Економија
Глобалната експанзија ги зголеми приходите на Зара
Најголемиот светски синџир на продавници за облека на шпанската компанија „Индитекс“, денеска објави големо зголемување на добивката и приходите во првите шест месеци од годинава, што се припишува на постојаното отворање нови продавници и вработувањето повеќе работници.
Најголемиот светски синџир на продавници за облека на шпанската компанија „Индитекс“, денеска објави големо зголемување на добивката и приходите во првите шест месеци од годинава, што се припишува на постојаното отворање нови продавници и вработувањето повеќе работници.Сопственикот на синџирот продавници на облеката од брендот Zara во шестмесечниот период, заклучно со јуни, остварил нето добивка од 717 милиони евра, што е за 14 отсто повеќе во споредба со истиот период минатата година. Нето приходот од продажбата, пак, се зголемил за 12 проценти, на 6,2 милијарди евра. Во кусото соопштение на „Индитекс“ се соопштува дека во првите шест месеци од 2011 година компанијата отворила нови 177 продавници, со што вкупниот број продавници на 78 пазари во различни земји во светот е зголемен на 5.221 објект. Во изминатите 12 месеци, заклучно со јуни годинава, отворени се 9.225 нови работни места, така што компанијата сега вработува вкупно 103.201 човек. Додека луксузните брендови облека главно бележат солидни резултати во периодот на криза, многу од брендовите со цени попристапни до поширокиот дел од населението имаа тешкотии со продажбата.Меѓу другите брендови на „Индитекс“, покрај Zara се и Pull&Bear, Massimo Dutti и Berschka.Групацијата, исто така, објaви дека брендот Zara следните месеци планира влез на пазарите во Јужноафриканската Република, Грузија, Тајван, Азарбејџан и Перу./крај/ро/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Рекорден трговски дефицит во 2023 година во износ од 436 милиони евра
Дополнителниот заменик министер за земјоделство, шумарство и водостопанство Цветан Трипуновски преку „Фејсбук“ објава извести за рекорден трговски дефицит во 2023 година за за земјоделско-прехрамбени производи во висина од 436 милиони евра.
„Рекорден трговски дефицит во 2023 година во износ од 436 милиони евра. Еве како СДС го уништува македонското земјоделство, Македонија со СДС стана земја увозно зависна од храна. Негрижата за македонските земјоделци и тотално погрешните земјоделски политики на СДС ги примора земјоделците да го напуштат полето, а со тоа македонските граѓани да јадат увозни земјоделски производи, Македонија од земја извозник стана земја увозник на храна под власта на СДС. Земјоделците ќе имаат вистински партнер во новата Влада на ВМРО-ДПМНЕ и заедно ќе го вратиме македонското земјоделство во онаа препознатлива состојба, а Македонија повторно ќе биде земја извозник на храна“, рече Трипуновски.
Економија
Надворешен долг, побарувања и меѓународна инвестициска позиција во четвртото тримесечје од 2023 година
Објавено е редовното статистичко соопштение за позначајните промени кај надворешниот долг, надворешните побарувања и меѓународната инвестициска позиција.
На крајот на четвртиот квартал од 2023 година:
На 31.12.2023 година, нето надворешниот долг изнесува 4.458 милиони евра (или 32,6% од проценетиот БДП). Нето надворешниот долг на земјата, во четвртиот квартал од 2023 година, е зголемен за 305 милиони евра, или за 7,3%. Од аспект на структурата, приватниот нето-долг и натаму има поголемо учество во вкупниот нето-долг со 67%.
Во текот на четвртиот квартал од 2023 година, негативната нето меѓународна инвестициска позиција (МИП) е зголемена за 160 милиони евра и изнесува 8.500 милиони евра, односно 62,2% од проценетиот БДП за 2023 година.
Најновото соопштение за позначајните промени кај надворешниот долг, надворешните побарувања и меѓународната инвестициска позиција е достапно на следниот линк.
Економија
Во вториот квартал од 2025 година стапката на противцикличниот заштитен слој на капиталот ќе остане 1,5 отсто, одржана седница на Советот на Народната банка
Советот на Народната банка, на својата редовна седница, одржана на 28 март 2024 година, врз основа на редовната квартална оцена на системските ризици, донесе одлука за задржување на стапката на противцикличниот заштитен слој на капиталот за изложеностите на банките во Република Северна Македонија во висина од 1,5%, којашто ќе се применува и во вториот квартал од 2025 година. Одлуката се заснова врз оцените за постепено стабилизирање на нагорните циклични системски ризици и постојана стабилност на банкарскиот систем. Исто така, ги зема предвид условите од окружувањето коешто и натаму е неизвесно и придружено со ризици, што е причина за претпазливо спроведување на макропрудентните мерки заради натамошно јакнење на отпорноста на банкарскиот сектор. Со одржувањето на стапката на противцикличниот заштитен слој на капиталот се придонесува за спречување и за намалување на можните ризици.
Народната банка ќе продолжи со внимателно следење на системските ризици и ќе ја преоценува висината на стапката на противцикличниот заштитен слој на капиталот на редовна квартална основа. Притоа, имајќи ја предвид природата на противцикличниот заштитен слој на капиталот и насоките на релевантните европски институции, Народната банка може да ја оцени потребата за зголемување на стапката, при раст на ризиците и неизвесностите од окружувањето, во услови на поволни остварувања на банките. Во случај, пак, на значително остварување на ризиците во билансите на банките, може да се оцени и потребата од делумно или целосно ослободување на овој заштитен слој на капиталот, како поддршка во работењето на банките при евентуални неповолни сценарија.
Советот на Народната банка на седницата разгледа и други материјали поврзани со работата на централната банка.