Економија
ОЕЦД прогнозира забавување идната година, заздравување во 2013
Организацијата за стопанска соработка и развој (ОЕЦД) во најновите економски прогнози објави дека очекува стопанскиот раст на нејзините членки да забави од овогодинешните 1,9 процент, на 1,6 проценти во идната година, по што во 2013 година би требало да заздрави на 2,3 проценти.
Организацијата за стопанска соработка и развој (ОЕЦД) во најновите економски прогнози објави дека очекува стопанскиот раст на нејзините членки да забави од овогодинешните 1,9 процент, на 1,6 проценти во идната година, по што во 2013 година би требало да заздрави на 2,3 проценти.
Стапката на невработеност во земјите од ОЕЦД би требало да остане висока во тек на подолг период и наредните две години би требало да изнесува околу осум проценти, се вели во најновите економски прогнози, објавени дека на официјалната интернет страница на оваа организација со седиште во Париз.
Економските прогнози се темелат на основното сценарио, кое претпоставува дека политичарите ќе преземат доволно мерки за да се спречи неконтролираниот банкрот на државите, остриот пад на кредитните пласмани, пропаста на системските банки и прекумерното заострување на фискалните политики, истакнува натаму ОЕЦД.
Растот во САД, најголемата економија на светот, според сегашните прогнози идната година би требало да изнесува околу два процента, а во 2013 година додатно да се забрза на 2,5 проценти. Оваа година растот во овој економски гигант ќе биде 1,7 проценти.
Во еврозоната, пак, стапката на раст од очекуваните 1,6 проценти силно ќе забави на само 0,2 процента во идната година, а во 2013 година повторно ќе се качи на 1,4 проценти, прогнозираат од ОЕЦД.
По падот од 0,3 проценти во 2011 година, Јапонија идната година може да очекува раст од два процента, а во 2013 година од 1,6 проценти.
Кинеската економија благо ќе забави во 2012 година, на 8,5 проценти, по овогодинешните 9,3 проценти, за во 2013 година повторно да порасне за големи 9,5 проценти. Послабата економска активност во Кина и во останатите економии во подем, во комбинација со скромниот пад на цените на стоката, би требало да доведат до слабеење на инфлацијата во тие земји и со тоа ќе се овозможи благо попуштање на монетарната политика.
Во најновите прогнози ОЕЦД ги повикува политичарите да преземат одлучни мерки за да се спречи ширењето на должничката криза во еврозоната на други земи, како и за да се поттикне раст на потклекнатото глобално стопанство.
Како клучен ризик за глобалното стопанство, во ОЕЦД ја наведуваат должничката криза на еврозоната. Втор најбитен ризик за слабеење на глобалните активности, според нивното мислење, е непостигнувањето на договор во САД за мерките со кои во значителна мера би се анулирало заострувањето на фискалната политика, што според важечките американските закони, сега автоматски ќе се случи. Тоа, велат од ОЕЦД, би можело да доведе до лизгање на стопанството во рецесија, а монетарната политика може многу малку да стори за да го спречи тоа.
„Изгледите ќе се подобрат само ако се преземат одлучни акции. Во еврозоната ризикот од ширењето на заразата мора да биде сузбиен преку значително подобрување на Европскиот фонд за финансиска стабилност (ЕФСФ), во комбинација со поголеми можности за ангажман на билансот на Европската централна банка“, вели главниот економист на ОЕЦД, Пјер карло Падоан.
Подобрените изгледи исто така ќе зависат од спроведувањето на среднорочната фискална програма во САД, се заклучува во прогнозите на ОЕЦД. /крај/хина/сс/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.