Економија
Глобален инвестициски самит за Македонија 2012
Во хотел Метропол, Охрид од 18 до 21 октомври 2012 година ќе се одржи „Глобалниот Инвестициски Самит за Македонија 2012“ прв и единствен настан од ваков вид во земјата во организација на групацијата Македонија 2025.
Македонија 2025 е невладина организација формирана од македонската бизнис дијаспора, која е посветена на создавање на просперитетна бизнис клима во Македонија. Главната цел на овој настан е поставување на платформа за стимулирање на економската соработка меѓу македонските компании и бизнис професионалците од дијаспората. Поради големиот интерес за учество на Самитот рокот за регистрација е продолжен до 1-ви Октомври 2012.
Пред македонската бизнис елита и бизнис претставниците од дијаспората ќе се обрати Претседателот на Република Македонија, Ѓорге Иванов, а свое обраќање ќе има и Претседателот на Владата, Никола Груевски. Останати врвни претставници на владиниот економски тим кои ќе ги претстават економските перспективи на земјата и можностите за инвестирање се Владимир Пешевски – заменик на Претседателот на Владата задолжен за економски прашања, Веле Самак – Министер за странски инвестиции, како и претставници на Агенцијата за странски инвестиции и промоција на извозот и Дирекцијата за технолошки развојни зони.
Првпат во Македонија на присутните ќе им се обратат над 30 бизнис лидери , светски експерти од различни области, меѓу кои врвни луѓе на Nokia Siemens, Blackstone Group, Reiffeisen Bank, Credit Suisse и канадската Mobilicity кои ќе дискутираат на следните теми: Глобални економско-политички перспективи; Услови за водење бизнис во Македонија; Инвестициска клима во Македонија: искуства од постоечките странски директни инвестиции; Глобално конкурентни македонски производи и услуги: успешни модели на деловна соработка; Финансирање на инвестициите и извозот: од микро-финансирање до капитални финансиски инвестиции и Соработка со дијаспората во насока на создавање економски можности.
„Постојат два многу важни сегмента во економскиот развој. Еден е да се привлечат и да се задржат странските инвеститори, а вториот е да се изгради конкурентска атмосфера на иновации, во која претприемачите ќе бидат способни да напредуваат и да бидат успешни. Наша цел е да помогнеме на двата фронта„ изјави Џон И. Битов, член на одборот на директори на Македонија 2025 и еден од главните акционери во најголемата канадска еквити компанија „Обелиск“ во интервју за „Граѓански“ магазин.
Другите истакнати говорници и странски инвеститори во Македонија кои ќе учествуваат во својство на панелисти се претставниците на Van Hool – Белгија, Johnson Matthey – Обединето Кралство, Soravia Group – Австрија, SEAF – Холандија, Societe Generale Group – Франција, Deutsche Telekom Group -Германија, итн.
На огромно задоволство на органзиаторите, на присутните ќе им се обрати и Филип ван Хол, сопственик на Ван Хол – Белгија, кој ќе зборува за отвирањето на новата фабрика во Македонија. Ван Хол е најголемиот независен производител на автобуси и минибуси во Западна Европа. Според ван Хол, компаниите кои се фокусираат на иновација и работа според потребите на потрошувачите секогаш функционираат одлично. Тој ги познава многу добро пазарите, потребите на потрошувачите и остварливоста на новите проекти. Тој не го негува традиционалниот однос снабдувач – потрошувач, туку секогаш размислува за долготрајно партнерство. Иако најголемата страст му е бизнисот со автобуси, Филип не го губи фокусот на буџетите, како и контролата на трошоците. „Умешноста во правење на вистинска процена е да се има како техничко така и финансиско знаење“ – вели ван Хол. Во 2001 тој беше назначен за член на ABC Companies, американска компанија која е ексклузивен дистрибутер на возилата Ван Хол низ Северна Америка. Тие имаат многу развиена мрежа за продажба на резервни делови и одржување на возилата во САД и Канада.
Друг истакнат говорник во Охрид ќе биде и Хубертус ван дер Ваарт, коосновач и извршен директор на бордот на директори на инвестицискиот фонд SEAF. Тој во доцните 1990-ти години го основа SEAF фондот во Македонија со цел да го витализира приватниот сектор со нудење на капитал за проширување на малите претпријатија. Благодарение на неговото долгогодишно искуство како бизнис лидер, Ваарт ќе зборува за финансиските можности кои ги имаат компаниите во регионот и кои планираат да се прошират на светско ниво. Ќе ги изрази своите ставови во врска со економската состојба во регионот, последиците од многубројните турбуленции, како и предизвиците кои треба да се надминат.
Mеѓу бизнис претставниците од дијаспората има и такви кои веќе имаат развиени бизнис релации со Македонија и кои ќе го презентираат својот успешен бизнис модел на соработка. Емил Христов, сопственик на ЕМСА Солар и член на бордот на директори на Македонија 2025 ќе го пренесе своето искуство за инвестирањето во секторот за обновливи извори на енергија. Крис Павловски, основач на Cosmic Development, ќе зборува за можностите за инвестирање во ИТ секторот во Македонија. На присутните ќе им се обрати и Вера Ставроф, претседател и извршен директор на HerbalScience и AlkaloidUSA, ко-осоновач на Green Beauty и член на бордот на директори на Македонија 2025, која ќе зборува за можности за пласман на македонски производи на пазарот во САД.
