банките при евентуални неповолни сценарија.
Советот на Народната банка на седницата разгледа и други материјали поврзани со работата на централната банка.