Економија
На Волстрит цените на акциите паѓаат петти ден по ред
Во вторникот на Волстрит цените на акциите паднаа петти ден по ред, што е последица на стравот кај инвеститорите од продлабочување на должничката криза во еврозоната, откако приносите на шпанските обврзници достигнаа ново рекордно ниво.
Во вторникот на Волстрит цените на акциите паднаа петти ден по ред, што е последица на стравот кај инвеститорите од продлабочување на должничката криза во еврозоната, откако приносите на шпанските обврзници достигнаа ново рекордно ниво. Индексот Dow Jones ослаби за 0,46 отсто на 11.493 поени, S&P 500 се лизна за 0,41 отсто на 1.188 поени, додека индексот Nasdaq за 0,7 отсто на 2.521 поени.Пазарот и натаму е под притисок на европската должничка криза, поради што изминатите пет дена S&P 500 потона за вкупно 5,5 отсто. Иако на парламентарните избори во неделата во Шпанија победи опозицијата којашто се смета за посклона кон спроведувањето на острите мерки за штедење отколку што беше претходната влада, приносите на десетгодишните шпански државни обврзници достигнаа на аукцијата во вторникот ново највисоко ниво во последните 14 години, од 6,58 отсто.Приближувањето на приносите на критичното ниво од 7 отсто, коешто се смета долгорочно неодржлив трошок на финансирањето на задолжувањето, покажува дека инвеститорите не се сигурни дека новата влада на десниот центар во Мадрид ќе го стави буџетот под контрола. Бидејќи Грција, Португалија и Ирска побараа меѓународна помош кога приносите на нивните долгови достигнаа 7 отсто, инвеститорите стравуваат дека Шпанија ќе биде следната земја членка на еврозоната на којашто ќе и’ биде потребна помошта од Европската унија и Меѓународниот монетарен фонд за да се извлече од кризата. Информациите дека ММФ би можел да понуди краткорочни кредити за презадолжените членки од еврозоната , за да им помогне да ги надминат финансиските проблеми, малку ги охрабри вложувачите, но ентузијазмот многу брзо спласна.На пазарите негативно влијаеше и ревидираниот податок за растот на Бруто домашниот производ на САД во третиот квартал од 2 отсто, што е помалку од очекуваното и значително помалку од првичната процена од 2,5 отсто. И на европските берзи во вторникот цените на акциите забележаа пад. Така лондонскиот FTSE 100 се намали за 0,30 отсто на 5.206 поени, франкфуртскиот DAX падна за 1,22 отсто на 5.537 поени, а парискиот CAC 40 падна за 0,84 отсто на 2.870 поени./крај/ро/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Рекорден трговски дефицит во 2023 година во износ од 436 милиони евра
Дополнителниот заменик-министер за земјоделство, шумарство и водостопанство, Цветан Трипуновски, преку фејсбук-објава извести за рекорден трговски дефицит во 2023 година за земјоделско-прехранбени производи во висина од 436 милиони евра.
„Рекорден трговски дефицит во 2023 година во износ од 436 милиони евра. Еве како СДС го уништува македонското земјоделство, Македонија со СДС стана земја увозно зависна од храна. Негрижата за македонските земјоделци и тотално погрешните земјоделски политики на СДС ги принудија земјоделците да го напуштат полето, а со тоа македонските граѓани да јадат увозни земјоделски производи, Македонија од земја извозник стана земја увозник на храна под власта на СДС. Земјоделците ќе имаат вистински партнер во новата влада на ВМРО-ДПМНЕ и заедно ќе го вратиме македонското земјоделство во онаа препознатлива состојба, а Македонија повторно ќе биде земја извозник на храна“, рече Трипуновски.
Економија
Надворешен долг, побарувања и меѓународна инвестициска позиција во четвртото тримесечје од 2023 година
Објавено е редовното статистичко соопштение за позначајните промени кај надворешниот долг, надворешните побарувања и меѓународната инвестициска позиција.
На крајот на четвртиот квартал од 2023 година:
На 31.12.2023 година, нето надворешниот долг изнесува 4.458 милиони евра (или 32,6% од проценетиот БДП). Нето надворешниот долг на земјата, во четвртиот квартал од 2023 година, е зголемен за 305 милиони евра, или за 7,3%. Од аспект на структурата, приватниот нето-долг и натаму има поголемо учество во вкупниот нето-долг со 67%.
Во текот на четвртиот квартал од 2023 година, негативната нето меѓународна инвестициска позиција (МИП) е зголемена за 160 милиони евра и изнесува 8.500 милиони евра, односно 62,2% од проценетиот БДП за 2023 година.
Најновото соопштение за позначајните промени кај надворешниот долг, надворешните побарувања и меѓународната инвестициска позиција е достапно на следниот линк.
Економија
Во вториот квартал од 2025 година стапката на противцикличниот заштитен слој на капиталот ќе остане 1,5 отсто, одржана седница на Советот на Народната банка
Советот на Народната банка, на својата редовна седница, одржана на 28 март 2024 година, врз основа на редовната квартална оцена на системските ризици, донесе одлука за задржување на стапката на противцикличниот заштитен слој на капиталот за изложеностите на банките во Република Северна Македонија во висина од 1,5%, којашто ќе се применува и во вториот квартал од 2025 година. Одлуката се заснова врз оцените за постепено стабилизирање на нагорните циклични системски ризици и постојана стабилност на банкарскиот систем. Исто така, ги зема предвид условите од окружувањето коешто и натаму е неизвесно и придружено со ризици, што е причина за претпазливо спроведување на макропрудентните мерки заради натамошно јакнење на отпорноста на банкарскиот сектор. Со одржувањето на стапката на противцикличниот заштитен слој на капиталот се придонесува за спречување и за намалување на можните ризици.
Народната банка ќе продолжи со внимателно следење на системските ризици и ќе ја преоценува висината на стапката на противцикличниот заштитен слој на капиталот на редовна квартална основа. Притоа, имајќи ја предвид природата на противцикличниот заштитен слој на капиталот и насоките на релевантните европски институции, Народната банка може да ја оцени потребата за зголемување на стапката, при раст на ризиците и неизвесностите од окружувањето, во услови на поволни остварувања на банките. Во случај, пак, на значително остварување на ризиците во билансите на банките, може да се оцени и потребата од делумно или целосно ослободување на овој заштитен слој на капиталот, како поддршка во работењето на банките при евентуални неповолни сценарија.
Советот на Народната банка на седницата разгледа и други материјали поврзани со работата на централната банка.