Економија
Сараќини во Вашингтон: УСАИД е значаен долгогодишен партнер на Македонија
Министерот за економија Ваљон Сараќини е дел од делегацијата од Република Македонија, која во четврток во Вашингтон присуствува на годинашниот Молитвен појадок, под покровителство на претседателот на САД Барак Обама.
Станува збор за традиционален годишен собир на истакнати претставници на политичкиот, верскиот, културниот и деловниот живот на заедничка молитва и е отворен за претставници на сите верски групи и на разни политички определби. Оваа традиција трае од 1953 година, од времето на претседателот Двајт Ајзенхауер, а годинава се поканети претставници од стотина држави во светот, од кои своето присуство го потврдија околу 3.000 учесници.Министерот Сараќини за време на престојот во Вашингтон оствари средба со Пејџ Александер, одговорна за Европа и Азија за УСАИД, на која беше изразено задоволството од досегашната успешна и плодна повеќегодишна соработка со УСАИД, во рамки на повеќе проекти кои имаа за цел подобар економски развој на Република Македонија. Министерот за економија изрази интерес за продолжување на поддршката во тековни и нови инвестициони проекти за економски развој, бидејќи, како што наведе на средбата, пред Република Македонија се наоѓаат многу предизвици за обезбедување на одржлив развој и конкурентна економија. „Република Македонија има донесено повеќе стратешки документи кои ја креираат развојната рамка. Но, добредојдена ќе биде поддршката во имплементација на стратешките документи, политики и стратегии кои се на највисоко ниво и јасно ја поставуваат визијата за развој, како што се Индустриската стратегија, Стратегиите за развој на мали и средни претпријатија, за извозна промоција, за иновации, за енергетска ефикасност, за туризам“, истакна Сараќини на средбата со Пејџ.Во текот на разговорот беше изразено задоволство од забележаниот напредок на Република Македонија во создавањето поволна деловна клима и конкурентноста на приватниот сектор што е потврдено во „Дуинг бизнис“, Светскиот економски форум, но и со многуте други позитивни оценки од разни меѓународни институции. Предложените области за поддршка од страна на УСАИД, како значаен долгогодишен партнер на Република Македонија се во насока на зголемена конкурентност на приватниот сектор, индустриска политика, развој на мали и средни претпријатија, одржлив економски развој, зголемување на инвестиции во Република Македонија, преку подобрена грижа и услуги за инвеститори, подобрена клима, подобрена промоција, извозна промоција, јавно-приватен дијалог и развој на иновативност, знаење, соработка на бизнисот и науката, како еден од приоритетите на министерот Сараќини.Во текот на денешниот ден, министерот Сараќини заедно со претседателот на Собранието на Република Македонија Трајко Вељановски ќе реализираат средба со претседателот на Албанско-американскиот национален совет, Авни Мустафај. /крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.
Економија
Трипуновски: Ги потпишав првите 16 договори за закуп на земјоделско земјиште во државна сопственост
Дополнителниот замени министер за земјоделство, шумарство и водостопанство Цветан Трипуновски на својата фејсбук страна објави дека ги потпишал првите 16 договори за закуп на земјоделско земјиште во државна сопственост.
Во својата објава Трипуновски вели: „Почитувани земјоделци, штотуку ги потпишав првите 16 договори за закуп на земјоделско земјиште во државна сопственост, нека е аирлија!“
Трипуновски во неколку наврати ја алармираше јавноста дека во Република Македонија постојат договори за закуп на земјоделско земјиште во државна сопственост кои истекуваат оваа година, но на истите не им е овозможено продолжување и дека Николовски го кочи продолжување со образложение дека се потребни законски измени на законот за земјоделско земјиште.
„Сепак на крајот успеавме да го реализираме нашиот предлог за разрешница на овој проблем по многу побрза и поедноставна постапка, наспроти тврдењата на министерот Николовски кој постојано, од непознати причини, тврдеше дека се потребни измени на законот за земјоделско земјиште и дека со анексирање на договорите не се решава овој проблем. Со ова само се докажа дека Николовски повторно ве лаже како што тоа го прави изминативе 7 години“, дополни Трипуновски.
Позитивно е тоа што овој голем проблем доби решение и засегнатите земјоделци конечно ќе можат да ги продолжат своите договори согласно законските регулативи. Со ова Трипуновски покажа дека ќе биде предводник во промените и решавањето на проблемите во македонското земјоделство.
„ВМРО-ДПМНЕ секогаш било и ќе биде на страната на македонските земјоделци, доколку ние не го изнесовме овој проблем во јавноста, СДС и Николовски никогаш немаше да ги продолжат овие договори на вредните македонски земјоделци или пак тоа ќе го правеа селективно и повторно земјоделското земјиште ќе завршеше кај луѓе што не се земјоделци или истото ќе го трансформираа за плантажи со фотоволтаици. ВМРО-ДПМНЕ секогаш ќе може гордо и со крената глава да биде помеѓу светиниколчани и сите земјоделци во Република Македонија“, заврши Трипуновски во својата објава.