Економија
Еврозона: Финансиските министри се борат со времето
Европските министри за финансии одржуваат средба во Брисел непосредно откако еврокомесарот за монетарни прашања, Оли Рен, вчера изјави дека „на еврозоната и остануваат само уште десет дена да го подготви одговорот на должничката криза“.
Европските министри за финансии одржуваат средба во Брисел непосредно откако еврокомесарот за монетарни прашања, Оли Рен, вчера изјави дека „на еврозоната и остануваат само уште десет дена да го подготви одговорот на должничката криза“.На се поголемата сериозност на кризата предупреди и претседателот на Европскиот совет, Херман Ван Ромпуј.„Проблемите стануваат систематски. Се соочува со криза на целосно губење на довербата во еврото. Некои за тоа ја обвинуваат нерационалноста на пазарите, но тоа е факт и ние мораме да му се спротивставиме“, рече тој.Министрите за финансии од еврозоната успеаја да ги договорат основните начела врз кој ќе биде основан Европскиот фонд за финансиска стабилност (ЕФСФ), но истакнаа дека е малку веројатно дека фондот ќе успее да ја постигне целта од обезбедување на еден трилион евра. ЕФСФ ќе има двостран пристап во собирањето на средствата и нивна реализација. Фондот најпрвин ќе гарантира 20 до 30 проценти од долгот на одредена држава во случај да не е во можност да си ги плати долговите и во таа висина ќе ги обесштетува инвеститорите. ЕФСФ, исто така, ќе може да откупува обврзници на земјите=должнички, но само како последен механизам, кога нема да можат да се зајмат на ниту еден друг начин. Со тоа, се надеваат во еврозоната, ќе се намали притисокот врз земјите должнички, особено Италија и Шпанија, кои во моментов плаќаат огромни приноси за своите обврзници. Министрите се договорија и да овозможат создавање на коинвеститорски фондови, за да се овозможи во фондот да учествуваат и други приватни и јавни инвеститори, освен централните банки на земјите-членки на еврозоната. Сепак, засега никој уште нема јасно посочено од каде и како се планира да се соберат планираните средства, во услови кога речиси нема инвеститор кој не ја загубил вербата во државните обврзници од еврозоната. Како доказ за тоа, посочуваат аналитичарите, за само две недели сумата на пари кои банките ги инвестирале во Европската централна банка е зголемена за 100 милијарди евра, од 300 на 400 милијарди евра. Тоа, според аналитичарите, заедно со речиси целосно замрзнатото зајмење на пари помеѓу банките во еврозоната, е јасен доказ за целосната недоверба на инвеститорите. /крај/bbc/сс/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Рекорден трговски дефицит во 2023 година во износ од 436 милиони евра
Дополнителниот заменик-министер за земјоделство, шумарство и водостопанство, Цветан Трипуновски, преку фејсбук-објава извести за рекорден трговски дефицит во 2023 година за земјоделско-прехранбени производи во висина од 436 милиони евра.
„Рекорден трговски дефицит во 2023 година во износ од 436 милиони евра. Еве како СДС го уништува македонското земјоделство, Македонија со СДС стана земја увозно зависна од храна. Негрижата за македонските земјоделци и тотално погрешните земјоделски политики на СДС ги принудија земјоделците да го напуштат полето, а со тоа македонските граѓани да јадат увозни земјоделски производи, Македонија од земја извозник стана земја увозник на храна под власта на СДС. Земјоделците ќе имаат вистински партнер во новата влада на ВМРО-ДПМНЕ и заедно ќе го вратиме македонското земјоделство во онаа препознатлива состојба, а Македонија повторно ќе биде земја извозник на храна“, рече Трипуновски.
Економија
Надворешен долг, побарувања и меѓународна инвестициска позиција во четвртото тримесечје од 2023 година
Објавено е редовното статистичко соопштение за позначајните промени кај надворешниот долг, надворешните побарувања и меѓународната инвестициска позиција.
На крајот на четвртиот квартал од 2023 година:
На 31.12.2023 година, нето надворешниот долг изнесува 4.458 милиони евра (или 32,6% од проценетиот БДП). Нето надворешниот долг на земјата, во четвртиот квартал од 2023 година, е зголемен за 305 милиони евра, или за 7,3%. Од аспект на структурата, приватниот нето-долг и натаму има поголемо учество во вкупниот нето-долг со 67%.
Во текот на четвртиот квартал од 2023 година, негативната нето меѓународна инвестициска позиција (МИП) е зголемена за 160 милиони евра и изнесува 8.500 милиони евра, односно 62,2% од проценетиот БДП за 2023 година.
Најновото соопштение за позначајните промени кај надворешниот долг, надворешните побарувања и меѓународната инвестициска позиција е достапно на следниот линк.
Економија
Во вториот квартал од 2025 година стапката на противцикличниот заштитен слој на капиталот ќе остане 1,5 отсто, одржана седница на Советот на Народната банка
Советот на Народната банка, на својата редовна седница, одржана на 28 март 2024 година, врз основа на редовната квартална оцена на системските ризици, донесе одлука за задржување на стапката на противцикличниот заштитен слој на капиталот за изложеностите на банките во Република Северна Македонија во висина од 1,5%, којашто ќе се применува и во вториот квартал од 2025 година. Одлуката се заснова врз оцените за постепено стабилизирање на нагорните циклични системски ризици и постојана стабилност на банкарскиот систем. Исто така, ги зема предвид условите од окружувањето коешто и натаму е неизвесно и придружено со ризици, што е причина за претпазливо спроведување на макропрудентните мерки заради натамошно јакнење на отпорноста на банкарскиот сектор. Со одржувањето на стапката на противцикличниот заштитен слој на капиталот се придонесува за спречување и за намалување на можните ризици.
Народната банка ќе продолжи со внимателно следење на системските ризици и ќе ја преоценува висината на стапката на противцикличниот заштитен слој на капиталот на редовна квартална основа. Притоа, имајќи ја предвид природата на противцикличниот заштитен слој на капиталот и насоките на релевантните европски институции, Народната банка може да ја оцени потребата за зголемување на стапката, при раст на ризиците и неизвесностите од окружувањето, во услови на поволни остварувања на банките. Во случај, пак, на значително остварување на ризиците во билансите на банките, може да се оцени и потребата од делумно или целосно ослободување на овој заштитен слој на капиталот, како поддршка во работењето на банките при евентуални неповолни сценарија.
Советот на Народната банка на седницата разгледа и други материјали поврзани со работата на централната банка.