Економија
Штедењето во Македонија на историски највисоко ниво
Штедењето од страна на граѓаните во Македонија продолжува континуирано да расте и достигнува историски највисоко ниво, а радува податокот што депозитите во денари достигнуваат 50 отсто.
Ова беше истакнато на отворањето на првиот саем на банки во Македонија БанкЕкспо, што се одржува во средата во Скопје по повод Светскиот ден на штедењето-31 октомври.Саемот го отвори вицепремиерот и министер за финансии, Зоран Ставрески кој оцени дека Македонија годинава го дочекува Светски ден на штедењето на најдобар можен начин, со историски највисоко ниво на штедење.„Значењето на штедењето е несомнено огромно, бидејќи обезбедува посигурна иднина за сите на нас. Овозможува поддршка на стопанската активност и овозможува зачувување на реалната вредност на заштедите на граѓаните“, рече Ставрески.Тој информираше дека благодарение на стабилноста на националната валута интересот за штедење во денари и интересот за штедење на подолг рок се зголемени„Во услови кога се зголемени предизвиците, во Македонија имаме позитивни трендови кои што можат да се сублимираат со еден збор, а тоа е дека сеуште е висока довербата во банкарскиот сектор и сеуште е висока довербата во денарот, како најдобра валута за штедење“, изјави Ставрески. Според него, сето тоа не е случајно, туку е резултат на координариноста и соработка на сите чинители и институции кои што се надлежни за одржување на оваа доверба.Претседател на Здружението на банкарство при Стопанската комора на Македонија Ѓорѓи Јанчевски информираше дека штедењето, како еден од главните столбови за стабилноста на банкарскиот сектор, со околу 50 отсто учество во вкупните извори, претставува еден од главните потпори за финансирање на македонскиот бизнис. „Депозитите на населението достигнуваат 2,8 млрд евра. И покрај кризата која во годинава има поголем замав, депозитите од почетокот на годината се зголемени за 5 отсто односно за 140 милиони евра што укажува дека политиката на одржување на стабилен курс на денарот, стабилни цени, ниска инфлација и фискална дисциплина, ги даваат потребните резултати. Граѓаните им веруваат на банките, веруваат во системот“, изјави Јанчевски, кој е и Претседател на Управниот одбор на НЛБ Тутунска банка АД Скопје.И гувернерот Димитар Богов изнесе податоци кои покажуваат дека штедењето на населението продолжува да расте и дека македонските граѓани имаат доверба во банките. „Нашиот банкарски систем е стабилен, нема поголеми проблеми, адекватноста на капиталот е на исклучително високо ниво од 17 отсто, а ликвидноста се држи на историско ниво од околу 30 отсто од вкупната актива. Тоа гарантира стабилен банкарски систем и можност банките да ја поддржуваат домашната економија“, рече Богов.Тој нагласи дека одржувањето стабилен банкарски сектор и зголемување на денарското штедење остануваат императив на Народната банка. /крај/со/ап/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.