Уште една истакната личност, претставник на македонската дијаспора, која ќе се обрати на годинешниот самит е професор Славица Веит. Профите Славица Веит е извршен директор на PEC International, енергетска консултантска компанија која специјализира во нафтената индустрија и се концентрира претежно на големи инвестициски проекти. Проф. Веит е од исклучително значење за нашата земја, затоа што уште од првите денови од осамостојувањето на Македонија е активен лобист во Обединетото Кралство и Европа. Нејзините достигнувања во промоцијата на нашата држава се признаени со доделувањето на високата државна награда „Св. Климент Охридски“. На Глобалниот Инвестициски Самит ќе зборува за нејзините претходни активности и искуства во мобилизирањето на Дијаспората за работа на економскиот развој на Македонија преку бизнис лобирање. Ќе ја претстави и својата визија за идни активности кои можат да се преземат во нашиот регион, а се однесуваат на поврзување и координирање на бизнис дијаспората.
На Самитот го потврдија своето присуство и странски компании од САД, Канада, Австралија како и повеќе земји од ЕУ кои се заинтересирани за соработка со македонските компании во следните области: Агробизнис, преработка на храна и вино; Финансиски и инвестициски услуги; Информатичко – компјутерски технологии; Производство и индустриски гранки; Недвижности, градежништво и туризам; Инфраструктура, енергетски и природни ресурси. Голем интерес покажаа и македонските компании од сите профили и сектори, мали и средни претпријатија и претпријатија кои котираат како најголеми и најуспешни македонски компании.
Своја поддршка на Глобалниот инвестициски самит за Македонија дадоа и следните институции: Министерството за Економија, Агенцијата за странски инвестиции и промоција на извозот, Агенцијата за Иселеништво, Американска стопанска комора – АМ ЧАМ, Стопанската комора на Македонија, Сојузот на стопански комори и Стопанската комора на северо-западна Македонија.
Само компаниите кои ќе го регистрираат своето учество најдоцна до 1-ви октомври, со доставување на својот профил и лого, ќе бидат вклучени во официјалниот каталог на учесници кој ќе биде доставен до сите странски и домашни учесници./крај/со/мф/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.
Економија
Трипуновски: Ги потпишав првите 16 договори за закуп на земјоделско земјиште во државна сопственост
Дополнителниот замени министер за земјоделство, шумарство и водостопанство Цветан Трипуновски на својата фејсбук страна објави дека ги потпишал првите 16 договори за закуп на земјоделско земјиште во државна сопственост.
Во својата објава Трипуновски вели: „Почитувани земјоделци, штотуку ги потпишав првите 16 договори за закуп на земјоделско земјиште во државна сопственост, нека е аирлија!“
Трипуновски во неколку наврати ја алармираше јавноста дека во Република Македонија постојат договори за закуп на земјоделско земјиште во државна сопственост кои истекуваат оваа година, но на истите не им е овозможено продолжување и дека Николовски го кочи продолжување со образложение дека се потребни законски измени на законот за земјоделско земјиште.
„Сепак на крајот успеавме да го реализираме нашиот предлог за разрешница на овој проблем по многу побрза и поедноставна постапка, наспроти тврдењата на министерот Николовски кој постојано, од непознати причини, тврдеше дека се потребни измени на законот за земјоделско земјиште и дека со анексирање на договорите не се решава овој проблем. Со ова само се докажа дека Николовски повторно ве лаже како што тоа го прави изминативе 7 години“, дополни Трипуновски.
Позитивно е тоа што овој голем проблем доби решение и засегнатите земјоделци конечно ќе можат да ги продолжат своите договори согласно законските регулативи. Со ова Трипуновски покажа дека ќе биде предводник во промените и решавањето на проблемите во македонското земјоделство.
„ВМРО-ДПМНЕ секогаш било и ќе биде на страната на македонските земјоделци, доколку ние не го изнесовме овој проблем во јавноста, СДС и Николовски никогаш немаше да ги продолжат овие договори на вредните македонски земјоделци или пак тоа ќе го правеа селективно и повторно земјоделското земјиште ќе завршеше кај луѓе што не се земјоделци или истото ќе го трансформираа за плантажи со фотоволтаици. ВМРО-ДПМНЕ секогаш ќе може гордо и со крената глава да биде помеѓу светиниколчани и сите земјоделци во Република Македонија“, заврши Трипуновски во својата објава.
Економија
Народна банка: Основната каматна стапка се задржува на нивото од 6,30 отсто
На 16 април 2024 година се одржа редовна седница на Комитетот за оперативна монетарна политика на Народната банка, на која беа разгледани најновите податоци и информации за глобалната и за домашната економија и најновите случувања на меѓународните и на домашните финансиски пазари во контекст на поставеноста на монетарната политика.
