Економија
Слетаа бизнис ангелите
Во Македонија е достапен нов модел за финансирање на старт-ап компании: Центарот за иновации при Проектот на УСАИД за конкурентност ја лансираше првата мрежа на бизнис ангели (Business Angels Network – BAN) во Македонија
Оваа мрежа на бизнис ангели претставува формална мрежа на “ангели” инвеститори – претприемачи и богати поединци подготвени да инвестираат сопствени финансиски средства, знаење, вештини и социјален капитал во нови и иновативни бизнис идеи со потенцијал за висок раст.“Следејќи го примерот на многу земји, бизнис-ангелите се одличен начин за финансирање старт-ап бизниси, особено оние кои се ориентирани кон иновации. Овие ангели обезбедуваат финансирање за претприемачи кои, во нормални услови, не би имале пристап до финансии. УСАИД со задоволство ќе помогне во развивањето мрежа на ангели во Македонија”, вели Роберт Вурц, Директор на мисијата на УСАИД. Новоформираната мрежа на бизнис ангели веќе има 10 членови – бизнис-ангели и десетина предлози за бизнис кои моментално се евалуираат. Со цел да ги направи своите услуги достапни на пошироката јавност, мрежата наскоро ќе објави повик за бизнис-предлози од потенцијални клиенти, како и за нови ангели-инвеститори заинтересирани да се приклучат кон мрежата. Во обид да се поврзат ангелите со можностите за инвестирање во старт-ап бизнисите, ќе биде организирана и вечера со ангели-инвеститори.“Многу надежни проекти разработени од силно мотивирани личности со визија, не го добиваат заслуженото внимание од финансиските институции. Многу претприемачи во стартот не наидуваат на разбирање кај банките за финансирање на нивните проекти. Многу често и во случаи кога тие имаат одлично изработени бизнис планови, банките редовно бараат силни обезбедувања неколку пати повисоки од вредноста на самиот бизнис што се предлага. Така одлични проекти кои би отвориле и по неколку стотици работни места во кратко време не можат да се реализираат. Бизнис ангелите се појавуваат како добра форма за финансирање на старт ап бизнисите, посебно оние кои содржат иновации. Мисијата на нашата група, која е формирана неодамна, е да ги пронајде ангелите и потенцијалните добри проекти. Ангелите, финансирајќи и помагајќи старт на нови проекти и компании на личности со визија и деловен потенцијал, практично го зголемуваат капацитетот на својот постоечки бизнис. Исто така, го подобруваат и добриот глас за нив самите… ”,вели Љупчо Зиков, претседател на Мрежата на бизнис ангели. “Бизнис-ангелите се добро познат и докажан концепт. Некои од најголемите компании вклучувајќи ги Google, Apple и Facebook, започнале на овој начин преку финансирање од страна на бизнис-ангели. Во моментов работиме во партнерство со словенечката мрежа на бизнис-ангели на воведување на овој модел во Македонија”, вели Жарко Поп-Илиев, менаџер на Центарот за иновации при Проектот за конкурентност. /крај/пд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.