На седницата на Комитетот беше оценето дека тековнaта поставеност на монетарната политика е соодветна на условите во економијата. Така, каматната стапка на благајничките записи останува на нивото од 6,30%, а каматните стапки на депозитите преку ноќ и на 7 дена на нивоата од 4,20% и 4,25%, соодветно. Понудата на благајнички записи на редовната аукција е исто така непроменета и изнесува 10 милијарди денари. И натаму се очекува дека тековното ниво на каматните стапки, заедно со досегашните промени кај задолжителната резерва и преземените макропрудентни мерки ќе придонесат за натамошно забавување на инфлацијата и за задржување на стабилноста на девизниот курс. Притоа, последните промени кај инструментот задолжителна резерва, чијашто примена започнува од јуни 2024 година, значат и дополнителна поддршка на прудентниот карактер на монетарната политика, извести Народната банка.
Во услови на стабилен девизен пазар, главниот акцент при носењето на одлуката за задржување на тековната поставеност на монетарната политика беше ставен на потребата од стабилизирање на инфлацијата на историски ниските нивоа и инфлациските очекувања на потрајна основа, имајќи ги предвид присутните ризици, коишто во голема мера се поврзани со геополитичките тензии. Имено, инфлацијата очекувано забрза во март 2024 година на 4% на годишно ниво (3% во февруари), со оглед на престанокот на важноста на мерките за гарантирани цени на дел од прехранбените производи и пијалаци и за укинување/намалување на дел од увозните давачки. Сепак, остварувањето е под проекцијата на Народната банка, при значително намален притисок од цените на храната и енергијата, но и пониски ценовни притисоци од помалку променливите категории во првиот квартал, во согласност и со преземените монетарни мерки. Цените на примарните производи на берзите и натаму надолно се приспособуваат, со исклучок на нафтата којашто има одредени флуктуации. Остварувањата кај инфлацијата од почетокот на годината се пониски од очекувањата, но нивото сѐ уште е над историскиот просек, а ризиците во однос на идната динамика на цените и натаму постојат. Оттука, беше оценето дека е потребна натамошна претпазливост при водењето на политиките, вклучително и на политиките што делуваат врз побарувачката во економијата. Во однос на политиката на Европската централна банка (ЕЦБ), на последната седница во април повторно беше донесена одлука за задржување на основните каматни стапки на истото ниво.
Состојбата на девизниот пазар е стабилна и движењата се поволни. Нивото на девизните резерви на крајот на март изнесува 4.287,1 милион евра, што е соодветно за задржување на стабилноста на курсот на домашната валута. Движењата на девизниот пазар се поволни и придонесуваат за интервенции со нето-откуп на девизи од страна на Народната банка, при умерено намалена нето-побарувачка од корпоративниот сектор и натамошен висок прилив на девизи на менувачкиот пазар. Во однос на последните расположливи податоци од надворешниот сектор, трговскиот дефицит во првите два месеца од 2024 година е малку повисок од очекувањата според октомврискиот циклус проекции. Остварувањата на менувачкиот пазар заклучно со март се малку пониски од проектираните нето-приливи од приватните трансфери.
Остварениот економски раст во последниот квартал на 2023 година, како и за целата година, е под проектираниот, што упатува на посилно забавување на економскиот раст од очекуваното. Имено, реалниот раст на домашната економија во 2023 година изнесува 1%, при раст на БДП во четвртиот квартал од годината од 0,9% на годишна основа. Високофреквентните податоци за првиот квартал од 2024 година со кои се располага упатуваат на годишен раст кај индустриското производство и угостителството, при мал реален годишен пад на прометот во вкупната трговија и кај градежништвото. Сепак, расположливоста на податоците е ограничена и не е доволна за попрецизна оцена. Во однос на ризиците за растот во следниот период, тие и натаму постојат и се поврзани пред сѐ со случувањата во надворешното окружување, но и со интензитетот на остварувањето на домашните инфраструктурни проекти.
Во монетарниот сектор, според првичните податоци за март 2024 година, депозитите растат со слична динамика како и претходниот месец, но малку посилно од очекувањата. Од друга страна, кредитната активност на банките умерено забавува, но годишниот раст е малку над проекциите за првиот квартал.
Сѐ на сѐ, амбиентот за водење на монетарната политика е умерено поповолен од очекувањата. Сепак, ризиците кај инфлацијата наметнуваат потреба од натамошно внимателно следење на динамиката и факторите на инфлацијата и претпазливост во однос на водењето на макроекономските политики коишто влијаат врз побарувачката во економијата, вклучително и преку пазарот на труд каде што има високи стапки на реален раст на платите. Народната банка и натаму е подготвена да ги употреби сите неопходни инструменти и да презема соодветни мерки со коишто ќе се придонесе за задржување на стабилноста на девизниот курс, стабилизирање на инфлациските очекувања и за ценовна стабилност на среден рок, соопшти НБ.